លោក Conor Nestor ជាគ្រូបង្វឹកនិងខ្សែប្រយុទ្ធជនជាតិកាម៉េរ៉ូ Privat Mbarga របស់ក្រុមបាល់ទាត់ព្រះខ័នរាជស្វាយរៀង ត្រូវបានគណៈកម្មការប្រកួតបាល់ទាត់ជាតិកម្ពុជា ហៅ CNCC ជ្រើសរើសជាបុគ្គលឆ្នើមប្រចាំខែមេសា ប្រចាំរដូវកាល២០១៩ នៃក្របខណ្ឌពានរង្វាន់លីគកំពូលកម្ពុជា (Metfone Cambodian League)។
ប្រភពបានបញ្ជាក់ថា ក្រោយដឹកនាំឈ្នះទាំង៥ប្រកួតដំបូងនៅក្នុងពានរង្វាន់លីគកំពូលកម្ពុជា លោក Conor ទទួលបានពានគ្រូបង្វឹកល្អក្នុងខែមេសា ហើយនេះក៏ជាលើកទី២ដែរដែលទទួលបានរង្វាន់កិត្តិយសនេះបន្ទាប់ពីខែមីនា ដែលកាលណោះលោកដឹកនាំឈ្នះ៣ប្រកួតជាប់គ្នា និងមិនរបូតគ្រាប់បាល់ថែមទៀត។ ចំណែកកីឡាករ Privat Mbarga ត្រូវបានជ្រើសរើសជាកីឡាករឆ្នើមប្រចាំខែមេសា តាមរយៈការរួមចំណែកយ៉ាងលេចធ្លោឲ្យក្រុមមានមូលដ្ឋាននៅខេត្តស្វាយរៀង បន្តឈរកំពូលតារាងគិតត្រឹមសប្ដាហ៍ទី៥។
សូមបញ្ជាក់ថា នេះលើកទី២ហើយនៅក្នុងពានរង្វាន់លីគកំពូលកម្ពុជា ដែលរៀបចំងារជាកីឡាករឆ្នើមនិងគ្រូបង្វឹកឆ្នើម ក្រោមការវាយតម្លៃពី CNCC ខណៈកាលពីខែមីនា ឆ្នាំ២០១៩ កន្លងទៅគ្រូបង្វឹកល្អបានទៅលោក Conor Nestor ខណៈកីឡាករឆ្នើមជាងគេបានទៅកីឡាករ គួច សុកុម្ភៈ របស់ក្លិបណាហ្គាវើល។
គិតត្រឹមពេលនេះក្រុមព្រះខ័នរាជស្វាយរៀង កំពុងឈរកំពូលតារាងបណ្តោះអាសន្នមាន១៥ពិន្ទុក្នុងដៃច្រើនជាងគេ បើធៀបនឹងសមាជិកទាំង១៤ក្រុម។ ព្រះខ័នរាជស្វាយរៀង បានយកឈ្នះលើក្រុមអគ្គស្នងការដ្ឋាននគរបាលជាតិ ២ទល់០ ហើយឈ្នះម្ចាស់ផ្ទះសូលទីឡូអង្គរ ១ទល់០ បន្តឈ្នះក្រុមគីរីវង់សុខសែនជ័យ ២ទល់០ ឈ្នះភ្នំពេញក្រោន ៥ទល់១ និងចុងក្រោយឈ្នះអគ្គីសនីកម្ពុជា ១ទល់០។ ចំណែកប្រកួតបន្ទាប់វិញក្រុមព្រះខ័នរាជស្វាយរៀង ត្រូវប៉ះក្រុមអង្គរថាយហ្គឺរ នៅវេលាម៉ោង៦ល្ងាចថ្ងៃទី១ ខែឧសភា ឆ្នាំ២០១៩ លើទីលានកីឡដ្ឋានខេត្តស្វាយរៀង ក្នុងសប្ដាហ៍ទី៦នៃពានរង្វាន់លីគកំពូលកម្ពុជា៕
Source: Kampuchea Thmey Daily
0 Comments