កំពត ៖ សមយុទ្ធបាញ់គ្រាប់ពិតហនុមានមាស ២០១៩ បានចាប់ផ្តើមហើយ កាលពីព្រឹកថ្ងៃទី០៤ ខែឧសភា ឆ្នាំ២០១៩ នៅទីលានតេជោសែនជុំគីរី (ខេត្តកំពត) ដែលពិធីនេះ ចូលរួមបើកដោយលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក។
ថ្លែងទៅកាន់អ្នកចូលរួមនៅក្នុងពិធីនោះ លោកឧត្តមសេនីយ៍ឯក ហ៊ុន ម៉ាណែត បាននាំមកនូវការផ្តាំផ្ញើសាកសួរសុខទុក្ខ និងក្តីនឹករឭកប្រកបដោយមនោសញ្ចេតនាជ្រាលជ្រៅពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្នាក់ដឹកនាំក្រសួងការពារជាតិ និងអគ្គបញ្ជាការដ្ឋាននៃកងយោធពលខេមរភូមិន្ទ ជូនដល់គណៈអធិបតី ភ្ញៀវជាតិ-អន្តរជាតិ យោធាចារ្យ នាយទាហាន នាយទាហានរង និងពលទាហានទាំងអស់ ដែលមានវត្តមាននៅទីនេះ បានទទួលបាននូវសិរីសួស្តី ជ័យមង្គល សុខភាពល្អបរិបូរណ៍ សេចក្តីសុខ និងសុភមង្គលគ្រប់ប្រការ។
លោកឧត្តមសេនីយ៍ឯក ហ៊ុន ម៉ាណែត លើកឡើងថា ឆ្លងតាមការទស្សនាការបាញ់គ្រាប់ពិតនាពេលអម្បាញ់មិញ ព្រមជាមួយនឹងរបាយការណ៍ស្វាគមន៍របស់លោកឧត្តមសេនីយ៍ឯក ម៉ៅ សុផាន់ មេបញ្ជាការរងកងទ័ពជើងគោក មេបញ្ជាការកងពលតូចថ្មើរជើងលេខ៧០ និងជាប្រធានគណៈកម្មការដឹកនាំសមយុទ្ធបាញ់គ្រាប់ពិតហនុមានមាស ២០១៩ លោកអាចសន្និដ្ឋានបានថា ការចាត់តាំងធ្វើសមយុទ្ធបាញ់គ្រាប់ពិតហនុមានមាស ២០១៩ លើកនេះ ពិតជាឆ្លើយតបទៅនឹងគោលបំណង និងសំណូមពរភារកិច្ចលើការងារហ្វឹកហ្វឺនស្របនឹងផែនការ ដែលបានដាក់ចេញ ហើយរំពឹងនឹងទទួលបានបទពិសោធន៍ជាក់ស្តែងលើការងារមួយចំនួនដូចជាពង្រឹងសមត្ថភាពជំនាញដល់នាយទាហាន នាយទាហានរង និងពលទាហាន កងទ័ពជើងគោកនៃកងយោធពលខេមរភូមិន្ទ ក្នុងកិច្ចការពារបូរណភាពទឹកដីនាពេលបច្ចុប្បន្ន និងទៅអនាគត, ត្រួតពិនិត្យ វាស់ស្ទង់ និងវាយតម្លៃសមត្ថភាពរបស់យោធិនយើង ក្រោយពីការហ្វឹកហ្វឺននៅតាមបណ្តាសាលា និងកងឯកភាពរួច, លើកកម្ពស់គុណភាពការងារ និងផ្តល់ចំណេះដឹងលើការងារសេនាធិការ ក្នុងការធ្វើសមយុទ្ធ ដល់កម្មសិក្សា នាយទាហានសេនាធិការក្នុងការសហការរវាងប្រភេទទ័ព និងទ័ពជំនាញ ក្នុងពេលហ្វឹកហ្វឺន ក៏ដូចជាក្នុងពេលប្រយុទ្ធ ជាពិសេសធ្វើឲ្យកាន់តែប្រទាក់ក្រឡាគ្នា និងកាន់តែប្រសើរឡើងរវាងការងារត្រៀមប្រយុទ្ធ ប្រយុទ្ធជាមួយនឹងការងារធានា។
តាមលោកឧត្តមសេនីយ៍ឯក ហ៊ុន ម៉ាណែត ពិធីបើកវគ្គសមយុទ្ធនាថ្ងៃនេះ បានឆ្លុះបញ្ចាំងអំពីការប្តេជ្ញាចិត្ត និងការខិតខំប្រឹងប្រែងបំពេញតួនាទីយ៉ាងសកម្មរបស់មេបញ្ជាការគ្រប់លំដាប់ថ្នាក់ នាយនាយទាហាន នាយទាហានរង និងពលទាហានទាំងអស់ និងជាការចូលរួមចំណែកមួយយ៉ាងសំខាន់ ក្នុងការងារហ្វឹកហ្វឺនសំដៅកសាងបណ្តុះបណ្តាលធនធានមនុស្សក្នុងជួរកងយោធពលខេមរភូមិន្ទ ឲ្យមានសមត្ថភាពពេញលេញ និងរឹងមាំ ធានាបាននូវប្រសិទ្ធភាពនៃកិច្ចការពារជាតិមាតុភូមិ ជាពិសេសសំណូមពរភារកិច្ចចំពោះមុខរបស់កងទ័ពជើងគោក។
បង្កើនការជឿជាក់ និងស្មារតីទទួលខុសត្រូវក្នុងការគោរពវិន័យ និងអនុវត្តបទបញ្ជា្កងទ័ព សំដៅធានាប្រសិទ្ធភាព និងជោគជ័យនៃប្រតិបត្តិការសឹក រក្សាបាននូវសន្តិសុខសុវត្ថិភាពទាំងមនុស្ស និងសម្ភារៈគ្រឿងបំពាក់ឲ្យបានល្អប្រសើរ។
ទន្ទឹមនឹងនេះផងដែរ ព្រឹត្តិការណ៍នេះ ក៏បានបង្ហាញអំពីការរួបរួមសាមគ្គីសហការជាធ្លុងមួយរបស់កងយោធពលខេមរភូមិន្ទ ដែលជាសសរទ្រូងធ្វើឲ្យប្រទេសជាតិមានសុខសន្តិភាព ស្ថិរភាព និងការអភិវឌ្ឍរីកចម្រើនលើគ្រប់វិស័យ ហើយក៏ជាការបញ្ជាក់ និងបង្ហាញឲ្យកម្លាំងអមិត្តដឹងថា កងទ័ពជើងគោកនៃកងយោធពលខេមរភូមិន្ទទោះជាស្ថិតក្នុងកាលៈទេសៈណាក៏ដោយ ក៏នៅតែស្មោះត្រង់ការពារ និងគោរពដាច់ខាតនូវបទបញ្ជារបស់រាជរដ្ឋាភិបាល ក្រសួងការពារជាតិ និងអគ្គបញ្ជាការដ្ឋានជានិច្ចដោយឥតងាករេ។
ក្នុងនាមក្រសួងការពារជាតិ អគ្គបញ្ជាការដ្ឋាន និងបញ្ជាការដ្ឋានកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានចូលរួមអបអរសាទរចំពោះលទ្ធផលការងារ ដែលគណៈកម្មការដឹកនាំសមយុទ្ធហនុមានមាស ២០១៩ ក្រោមកិច្ចសហការជាមួយស្ថាប័ន កងឯកភាពពាក់ព័ន្ធ បានខិតខំយកចិត្តទុកដាក់រៀបចំរហូតសម្រេចបាននាពេលនេះ និងបានសម្តែងនូវការគាំទ្រលើកទឹកចិត្តដល់នាយទាហាន នាយទាហានរង និងពលទាហានទាំងអស់ បន្តការខិតខំប្រឹងប្រែងបំពេញតួនាទីភារកិច្ចឱ្យកាន់តែសកម្មខ្លាំងក្លាបន្ថែមទៀត ដើម្បីបន្តចូលរួមចំណែកក្នុងការអនុវត្តផែនការកែទម្រង់កងយោធពលខេមរភូមិន្ទ និងគោលនយោបាយរបស់រាជរដ្ឋាភិបាលលើវិស័យការពារជាតិឲ្យបានជោគជ័យ។
លោកឧត្តមសេនីយ៍ឯក ហ៊ុន ម៉ាណែត លើកឡើងដែរថា កងយោធពលខេមរភូមិន្ទ នៅតែចាត់ទុកវិស័យហ្វឹកហ្វឺន គឺជាការងារដ៏មានសារៈសំខាន់ ដែលត្រូវដំណើរការជាប់ជាប្រចាំដូចភ្លៀងរលឹម ដើម្បីអភិវឌ្ឍសមត្ថភាពវិជា្ជជីវៈយោធិន និងកសាងជួរកងកម្លាំងបន្តវេន ឆ្លើយតបទៅនឹងការបន្តកែទម្រង់កងកម្លាំងប្រដាប់អាវុធ ដូចមានកំណត់ក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦នេះ។ លោកបន្តថា បច្ចុប្បន្ន កងយោធពលខេមរភូមិន្ទមានប្រព័ន្ធហ្វឹកហ្វឺនកាន់តែប្រសើរឡើងជាលំដាប់ ហើយការហ្វឹកហ្វឺនបណ្តុះបណ្តាលយោធិនអាជីព និងការហ្វឹកហ្វឺនជំនាញឯកទេសកំពុងត្រូវបានពង្រឹង។ ជាក់ស្តែង នៅតាមស្ថាប័ន កងឯកភាពទូទាំងកងយោធពលខេមរភូមិន្ទ មានការបើកវគ្គហ្វឹកហ្វឺនជាបន្តបន្ទាប់ ស្របទៅតាមផែនការប្រចាំឆ្នាំដែលបានដាក់ចេញ។
តាមលោកឧត្តមសេនីយ៍ឯក ហ៊ុន ម៉ាណែត ក្រោមគោលនយោបាយដឹកនាំដ៏ត្រឹមត្រូវរបស់ សម្តេចតេជោ នាយករដ្ឋមន្ត្រី ជាពិសេសបន្ទាប់ពីជោគជ័យនៃនយោបាយឈ្នះ-ឈ្នះ ដែលនាំមកនូវឯកភាពជាតិ ឯកភាពទឹកដី ដែលមិនធ្លាប់មាននៅក្នុងប្រវត្តិសាស្ត្រជាង៥០០ឆ្នាំចុងក្រោយរបស់កម្ពុជា ប្រជាជនកម្ពុជាទូទាំងប្រទេសកំពុងរស់នៅក្នុងសន្តិភាព សុខដុមរមនា សំបូរសប្បាយ និងពោរពេញទៅដោយមោទនភាពចំពោះសមិទ្ធផលទាំងឡាយ ដែលសម្រេចបានក្នុងរយៈពេលកន្លងមកនេះ។ លើមូលដ្ឋាននៃសន្តិភាព កម្ពុជាកំពុងមានការអភិវឌ្ឍលើគ្រប់វិស័យ និងកំណើនសេដ្ឋកិច្ចខ្ពស់ ហើយជីវភាពរស់នៅរបស់ប្រជាជនកម្ពុជាកាន់តែមានភាពប្រសើរឡើងជាលំដាប់។ លោកមានជំនឿយ៉ាងមុខមាំថា បន្ទាប់ពីការចូលរួមក្នុងសមយុទ្ធបាញ់គ្រាប់ពិតហនុមានមាស ២០១៩ នេះ មេបញ្ជាការរងគ្រប់លំដាប់ថ្នាក់ យោធាចារ្យ និងនាយទាហានកម្លាំងអនុវត្តទាំងអស់ នឹងទទួលបានចំណេះដឹង និងបទពិសោធន៍ថ្មីៗ សម្រាប់ដឹកនាំអនុវត្តការងារហ្វឹកហ្វឺននៅតាមបណ្តាកងឯកភាពឲ្យទទួលបានជោគជ័យ និងកាន់តែមានប្រសិទ្ធភាពខ្ពស់។
ជាថ្មីម្តងទៀត លោកឧត្តមសេនីយ៍ឯក ហ៊ុន ម៉ាណែត បានថ្លែងនូវការកោតសរសើរចំពោះគណៈកម្មការដឹកនាំសមយុទ្ធបាញ់គ្រាប់ពិតហនុមានមាស ២០១៩ កងទ័ពជើងគោក អាជ្ញាធរដែនដី និងគ្រប់ស្ថាប័ន-កងឯកភាពចំណុះក្រសួងការពារជាតិ អគ្គបញ្ជាការដ្ឋាន និងបញ្ជាការដ្ឋានកងទ័ពជើងគោក ដែលបានខិតខំប្រឹងប្រែងសហការរៀបចំសមយុទ្ធនេះ ដំណើរការទទួលលទ្ធផលល្អប្រសើរតាមកម្មវិធីដែលបានគ្រោងទុក។
សូមបញ្ជាក់ថា នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ ធ្លាប់បានបញ្ជាក់ថា សមយុទ្ធហនុមានមាស២០១៩ មានកម្លាំងយោធាចូលរួមចំនួន១៥៩៥នាក់ ដែលក្នុងនោះ មានមកពីបណ្តាជំនាញតាមអង្គភាព វិទ្យាស្ថានកងទ័ពជើងគោក បញ្ជាការដ្ឋានអង្គរក្ស ទ័ពជើងអាកាស បញ្ជាការដ្ឋានការពារអាកាស វិទ្យាស្ថានកងទ័ពជើងគោក បញ្ជាការដ្ឋានបញ្ជូនសារ ក.ជ.គ កងពលតូចលេខ៧០ កងពលតូចទ័ពពិសេសឆ័ត្រយោង៩១១ បញ្ជាការដ្ឋានវិស្វកម្ម ក.ជ.គ ការិយាល័យទី៥ ក.ជ.គ ក្រុមគ្រូ ក្រុមសេនាធិការក្នុងទីបញ្ជាការ កងពលដឹកជញ្ជូនលេខ៩០ ខុទ្ទកាល័យ ក.ជ.គ ផងដែរ។
ដោយឡែកសម្រាប់ អាវុធយុទ្ធភណ្ឌ ដែលនឹងប្រើប្រាស់ក្នុងសមយុទ្ធនេះ មានដូចជា កាំភ្លើងធំ១៥២មម និង១២២មម កាំភ្លើង២៣មម កាំភ្លើង៣៧មម កាំភ្លើង BM21 RM70 រថក្រោះ រថពាសដែក រថយន្តពេទ្យ រថយន្តពន្លត់អគ្គិភ័យ រថយន្តដឹកជញ្ជូន ឧទ្ធម្ភាគចក្រជាដើម។
សមយុទ្ធ ហនុមានមាស ២០១៩ ត្រូវបានធ្វើឡើងចំនួន៣ លើករួចទៅហើយ ដោយលើកទី១នៅឆ្នាំ២០១០ លើកទី២ នៅឆ្នាំ២០១៣ លើកទី៣ នៅឆ្នាំ២០១៨។ ការហ្វឹកហ្វឺននេះ មិនបានគំរាមកំហែងដល់នរណាឡើយ ផ្ទុយទៅវិញការហ្វឹកហ្វឺននេះ មានគោលដៅពង្រឹងសមត្ថភាពកងទ័ពបន្ថែមទៀតប៉ុណ្ណោះ។
សមយុទ្ធបាញ់គ្រាប់ពិត "ហនុមានមាស ២០១៩" មានរយៈពេល៦ថ្ងៃ ដោយចាប់ពីថ្ងៃទី០៣ ដល់ថ្ងៃទី០៨ ខែឧសភា ឆ្នាំ២០១៩ ហើយធ្វើឡើងដើម្បីពង្រឹងសមត្ថភាព ចំណេះដឹង បណ្តាជំនាញដល់ នាយទាហាន នាយទាហានរង និងពលទាហាន នៃកងទ័ពជើងគោក ក្នុងកិច្ចការពារបូរណភាពទឹកដី នាពេលបច្ចុប្បន្ន និងអនាគត។ សមយុទ្ធនេះ ក៏ជាការវាស់ស្ទង់សមត្ថភាព ក្រោយពីធ្វើការហ្វឹកហ្វឺនតាមបណ្តាសាលា និងកងឯកភាពរួចផងដែរ។ មួយវិញទៀត សមយុទ្ធហនុមានមាស នឹងជួយលើកកម្ពស់សមត្ថភាព គុណភាព ផ្តល់ចំណេះដឹងការងារសេនាធិការ ក្នុងការធ្វើសមយុទ្ធដល់កម្មសិក្សា នាយទាហានសេនាធិការ ក្នុងការសហការរវាងប្រភេទទ័ព និងទ័ពជំនាញ ក្នុងពេលហ្វឹកហ្វឺន ក៏ដូចក្នុងពេលប្រយុទ្ធថែមទៀត៕
Source: Kampuchea Thmey Daily
0 Comments