ក្រុមបាល់ទាត់គីរីវង់សុខសែនជ័យ និងក្រុមវិសាខា សុទ្ធតែយកឈ្នះលើគូប្រកួតរៀងៗខ្លួន ស្របពេលដែលក្រុមសូលទីឡូអង្គរ បានប្រកួតស្មើគ្នាជាមួយក្រុមក្រសួងការពារជាតិ ប្រចាំសប្ដាហ៍ទី៦នៃពានរង្វាន់លីគកំពូលកម្ពុជា (Metfone Cambodian League 2019) នៅល្ងាចថ្ងៃសៅរ៍ ទី៤ ខែឧសភា ឆ្នាំ២០១៩។
ចំពោះក្រុមអគ្គស្នងការដ្ឋាននគរបាលជាតិ បានប្រកួតចាញ់ក្រុមគីរីវង់សុខសែនជ័យ ដោយលទ្ធផល៣ទល់២ លើទីលានកីឡដ្ឋានអគ្គីសនីកម្ពុជា ក្នុងរាជធានីភ្នំពេញ។ គ្រាប់បាល់២គ្រាប់របស់ក្រុមម្ចាស់ផ្ទះរកបានដោយកីឡាករអាហ្វ្រិកខាងត្បូង Booysen Shane នៅនាទី១៧ និង៦៦ ខណៈ៣គ្រាប់របស់គីរីវង់សុខសែនជ័យ រកបានដោយកីឡាករជនជាតិជប៉ុន Ota នៅនាទីទី៣ ហើយកីឡាករ ដាវ នឹម នៅនាទី៦ និងកីឡាករជនជាតិម៉ាលី Souleymane Coulibaly រកបានគ្រាប់បាល់នៅនាទី៧៦។
សម្រាប់ក្រុមសូលទីឡូអង្គរ បានប្រកួតស្មើគ្នាជាមួយក្រុមក្រសួងការពារជាតិ ដោយលទ្ធផល១ទល់១ លើទីលានកីឡដ្ឋានស្វាយធំ (កីឡដ្ឋានខេត្តសៀមរាប)។ កីឡាករខ្មែរ-អ៊ីស្លាម លី ម៉ូស្លីម បានរកគ្រាប់បាល់បើកឆាកឲ្យម្ចាស់ផ្ទះនាំមុខនៅនាទី៣៧ ខណៈកីឡាករជនជាតិនីហ្សេរីយ៉ា Dzarma Bata រកបានគ្រាប់បាល់ឲ្យក្រសួងការពារជាតិតាមស្មើវិញនៅនាទីទី៦២។
ចុងក្រោយក្រុមវិសាខា បានយកឈ្នះលើក្រុមខេត្តកំពង់ចាម ដោយលទ្ធផល១៤ទល់០ លើទីលានវិសាខា ក្នុងរាជធានីភ្នំពេញ។ កីឡាករ កែវ សុខផេង បានរកគ្រាប់បាល់៧គ្រាប់ម្នាក់ឯងឲ្យក្រុមវិសាខា គឺនៅនាទីទី៣,១២,២៣,៣០,៤៥,៦៩,៧១ ខណៈកីឡាករក្រិក Evangelos Skraparas រកបាន២គ្រាប់នៅនាទី៤៤និង៤៦ ហើយកីឡាករជនជាតិប៊ុលហ្គារី Lyuben Nikolov រកបានគ្រាប់បាល់បាននៅនាទី៥៨ កីឡាករ ស៊ិន សុផាណាត់ រកបាននៅនាទី៨០,៨៤ កីឡាករកូរ៉េខាងជើង Pak Song Chol រកបានគ្រាប់បាល់នៅនាទី៨៣ និងកីឡាករ សុខ សុវណ្ណ បន្ថែមគ្រាប់បាល់ចុងក្រោយនៅនាទី៨៩។
ចំណែក៤គូផ្សេងទៀតត្រូវប្រកួតក្នុងសប្ដាហ៍ទី៦នេះ ត្រូវធ្វើឡើងនៅថ្ងៃអាទិត្យ ទី៥ខែឧសភា ឆ្នាំ២០១៩ ដោយក្រុមអាស៊ីអឺរ៉ុប ទទួលក្រុមអគ្គីសនីកម្ពុជា នៅវេលាម៉ោង៣:៣០នាទីរសៀលលើទីលាន AEU Sport Park ហើយក្រុមណាហ្គាវើល ទទួលក្រុមភ្នំពេញក្រោន នៅវេលាម៉ោង៦ល្ងាចលើទីលានស្តាតចាស់ ខណៈក្រុមយុវជនសាលាបាល់ទាត់ជាតិបាទី ប៉ះក្រុមបឹងកេត នៅវេលាម៉ោង៣:៣០នាទីរសៀលលើទីលានសាលាបាល់ទាត់ជាតិ ក្នុងស្រុកបាទី ខេត្តតាកែវ និងចុងក្រោយក្រុមព្រះខ័នរាជស្វាយរៀង ទទួលក្រុមអង្គរថាយហ្គឺរ នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង។
តាមគម្រោងពានរង្វាន់បាល់ទាត់លីគកំពូលកម្ពុជារដូវកាលថ្មីឆ្នាំ ២០១៩ នេះនឹងចាប់ផ្ដើមពីថ្ងៃទី១៦ ខែមីនា ដល់ថ្ងៃទី១៧ ខែតុលា ឆ្នាំ២០១៩។ ក្រុមជើងឯកលីគកំពូលកម្ពុជាមានឱកាសចេញទៅប្រកួតលើឆាកអន្តរជាតិមួយចំនួនដូចជាពានរង្វាន់ AFC Cup, Mekong Championship និងពានរង្វាន់មួយចំនួនទៀត៕
Source: Kampuchea Thmey Daily
0 Comments