កំពត ៖ នៅព្រឹកថ្ងៃទី០៦ ខែឧសភា ឆ្នាំ២០១៩ រដ្ឋបាលខេត្តកំពត បានបើកកិច្ចប្រជុំពិភាក្សា ស្ដីពីការត្រៀមរៀបចំពិធីបុណ្យសមុទ្រលើកទី៨ ជុំទី២ ឆ្នាំ២០១៩ ក្រោមអធិបតីភាពដឹកនាំកិច្ចប្រជុំ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និង លោក ជាវ តាយ អភិបាល នៃគណៈអភិបាលខេត្តកំពត។
ក្នុងកិច្ចប្រជុំ លោក ជាវ តាយ អភិបាលខេត្ត បានលើកបញ្ជាក់ថា ពាក់ព័ន្ធសម្រាប់ពិធីបុណ្យសមុទ្រលើកទី៨ ជុំទី២ ដែលខេត្តកំពតត្រៀមធ្វើជាម្ចាស់ផ្ទះនាពេលខាងមុខនេះ រដ្ឋបាលខេត្តបានរៀបចំនូវហេដ្ឋារចនាសម្ព័ន្ធមួយចំនួនរួចហើយដែរ និង បន្តរៀបចំការងារមួយចំនួនបន្ថែមទៀត ដោយត្រូវកែលំអហេដ្ឋារចនាសម្ព័ន្ធ និងសោភណភាពជុំវិញទីតាំងពិធី និងក្នុងក្រុងទាំងមូល។
ជាមួយនោះដែរ លោកអភិបាលខេត្ត ក៏បានស្នើដល់គណៈកម្មការអន្តរក្រសួង ក៏ដូចជាឯកឧត្ដមរដ្ឋមន្ត្រី ថោង ខុន មេត្តាជួយអន្តរាគមន៍លើការពន្លឿននូវការកសាងកំណាត់ផ្លូវចាប់ពីចំណុចផ្លូវប្រសព្វផ្លូវជាតិលេខ៣ និងផ្លូវជាតិលេខ៤១ រហូតដល់ក្រុងកំពតឲ្យបានរួចរាល់ ដើម្បីសម្រួលដល់ការធ្វើដំណើររបស់ភ្ញៀវទេសចរជាតិ-អន្តរជាតិ និងប្រជាពលរដ្ឋមកលេងកម្សាន្តបុណ្យសមុទ្រចុងឆ្នាំ២០១៩នេះផងដែរ។
នាឱកាសនោះ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា បុណ្យសមុទ្រគឺជាបុណ្យមួយមានសារប្រយោជន៍ក្នុងការរួមចំណែកធ្វើឲ្យវិស័យទេសចរណ៍សម្រាប់ខេត្តទាំងបួនជាប់មាត់សមុទ្រ ពោលគឺចាប់ពីបានធ្វើបុណ្យសមុទ្រលើកទីមួយមកមានភ្ញៀវទេសចរជាតិ-អន្តរជាតិមកកម្សាន្តខេត្តទាំងបួនមានការកើនឡើងជាបន្តបន្ទាប់ស្របទៅអ្វីដែលគោលដៅទាក់ទាញទេសចរណ៍ដែលរាជរដ្ឋាភិបាលបានកំណត់ស្រាប់។
លោកបណ្ឌិត ថោង ខុន ក៏បានអះអាងថា ពិធីបុណ្យសមុទ្រនៅខេត្តកំពតនាចុងឆ្នាំ២០១៩នេះ នឹងខិតខំរៀបចំឲ្យមានភាពទាក់ទាញប្រសើរជាងឆ្នាំមុនៗ ជាមួយនឹងផលិតផលទេសចរណ៍ថ្មីៗប្លែកភ្នែកជាច្រើន ដើម្បីជាគំរូសម្រាប់ការរៀបចំបុណ្យសមុទ្រលើកក្រោយៗទៀត។
លោករដ្ឋមន្ត្រី ក៏បានលើកឡើងបន្តថា នៅសល់ពេលតែ៦ខែទៀតប៉ុណ្ណោះ បុណ្យសមុទ្រ នឹងចូលមកដល់ហើយ។ ដូច្នេះរដ្ឋបាលខេត្ត មន្ទីរជំនាញ និង អ្នកពាក់ព័ន្ធ ត្រូវចាប់ផ្ដើមត្រៀមរៀបចំការងារបុណ្យសមុទ្រនេះពីឥឡូវនេះទៅដែលជាបុណ្យសមុទ្រលើកទី៨ ជុំទី២នៅខេត្តកំពត នាចុងឆ្នាំ២០១៩នេះ ដើម្បីឲ្យអ្នកដែលចូលរួមនឹងមើលឃើញអ្វីដែលជាផលិតផលទេសចរណ៍ប្លែកៗ អ្វីដែលជាសក្ដានុពល និងភាពរីកចម្រើនឥតឈប់ឈររបស់ខេត្តកំពត ពិសេសក្រុងកំពតដែលសំបូរសំណង់បុរាណកេរ្តិ៍ដំណែលពីសម័យបារាំង ដ៏សែនស្រស់ឆើតឆាយនៅពេលយប់ នាពេលបច្ចុប្បន្ននេះ។
លោកបានបន្តថា រូបលោក រួមនឹងរដ្ឋបាលខេត្ត ក្រុងស្រុក នឹងរួមគ្នាធ្វើឲ្យពិធីបុណ្យសមុទ្រនៅខេត្តកំពតនេះ មានភាពទាក់ទាញ ប្លែកភ្នែកជាងឆ្នាំកន្លងទៅ។ ក្នុងនោះលោកស្នើឲ្យមន្ទីរជំនាញ និងអាជ្ញាធរ ត្រូវរៀបចំតំបន់គោលដៅទេសចរណ៍នានា ក្នុងខេត្តសាជាថ្មីឡើងវិញ ធ្វើយ៉ាងណាឲ្យស្អាត មានសុវត្ថិភាព និងបរិស្ថានអនាម័យល្អជាងមុន រួមនឹងការជំរុញផ្សព្វផ្សាយឲ្យបានទូលំទូលាយជូនសាធារណជនបានដឹងពីពិធីបុណ្យសមុទ្រនៅខេត្តកំពតចាប់ពីពេលនេះតទៅផងដែរ។
ដោយឡែក រដ្ឋបាលខេត្ត ក៏ត្រូវសម្រួល និងគិតគូរអំពីផ្លូវធ្វើដំណើរ ទៅកាន់តំបន់គោលដៅទេសចរណ៍ ឬរមណីយដ្ឋានក្នុងខេត្ត ឲ្យមានភាពងាយស្រួលក្នុងការធ្វើដំណើរ ត្រូវជួសជុល ឬត្រូវធ្វើថ្មីតែម្ដង ដើម្បីឆ្លើយតបបានទៅនឹងរាជរដ្ឋាភិបាលដែលកំណត់ថា ជាខេត្តគោលដៅទេសចរណ៍បែបប្រវត្តិសាស្ត្រ កសិទេសចរណ៍ធម្មជាតិ និងជាផ្នែកមួយ នៃមជ្ឈមណ្ឌលពាណិជ្ជកម្ម និងការផ្លាស់ប្តូរសេដ្ឋកិច្ចទេសចរណ៍ផងដែរ។
ជាមួយនោះ លោករដ្ឋមន្ត្រី ក៏បានណែនាំការដាក់តាំងពិពណ៌ផលិតផលក្នុងស្រុក ដើម្បីសម្គាល់អត្តសញ្ញាណរបស់ខេត្ត ឬតំបន់ភូមិ/ឃុំ នៃស្រុក។ ពិសេស ត្រូវដាក់ស្លាកឈ្មោះ ផលិតផលកសិផល ផ្សេងៗ ចៀសវាងការដាក់តាំងបន្លំ ផលិតផលរបស់គេថា ជារបស់ខេត្តកំពត។
នៅក្នុងឱកាសនោះដែរ លោកបណ្ឌិត ថោង ខុន ក៏បានស្នើសុំឲ្យមានការចូលរួម សម្អាតអនាម័យទាំងអស់គ្នា ជាពិសេសប្រជាពលរដ្ឋទាំងអស់នៅក្នុងខេត្ត ត្រូវតុបតែង សម្អាតគេហដ្ឋានរបស់ខ្លួនដើម្បីឲ្យមានភាពទាក់ទាញ៕
Source: Kampuchea Thmey Daily
0 Comments