ពាក្យបណ្ដឹងរបស់តុលាការ បានបង្ហាញឱ្យដឹងថា ក្រុមព្រះរាជអាជ្ញាសហរដ្ឋអាមេរិកកំពុងប្រកាសលក់ភូមិគ្រឹះនៅ Los Angeles តម្លៃ ៣៩លានដុល្លារ ដែលត្រូវចោទប្រកាន់ថាបានទិញដោយមន្ត្រីហិរញ្ញវត្ថុម៉ាឡេដែលកំពុងរត់គេចខ្លួន លោក Low Taek Jho ដោយប្រើលុយលួចពីមូលនិធិរដ្ឋ។
លោក Low ឬមនុស្សភាគច្រើនហៅថា Jho Low ត្រូវបានចោទប្រកាន់ទាំងក្នុងប្រទេសម៉ាឡេស៊ី និងសហរដ្ឋអាមេរិកពីបទលួចលុយមូលនិធិ 1 MDB របស់រដ្ឋក្នុងទំហំទឹកប្រាក់ ៤,៥លានដុល្លារ។ បើតាមអ្នកនាំពាក្យរបស់លោក Low បានបង្ហាញការបដិសេធថា លោកមិនបានធ្វើខុសដូចការចោទប្រកាន់នេះទេ ខណៈពេលនេះគេមិនទាន់ដឹងថា លោកគេចខ្លួនទៅដល់ទីណានៅឡើយ។
ភូមិគ្រឹះនៅពេលនេះគ្មានមនុស្សនៅឡើយ និងមានសភាពទ្រុឌទ្រោមណាស់ទៅហើយ ដែលត្រូវការចំណាយប្រមាណ៦៩ម៉ឺនដុល្លារដើម្បីធ្វើការជួសជុល ការបង់ធានារ៉ាប់រង និងបង់ពន្ធប្រចាំឆ្នាំ។ នេះបើតាមសម្ដីរបស់ក្រុមព្រះរាជអាជ្ញាអាមេរិក និងក្រុមហ៊ុនកាន់កាប់អចលនវត្ថុកាលពីថ្ងៃសុក្រ។
ក្រុមព្រះរាជអាជ្ញាបានបន្ថែមថា ប្រាក់មូលនិធិដែលលួចពី 1MDB ត្រូវបានប្រើដោយលោក Low និងបក្សពួកច្រើននាក់ទៀតដើម្បីទិញទ្រព្យជាច្រើន រួមមាន ភូមិគ្រឹះដ៏ស្កឹមស្កៃនេះ យន្តហោះផ្ទាល់ខ្លួនមួយគ្រឿង គ្រឿងអលង្ការ និងគំនូរសិល្បៈដែលមានតម្លៃសរុបប្រមាណ ១,៧លានដុល្លារ។
តាមការឱ្យដឹងពីប្រភពនានា សហរដ្ឋអាមេរិកនឹងប្រគល់ប្រាក់ដែលរឹបអូសពីបានប្រាក់ដែលលួចទាក់ទងនឹងមូលនិធិ 1MDB នេះប្រមាណ២០០លានដុល្លារ ទៅឱ្យម៉ាឡេស៊ីវិញក្នុងខែនេះ៕REUTERS
Source: Kampuchea Thmey Daily
0 Comments