ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រីនៃកម្ពុជា មានប្រសាសន៍ថា ជាតិសាសន៍និងសាសនាមិនមែនជាឧបសគ្គនៃកិច្ចសហប្រតិបត្តិការដើម្បីការអភិវឌ្ឍប្រទេសនោះទេ។ ដូច្នេះ នេះជាកេរដំណែលប្រវត្តិសាស្ត្ររបស់គណបក្សប្រជាជនកម្ពុជាបានរៀបចំឡើងក្នុងរយៈពេល៤0ឆ្នាំ ហើយចំណុចនេះគឺជាចំណុចដែលសម្តេចសង្ឃឹមថាអ្នកជំនាន់ក្រោយត្រូវខិតខំធ្វើយ៉ាងណាការពារឲ្យបាននូវការបង្រួបបង្រួមជាតិការពារឲ្យបាននូវភាពសុខដុមរវាងជាតិសាសន៍និងសាសន៍។ កម្ពុជាមានភ័ព្វសំណាងដែលយើងបានរៀបចំនូវគោលនយោបាយអាទិភាព អំពីជាតិសាសន៍និងសាសនានៅក្នុងប្រទេសរបស់យើង។
សម្តេចតេជោ ហ៊ុន សែន បានលើកឡើងបែបនេះ កាលពីល្ងាចថ្ងៃទី៧ ខែឧសភា ឆ្នាំ២០១៩នេះ ក្នុងឱកាសដែលសម្តេចបានអញ្ជើញចូលរួមពិធីស្រាយបួសរ៉ាម៉ាឌននៃសាសនាឥស្លាមកម្ពុជា សរុប ៤,៧៥០ នាក់មកពីតាមបណ្តាខេត្តនិងរាជធានីភ្នំពេញ។ ក្នុងនោះក៏មានវត្តមានសាសនិកឥស្លាមមកពីបរទេសចំនួន ៣២០នាក់ ដែលមាន ៣២ ជាតិសាសន៍រួមទាំងតំណាងរបស់លោកអគ្គលេខាធិការអង្គការសហប្រតិបត្តិការឥស្លាម OIC ចំនួន ៣នាក់ផងដែរ។ ពិធីនេះត្រូវបានធ្វើឡើងនៅមជ្ឈមណ្ឌលពិព័រណ៍និងសន្និសីទ កោះពេជ្រ។
ពិធីស្រាយបួសរ៉ាម៉ាឌននៃសាសនាឥស្លាមកម្ពុជាក្រោមអធិបតីភាពសម្តេចតេជោ ហ៊ុន សែន នៅល្ងាចនេះគឺជាលើកទី ៦ ហើយគិតចាប់តាំងពីឆ្នាំ២០១៤ មក។ វត្តមានរបស់សម្តេចតេជោ ហ៊ុន សែន ក្នុងពិធីដ៏មានសារៈសំខាន់របស់បងប្អូនសាសនិកឥស្លាមកម្ពុជាបានបង្ហាញពីការយកចិត្តទុកដាក់ខ្ពស់របស់សម្តេចតេជោ ហ៊ុន សែន ចំពោះសុខដុមបនីយកម្មជនជាតិ និង សាសនានៅកម្ពុជា។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានស្វាគមន៍លោក លោកស្រីថ្នាក់ដឹកនាំនិងសាសនិកឥស្លាមទាំងអស់ដែលបានអញ្ជើញចូលរួមនៅក្នុងពិធីនេះ។ សូមសំដែងនូវការស្វាគមន៍យ៉ាងកក់ក្តៅជូនចំពោះបងប្អូនថ្នាក់ដឹកនាំនៃសាសនាឥស្លាម ក៏ដូចជាសាសនាឥស្លាមទាំងអស់ដែលបានអញ្ជើញមកពីគ្រប់ទីកន្លែងនៅក្នុងក្របខ័ណ្ឌទូទាំងប្រទេស។ ខ្ញុំក៏សូមស្វាគមន៍ផងដែរចំពោះវត្ត មានរបស់ថ្នាក់ដឹកនាំនៃបណ្ដាប្រទេសជាមិត្ត វត្ដមានរបស់ថ្នាក់ដឹកនាំនៃបណ្ដាប្រទេសជាមិត្តដែលបានអញ្ជើញចូលរួមនៅក្នុងពិធីនេះដែលមានប្រមាណជាង ៣០ ប្រទេស។
សម្តេចបន្តថា ឆ្នាំនេះគឺឆ្នាំទី៦ ដែលរាជរដ្ឋាភិបាលបានធ្វើជាម្ចាស់ផ្ទះក្នុងការរៀបចំពិធីស្រាយបួសសាសនាឥស្លាមកម្ពុជា។ ខ្ញុំពិតជាមានការរីករាយដែលថ្ងៃនេះយើងបានជួបគ្នាជួបជុំគ្នាជាបន្តហើយនៅក្នុងក្របខ័ណ្ឌនៃរាជរដ្ឋាភិបាលអាណត្តិថ្មីដូចខ្ញុំបានបញ្ជាក់ហើយកាលពីឆ្នាំ ទៅនៅមុនពេលដែលការបោះឆ្នោតមួយបានដល់ខ្ញុំបាននិយាយទៅកាន់បងប្អូនសាសនិកឥស្លាមនៅជួបជុំគ្នានៅទីនេះថាប្រសិនបើគណបក្សប្រជាជនកម្ពុជាឈ្នះឆ្នោតខ្ញុំនឹងបន្តជួបបងប្អូនតទៅទៀតហើយឆ្នាំនេះគឺជាឆ្នាំទី១ នៃអាណត្តិថ្មីរបស់រាជរដ្ឋាភិបាលនីតិកាលទី៦។ ដូចដែលបាននិយាយហើយខ្ញុំក៏នៅតែទៅគួរបញ្ជាក់ថាដរាបណាខ្ញុំនៅបន្តតំណែងជានាយករដ្ឋមន្ត្រីខ្ញុំនឹងបន្តការជួបជុំគ្នាមួយឆ្នាំម្ដង។
សម្តេចតេជោបន្តថា បញ្ហាដែលជាបញ្ហាធំជាងនេះទៅទៀតនោះនៅត្រង់ថា ប្រទេសរបស់យើងមិនមែនខិតខំព្យាយាមទប់ស្កាត់នូវការបែកបាក់ជម្លោះរវាងជាតិសាសន៍និងសាសនាប៉ុណ្ណោះទេ អ្វីដែលយើងបានធ្វើរយៈពេល៤០ឆ្នាំកន្លងផុតទៅ គឺត្រូវធ្វើសុខដុមបនីយកម្មជាតិសាសន៍និងសាសនា។ យើងមិនមែនគ្រាន់តែធ្វើការទប់ស្កាត់ការបែកបាក់នៅក្នុងក្របខ័ណ្ឌនៃសាសនាមួយទៅកាន់សាសនាមួយ ឬ នៅក្នុងនិកាយមួយនៅក្នុងសាសនាមួយហើយមាននិកាយផ្សេងៗគ្នាប៉ុណ្ណោះទេ។ ក៏ប៉ុន្តែអ្វីដែលបានធ្វើការខិតខំនោះគឺការអត់ឱនការយោគយល់អធ្យាស្រ័យគ្នា ហើយរួមសហការគ្នាដើម្បីកសាងប្រទេស។ ជាតិសាសន៍និងសាសនាមិនមែនជាឧបសគ្គនៃកិច្ចសហប្រតិបត្តិការដើម្បីការអភិវឌ្ឍប្រទេសនោះទេ។ ដូច្នេះនេះជាកេរដំណែលប្រវត្តិសាស្ត្ររបស់គណបក្សប្រជាជនកម្ពុជាបានរៀបចំឡើងក្នុងរយៈពេល៤០ឆ្នាំ ចំណុចនេះគឺជាចំណុចដែលខ្ញុំសង្ឃឹមថាអ្នកជំនាន់ក្រោយត្រូវខិតខំធ្វើយ៉ាងណាការពារឲ្យបាននូវការបង្រួបបង្រួមជាតិការពារឲ្យបាននូវភាពសុខដុមរវាងជាតិសាសន៍ និង សាសនា។ កម្ពុជាមានភ័ព្វសំណាងដែលយើងបានរៀបចំនូវគោលនយោបាយអាទិភាពអំពីជាតិសាសន៍និងសាសនានៅក្នុងប្រទេសរបស់យើង។
សម្តេចបន្តថា ខ្ញុំអាចនិយាយដោយមោទនភាពថានៅព្រះរាជាណាចក្រកម្ពុជាមានកន្លែងខ្លះកូនសិស្សនិងសាសនិកឥស្លាមមានសិទ្ធិគឺបានទទួលនូវផលប្រយោជន៍ឬក៏ទទួលនូវសេរីភាពច្រើនខ្ពស់ពីប្រទេសផ្សេងទៀត។ ឧទាហរណ៍អំពីទីកន្លែងប្រជុំជនអន្តរជាតិព្រលានយន្តហោះនិងទីកន្លែងសាធារណៈសុទ្ធតែមានកន្លែងថ្វាយបង្គំរបស់សាសនិកឥស្លាម។ រដ្ឋមន្ត្រីក្រសួងសុខាភិបាលបានចេញនូវបទវិទ្យាសម្រាប់មន្ទីរពេទ្យរដ្ឋទាំងអស់ឲ្យមានកន្លែងសម្រាប់បងប្អូនដែលជាអ្នកជំងឺឬក៏ជាគ្រូពេទ្យមានការថ្វាយបង្គំ។ ចំណុចនេះយើងអាចនឹងធ្វើនៅតាមសាលារៀននានាទៀតផងដែលនៅទីកន្លែងនោះផ្ដល់ឱកាសឲ្យសិស្សសាលានិស្សិតក៏ដូចជាសិស្សសាលាដែលជាសាសនិកឥស្លាមមានឱកាសក្រាបបង្គំបំពេញកាតព្វកិច្ចក្នុងឋានៈជាគណបក្សកាន់សាសនាឥស្លាមសិស្សនិស្សិតរបស់កម្ពុជា។
សម្តេចតេជោ ហ៊ុន សែន ក៏បានស្នើតាមរយៈតំណាងអគ្គលេខាធិការនៃអង្គការសហប្រតិបត្តិការឥស្លាមជួយប្រាប់ដល់ប្រទេសសមាជិកទាំងអស់ជួយទិញទំនិញអង្ករ និងកសិផលពីប្រទេសកម្ពុជា ក៏ដូចជាអាហារហាឡាល់។ សម្តេចក៏បានអំពាវនាវដល់បណ្តាប្រទេសជាសមាជិកអង្គការ OIC ផ្តល់ឱកាសការងារដល់ប្រជាពលរដ្ឋខ្មែរផងដែរ។ សម្តេចតេជោ ហ៊ុន សែន រំពឹងថា នឹងទទួលបានកិច្ចសហប្រតិបត្តិការជាវិជ្ជមានពីអង្គការ OIC។ សម្តេចតេជោ ហ៊ុន សែន បានថ្លែងអំពាវនាវដល់សាសនិកឥស្លាមដែលបានទៅចូលរួមបុណ្យហាជនៅប្រទេសអារ៉ាប់ប៊ី សាអ៊ូឌីត ពេលត្រឡប់មកវិញ ត្រូវជួយផ្សព្វផ្សាយការធ្វើអំពើល្អដល់សាសនិកឥស្លាមនៅកម្ពុជា ដែលមិនបានទៅចូលរួម។ សម្តេចតេជោ ហ៊ុន សែន បានថ្លែងថា គ្រប់សាសនាទាំងអស់ គ្មានសាសនាបង្រៀនមនុស្សឲ្យប្រព្រឹត្តអំពើអាក្រក់នោះឡើយ។
លោកទេសរដ្ឋមន្ត្រី អូស្មាន ហាស្សាន់ ប្រធានគណៈកម្មការរៀបចំពិធីស្រាយបួសថ្នាក់ជាតិបានសម្តែងការដឹងគុណនិងរីករាយជាខ្លាំងចំពោះការផ្តល់វត្តមានដ៏ខ្ពង់ខ្ពស់របស់សម្តេចតេជោ ហ៊ុន សែន ក្នុងពិធីស្រាយបួសថ្នាក់ជាតិ «ខែរ៉ាម៉ាឌន» នេះ ។ ការដែលបងប្អូនសាសនិកឥស្លាមកម្ពុជាមានឱកាសបានមកជួបជុំស្រាយបួសជាមួយសម្តេចតេជោ ដោយសារតែសម្តេចតេជោបានយកចិត្តទុកដាក់លើកកម្ពស់ផ្តល់សិទ្ធិសេរីភាពនៃជំនឿសាសនាដោយពេញលេញដោយឥតមានការប្រកាន់ពូជសាសន៍ ពណ៌សម្បុរ បង្កើតបាននូវសុខដុមនីយកម្មជាតិសាសន៍ និងសាសនា។
បើតាមលោក អូស្មាន ហាហ្សាន់ បានឲ្យដឹងថា សម្តេចតេជោ ហ៊ុន សែន បានដោះស្រាយនូវសំណូមពរជាច្រើនជូនបងប្អូនសាសនិកឥស្លាមកម្ពុជា។ មិនតែប៉ុណ្ណោះសម្តេចតេជោនាយករដ្ឋមន្ត្រីបានផ្តល់គោលនយោបាយបន្ថែមរៀបចំឲ្យមានបងប្អូនខ្មែរឥស្លាមបានចូលរួមបម្រើកិច្ចការជូនជាតិនៅក្នុងស្ថាប័ននីតិបញ្ញត្ដិ នីតិប្រតិបត្តិ ថ្នាក់ជាតិ ថ្នាក់ក្រោមជាតិ មន្ត្រីជាន់ខ្ពស់នគរបាល យោធា។ល។ រួមមានសមាជិកព្រឹទ្ធសភា ២រូប សមាជិករដ្ឋសភា ៦រូប (ស្រី ២រូប)។
សមាជិករាជរដ្ឋាភិបាលជាទេសរដ្ឋមន្ត្រី១រូប រដ្ឋមន្ត្រីប្រតិភូអមនាយករដ្ឋមន្ត្រី១រូប រដ្ឋលេខាធិការ ៨រូប (ស្រី ២ រូប) អនុរដ្ឋលេខាធិការ២០រូប (ស្រី ៣រូប) ទីប្រឹក្សាជាន់ខ្ពស់រដ្ឋសភា ព្រឹទ្ធសភា រាជរដ្ឋាភិបាល ក្រសួងថ្នាក់ដឹកនាំ ១៤ រូប អភិបាលរងខេត្ត ១ រូប អភិបាលរង ស្រុក-ខណ្ឌ ២ រូប សមាជិកក្រុមប្រឹក្សាខេត្ត ៥រូប សមាជិកក្រុមប្រឹក្សាក្រុង-ស្រុក-ខណ្ឌ ៣៦រូប មន្ត្រីថ្នាក់ឧត្តមសេនីយ៍ យោធា-នគរបាល ២១រូប ក្រុមជំនួយការនិងសមាជិកក្រុមប្រឹក្សាឃុំ-សង្កាត់ជាច្រើនរូបទៀត។
នៅអាណត្តិបោះឆ្នោតជ្រើសរើសក្រុមប្រឹក្សារាជធានី-ខេត្ត ថ្ងៃទី២៦ ខែឧសភា ឆ្នាំ២០១៩ នេះផងដែរ ក៏មានបេក្ខជនមូស្លីមថ្នាក់រាជធានី-ខេត្ត ពេញសិទ្ធិនិងបំរុង ២២រូប ក្រុមប្រឹក្សាពេញសិទ្ធិ និងបំរុង ក្រុង-ស្រុក-ខណ្ឌ ១៣៨រូប ដើម្បីបានចូលបំរើការងារជូនរដ្ឋ ក្នុងភាពជាតំណាងឲ្យបងប្អូនមូស្លីមថែមទៀតផងដែរ។
ការរឹតត្បិតភាពរើសអើងលើជំនឿនិងការគោរពប្រណិប័តន៍ផ្នែកសាសនាបានបង្កជាបញ្ហាអសន្តិសុខ សម្រាប់បណ្តាប្រទេសមួយចំនួនទាំងនៅក្នុងតំបន់និងលើពិភពលោកផងដែរ។ សម្រាប់ប្រទេសកម្ពុជាក្នុងរដ្ឋធម្មនុញ្ញបានចែងថាព្រះពុទ្ធសាសនាជាសាសនារបស់រដ្ឋតែក៏មិនបានហាមឃាត់លើសេរីភាពនៃជំនឿ និងការគោរពប្រណិប័តន៍សាសនានោះដែរ។ នៅកម្ពុជានាពេលបច្ចុប្បន្នមានពុទ្ធសាសនិកប្រមាណ ៩៥ភាគរយ, ឥស្លាមមានជិត ២ ភាគរយ និង គ្រិស្ទសាសនិកប្រមាណ ១.២៥ភាគរយព្រមទាំងសាសនាផ្សេងៗមួយចំនួនទៀត។
ជារៀងរាល់ឆ្នាំសម្តេចតេជោ ហ៊ុន សែន មិនត្រឹមតែអញ្ជើញចូលរួមពិធីស្រាយបួសថ្នាក់ជាតិប៉ុណ្ណោះទេ តែសម្តេចក៏តែងតែអញ្ជើញចូលរួមស្រាយបួសជាមួយគ្រិស្តបរិស័ទផងដែរ។ តាមរយៈសកម្មភាពនេះបានបង្ហាញថា សម្តេចតេជោ ហ៊ុន សែន ជាមេដឹកនាំដែលបានយកចិត្តទុកដាក់ខ្ពស់បំផុតក្នុងការកសាងសុខដុមនីយកម្មជនជាតិនិងសាសនានៅកម្ពុជា។
សូមបញ្ជាក់ថា ចាប់ពីថ្ងៃទី០៧ ខែឧសភា ឆ្នាំ ២០១៩ ត្រូវនឹងថ្ងៃទី ២ ខែ រ៉ាម៉ាឌន ឆ្នាំ១៤៤០ មូហាំម៉ាត់សករាជសាសនិកឥស្លាមកម្ពុជាក៏ដូចជាសាសនិកឥស្លាមនៅក្នុងពិភពលោកកំពុងបួសតមអាហារ ពីព្រលឹមរហូតដល់ថ្ងៃលិចប្រមាណជាង ១៤ ម៉ោងដោយមានការប្រែប្រួលតាមតំបន់ខ្លះរយៈពេលមួយខែក្នុងមួយឆ្នាំដែលជាកាតព្វកិច្ចទី ៤ ក្នុងចំណោមកាតព្វកិច្ចទាំង ៥ នៃអ្នកកាន់សាសនាឥស្លាមទាំងអស់នៅលើសកលលោក៕
Source: Kampuchea Thmey Daily
0 Comments