ភ្នំពេញ ៖ អង្គការអូភើរ៉េសិន អាសា(Operation ASHA) បានដាក់ឲ្យដំណើរការការផ្តល់សេវាប្រឹក្សាដល់អ្នកជំងឺរបេងតាមប្រព័ន្ធអេឡេចត្រូនិចដើម្បីឲ្យអ្នកជំងឺទទួលបាននូវការអប់រំគ្រប់ជ្រុងជ្រោយនិងព្យាបាលបានត្រឹមត្រូវទៀងទាត់ជៀសផុតពីភាពស៊ាំថ្នាំ។
ថ្លែងក្រោយពិធីដាក់ឲ្យដំណើរការការផ្តល់ប្រឹក្សាតាមបែបអេឡេចត្រូនិចនិងសៀវភៅរឿងកំប្លែងក្នុងកម្មវិធីកំចាត់រោគរបេងកាលពីព្រឹកថ្ងៃទី៧ ខែឧសភា ឆ្នាំ២០១៩ នៅសណ្ឋាគារសាន់វ៉េ លោកវេជ្ជបណ្ឌិតលោកវេជ្ជបណ្ឌិត ណារិទ្ធ រដ្ឋា នាយកកម្មវិធីអង្គការអូភើរ៉េសិន អាសាប្រចាំប្រទេសកម្ពុជាបានមានប្រសាសន៍ថា ការផ្តល់ប្រឹក្សាតាមអេឡេចត្រូនិចឬអ៊ីខោន ស៊ែលីងនេះគឺធ្វើឡើងតាមរយៈការបង្ហាញវីដេអូជីវចលខ្លីចំនួន៩វគ្គ ដែលនិយាយពីទិដ្ឋភាពផ្សេងៗគ្នានៃការព្យាបាលជំងឺរបេងមានដូចជាការសាយភាយនៃការចម្លងរោគឱសថសម្រាប់ព្យាបាល សារៈសំខាន់នៃការព្យាបាលជំងឺឲ្យបានត្រឹមត្រូវនិងរបបអាហារក្នុងអំឡុងពេលនិងបន្ទាប់ពីការព្យាបាលជំងឺជាដើម។
លោកវេជ្ជបណ្ឌិតបានបន្ថែមទៀតថា «ថ្ងៃនេះអង្គការអូភើរ៉េសិន អាសាយើងមានគំនិតផ្តួចផ្តើមមួយបែបអេឡេចត្រូនិច ដែលមានរូបភាពឲ្យអ្នកជំងឺបានឃើញបានស្គាល់អាចយល់បានដែលការផ្តល់ប្រឹក្សាតាមពាក្យសំដីជួនកាលគាត់អាចភ្លេចអីចឹងកម្មវិធីអ៊ីខោនស៊ែលីងនេះយើងមានរូបភាពជាក់ស្តែងឲ្យគាត់មើលឃើញអាចយល់បានធ្វើឲ្យអ្នកជំងឺទទួលបានព័ត៌មានគ្រប់ជ្រុងជ្រោយហើយជួយកុំឲ្យអ្នកជំងឺកុំបោះបង់ការព្យាបាល»។
លោកវេជ្ជបណ្ឌិតបានឲ្យដឹងទៀតថា ការផ្តល់ប្រឹក្សាតាមប្រព័ន្ធអេឡេចត្រូនិចនេះ គឺតម្រូវឲ្យអ្នកជំងឺត្រូវចុះឈ្មោះ នៅក្នុងកម្មវិធីអ៊ីខោនស៊ែលីងអេប តាមរយៈទូរស័ព្ទថែបប្លែកជាមុនសិនដើម្បីទទួលបានការព្យាបាលជំងឺដោយទៀងទាត់និងទទួលបានចំណេះដឹងស្តីពីជំងឺរបេងព្រមទាំងព័ត៌មានផ្សេងៗទៀតផងដែរ។
លោកវេជ្ជបណ្ឌិតបានបញ្ជាក់ទៀតថា បច្ចុប្បន្ននេះអង្គការអូភើរ៉េសិន អាសាមានទូរស័ព្ទថែបប្លែកនេះជាង២០គ្រឿង សម្រាប់ឲ្យមន្ត្រីប្រើប្រាស់ចុះធ្វើការនៅតាមសហគមន៍ដើម្បីផ្តល់ប្រឹក្សានិងព្យាបាលដល់អ្នកជំងឺរបេងនៅខេត្តតាកែវ កំពង់ធំនិងរាជធានីភ្នំពេញ។
លោកវេជ្ជបណ្ឌិតសង្ឃឹមថាតាមរយៈការផ្តល់ប្រឹក្សាតាមប្រព័ន្ធអេឡេចត្រូនិចនេះនឹងជួយឲ្យអ្នកជំងឺកាន់តែយល់ដឹងថែមទៀត ពីជំងឺរបេងធានាបាននូវអត្រាព្យាបាលជោគជ័យពិសេសបង្ការទប់ស្កាត់ការវិវត្តន៍ទៅជាជំងឺស៊ាំថ្នាំផងដែរ។
ចំណែកលោក វេជ្ជបណ្ឌិត ម៉ៅ តាន់អ៊ាង ទីប្រឹក្សាអមក្រសួងសុខាភិបាលនិងជានាយកមជ្ឈមណ្ឌលជាតិកំចាត់រោគរបេង និង ហង់សិន បានគាំទ្រកម្មវិធីផ្តល់ប្រឹក្សាតាមប្រព័ន្ធអេឡេចត្រូនិចនេះទាំងស្រុង ព្រោះបានជួយឲ្យអ្នកជំងឺបានជាសះស្បើយតាមរយៈការលេបថ្នាំបានទៀតទាត់នៅចំពោះមុខមន្ត្រីអង្គការ។
លោកវេជ្ជបណ្ឌិតបានមានប្រសាសន៍ថា« អ៊ី ខោន ស៊ែលីងនេះ គឺមានសារៈសំខាន់ណាស់ជួយបន្ថែមសារប្រយោជន៍នៃការព្យាបាលជំងឺរបេងព្រោះថាអ៊ី ខោន ស៊ែលីងនេះពាក់ព័ន្ធសំខាន់ទៅនឹងអប់រំអ្នកជំងឺរបេងលេបថ្នាំឲ្យទៀងទាត់ឲ្យចប់ចុងចប់ដើមគ្រប់កំរិតធ្វើឲ្យអត្រាជាសះស្បើយខ្ពស់មិនមានភាពស៊ាំថ្នាំរបេងច្រើន»។
លោកវេជ្ជបណ្ឌិតបានបន្តទៀតថា កម្មវិធីជាតិកំចាត់រោគរបេងនិងហង់សិននឹងធ្វើការតាមដានកម្មវិធីនេះយ៉ាងយកចិត្តទុកហើយប្រសិនបើប្រព័ន្ធនេះដំណើរការបានល្អកម្មវិធីជាតិនឹងអាចរៀនសូត្រ ឬ ធ្វើជាគំរូសម្រាប់យកទៅអនុវត្តក្នុងកម្មវិធីជាតិដើម្បីបង្កើនការព្យាបាលដល់អ្នកជំងឺរបេងឲ្យកាន់តែមានប្រសិទ្ធភាព។
គួរបញ្ជាក់ថា កន្លងមកការផ្តល់ប្រឹក្សាស្តីពីជំងឺរបេងដល់អ្នកជំងឺគឺធ្វើឡើងតាមរយៈផ្ទាល់មាត់ប៉ុណ្ណោះដោយមានភ្ជាប់រូបភាពផ្សេងៗដែលធ្វើឲ្យអ្នកជំងឺមិនសូវចាប់បានដែលផ្ទុយពីការផ្តល់ប្រឹក្សាតាមអេឡេចត្រូនិចនេះនឹងជួយឲ្យអ្នកជំងឺឆាប់យល់និងចាប់បាន៕
Source: Kampuchea Thmey Daily
0 Comments