ក្លិបកីឡាបាល់ទាត់វិសាខា បានឡើងឈរចំណាត់ថ្នាក់លេខ ៣បណ្ដោះអាសន្ន ក្រោយយកឈ្នះក្លិបបាល់ទាត់ខេត្តកំពង់ចាម ដោយលទ្ធផល១៤-០ក្នុងជំនួបសប្ដាហ៍ទី៦ នៃពានរង្វាន់លីគកំពូលកម្ពុជា (Metfone Cambodian League) ឆ្នាំ២០១៩ នៅកីឡដ្ឋានវិសាខា នៅល្ងាចថ្ងៃទី០៤ ខែឧសភា ឆ្នាំ២០១៩ ថ្មីៗនេះ។
ក្នុងចំណោមគ្រាប់បាល់ជ័យជម្នះរបស់ក្លិបកីឡាបាល់ទាត់ វិសាខា ធ្វើសម្រេចដោយកីឡាករ កែវ សុខផេង ចំនួន៧គ្រាប់ នៅនាទីទី៣, ១២, ២២, ៣០, ៤៥, ៦៩ និងនាទី៧១ ខ្សែប្រយុទ្ធជនជាតិក្រិច Evangelos រកបាន ២គ្រាប់ នៅនាទី៤៤ និងនាទី៤៦, ខ្សែការពារ ស៊ិន សុផាណាត់ រកបាន ២គ្រាប់ នៅនាទី៨០ និងនាទី៨៤, ខ្សែការពារជនជាតិប៊ុលហ្សារី Nikolov Luben នៅនាទី៥៨, ខ្សែបម្រើកូរ៉េខាងជើង Pak Song Chol នៅនាទី៨៣ និងខ្សែការពារ សុខ សុវណ្ណ រកបាននៅនាទី៨៩។
ជុំវិញបញ្ហានេះដែរ លោក ហុក សុជីវ័ន គ្រូបង្គោលក្លិបកីឡាបាល់ទាត់វិសាខា បានលើកឡើងថា ការប្រកួតនេះក៏មិនខុសពីប្រកួតមុនៗដែរ គឺវិសាខា ព្យាយាមលេងអស់ពីសមត្ថភាព ដើម្បីទទួលបានជ័យជម្នះ។ លោកថា «គ្រប់ការប្រកួត សំខាន់បំផុតលើច្បាប់ប្រកួត អ្នកណាសល់គ្រាប់ច្រើន អ្នកនោះឈរលើ ជាក់ស្ដែងយើងឃើញពិន្ទុស្មើគ្នាច្រើន តែយើងនៅក្រោមគេ អញ្ចឹងទើបយើងព្យាយាមរកគ្រាប់បាល់ឲ្យបានច្រើនតាមលទ្ធភាព នៅពេលយើងជួបក្រុមអាចរកគ្រាប់បាល់បាន យើងត្រូវប្រឹងឲ្យអស់ពីសមត្ថភាព»។
គ្រូបង្វឹកកាន់សញ្ញាបត្រ A-License ដដែលបន្ដថា «បាល់ទាត់គឺអញ្ចឹង បើយើងរវល់គិតដល់មនោសញ្ចេតនា វាអាចធ្វើឲ្យប៉ះពាល់ដល់លទ្ធផល និងពិន្ទុរបស់យើង។ ដូចយើងឃើញស្រាប់ហើយកាលពីសប្ដាហ៍ទី៥ ក្រុមមាន ១០ពិន្ទុស្មើគ្នា គឺមាន ៣ក្រុម រួមមានវិសាខា, ក្រសួងការពារជាតិ និងបឹងកេត តែវិសាខា នៅក្រោមគេ(លេខ៦) ក្នុងចំណោម ៣ក្រុមនេះ ដែលពាក់ព័ន្ធនឹងគ្រាប់បាល់ចំណេញនេះឯង អញ្ចឹងទើបយើងត្រូវការគ្រាប់ ដើម្បីបង្កើនចំណាត់ថ្នាក់ល្អរបស់យើងឡើងវិញ»។
ក្រោយចប់ការប្រកួតសប្ដាហ៍ទី៦ ក្លិបកីឡាបាល់ទាត់ វិសាខា គឺទទួលបាន ១៣ពិន្ទុ និងឈរលេខ៣ បណ្ដោះអាសន្ន ជាមួយលទ្ធផល ៦ប្រកួតឈ្នះ៤ លើកស្មើ១ លើកនិងចាញ់ ១លើក។ ចំពោះប្រកួតបន្ទាប់វិសាខា នឹងបន្ដបើកទ្វារផ្ទះ ទទួលក្រុមបឹងកេត នៅវេលាម៉ោង៦ល្ងាចថ្ងៃសៅរ៍ ទី១១ ខែឧសភា ឆ្នាំ២០១៩ ខាងមុខ៕
Source: Kampuchea Thmey Daily
0 Comments