អ្នករាយការណ៍ អសប ចូលរួមអបអរសាទរទិវាពលកម្មអន្តរជាតិ ០១ ឧសភា ខួបលើកទី១៣៣ នៅកម្ពុជា

ភ្នំពេញ ៖ នៅថ្ងៃទី០១ ខែឧសភា ឆ្នាំ២០១៩ ដែលជាទិវាពលកម្មអន្តរជាតិ ខួបលើកទី១៣៣ សហព័ន្ធ សហជីព កម្មករ និយោជិត បាននាំគ្នាប្រារព្ធទិវានេះយ៉ាងគ្រឹកគ្រេង តាមទីតាំងផ្សេងៗគ្នា និងតាមរបៀបផ្សេងៗគ្នា ដោយសហព័ន្ធ សហជីព កម្មករ និយោជិត មួយចំនួនបាននាំគ្នាជួបជុំសម្តែងមតិ ហែជាក្បួន ទាមទារលើបញ្ហាមួយចំនួន ដែលពួកគេយល់ថា ជាចំណុចខ្វះខាតសម្រាប់ពួកគេ ហើយមួយចំនួនទៀត ក៏បាននាំគ្នាជួបជុំ រាំលេងកម្សាន្តសប្បាយ ហើយនៅក្នុងឱកាសនោះដែរ គេក៏ឃើញលោកស្រី រ៉ូណា ស្មីត (Rhona Smith) អ្នករាយការណ៍ពិសេសរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានចូលរួមផងដែរ។

នៅក្នុងទិវាពលកម្មអន្តរជាតិនេះ លោកស្រី Rhona Smith បានចូលរួមចំនួន២កន្លែងផ្សេងគ្នា គឺទីមួយ នៅចំណុចមុខក្រុមប្រឹក្សាអភិវឌ្ឍន៍កម្ពុជា (CDC) ដែលនៅទីនោះ ដឹកនាំរៀបចំដោយសហភាពការងារកម្ពុជា របស់លោក អាត់ ធន់ និងទីពីរ នៅទីលានប្រជាធិបតេយ្យ (ខណ្ឌឫស្សីកែវ) ដែលនៅទីនោះ រៀបចំដោយសហភាពសហជីពកម្ពុជា របស់លោក រ៉ុង ឈុន និងមានការចូលរួមពី អង្គការ សមាគម មួយចំនួនទៀត។

លោកស្រី Rhona Smith បានថ្លែងនៅក្នុងឱកាសនោះថា នេះជារឿងមួយល្អ ដែលកម្មករ សហជីព បាននាំគ្នាប្រារព្ធទិវាពលកម្មអន្តរជាតិនេះ ដែលជាការចូលរួមក្នុងវិស័យកម្មករនៅក្នុងប្រទេសកម្ពុជា។ លោកស្រីបន្តថា ទិវាពលកម្មអន្តរជាតិជារឿងមួយសំខាន់ណាស់ ដែលបានរៀបចំឡើងនៅពេលនេះ។ គ្រប់កម្មករ និយោជកទាំងអស់មានសិទ្ធិចូលរួមឲ្យបានត្រឹមត្រូវនៅក្នុងវិស័យការងារ ហើយគ្រប់កម្មករទាំងអស់ ត្រូវបានទទួលប្រាក់បៀវត្សត្រឹមត្រូវតាមការងាររបស់ខ្លួន។ ជាមួយគ្នានោះ គ្រប់កម្មករទាំងអស់ ក៏មានសិទ្ធិចូលរួមនៅក្នុងការចរចាជាមួយនិយោជក អំពីប្រាក់បៀវត្សសមរម្យ។

សូមរំលឹកថា នៅក្នុងទិវាពលកម្មអន្តរជាតិ ០១ ខែឧសភា ខួបលើកទី១៣៣ នេះ សហភាពការងារកម្ពុជា បានប្រារព្ធឡើងក្រោមប្រធានបទ លើកកម្ពស់លក្ខខណ្ឌ និងប្រាក់ឈ្នួលសមរម្យ សម្រាប់កម្មករនិយោជិតគ្រប់វិស័យ ដោយមានការចូលរួមពី សហព័ន្ធ សហជីព សមាគម ចំនួន០៨ មកពីវិស័យកាត់ដេរ ទេសចរណ៍ សំណង់ ឧស្សាហកម្ម កសិករ កសិកម្ម ដឹកជញ្ជូន និងសេដ្ឋកិច្ចក្រៅប្រព័ន្ធ រួមទាំងអង្គដៃគូជាតិ អន្តរជាតិ យ៉ាងច្រើន។ ដែលកម្មវិធីនេះ បានចាប់ផ្តើមជួបជុំគ្នា ចាប់ពីម៉ោង៧ព្រឹក ដល់១០កន្លះព្រឹក ដោយមានការលើកបដា និងហែក្បូន នៅមុខសួនច្បារក្រុមប្រឹក្សាអភិវឌ្ឍន៍កម្ពុជា និងបានស្នើសុំរាជរដ្ឋាភិបាលកម្ពុជា ជួយដោះស្រាយបញ្ហាចំនួន ២០ចំណុច ដែលមានបញ្ហាប្រាក់ឈ្នួលអប្បបរមា, សេវាកម្មរបបសន្តិសុខសង្គម, សុវត្ថិភាពនៅកន្លែងការងារ, ទម្លាក់ចោលបណ្តឹងទាំងអស់ប្រឆាំងថ្នាក់ដឹកនាំសហជីព និងកម្មករនិយោជិត, បញ្ឈប់ការប្រើប្រាស់កិច្ចសន្យាការងារខ្លីៗ, បង្កើតតុលាការការងារ និងចាត់វិធានការឲ្យបានតឹងរ៉ឹងចំពោះក្រុមហ៊ុន និងមន្ត្រីខិលខូចឃុបឃិតគ្នាធ្វើអំពើទុច្ចរិតជាច្រើនមកលើកម្មករជាដើម។

ចំណែកនៅទីលានប្រជាធិបតេយ្យ (ខណ្ឌឫស្សីកែវ) ដែលរៀបចំដោយសហភាពសហជីពកម្ពុជា របស់លោក រ៉ុង ឈុន នោះ ក្រោមប្រធានបទ “ស្ថានភាពការងារនៅកម្ពុជា” ហើយនៅទីនោះ វាគ្មិនដែលបានឡើងថ្លែងចំណាប់អារម្មណ៍សុទ្ធតែបានលើកឡើងពីបញ្ហាមួយចំនួន ដែលពួកគេអះអាងថា ជាតម្រូវការចាំបាច់របស់អង្គការ សមាគម និងកម្មករ និយោជិតនៅប្រទេសកម្ពុជា៕