នាយក​អង្គការ (DTRA) មក​កម្ពុជា​ស្វែងយល់​ពី វិស័យ​កសិកម្ម និង​អនុវិស័យ​ផលិតកម្ម​សត្វ និង​សុខភាព​សត្វ ដែល DTRA​កំពុង​ជួយ​លើ​អនុ​វិស័យនេះ

ភ្នំពេញ​ ៖ លោក​បណ្ឌិត ROBERT POPE នាយក​អង្គការ Defense Threat Reduction Agency (DTRA) បាន​ថ្លែង​ថា ឡោក​បំណង ដែល លោក​មកកាន់​កម្ពុជា គឺ ស្វែងយល់​ពី​ការ​រីកចម្រើន​របស់​ប្រទេស​កម្ពុជា និង​វិស័យ​កសិកម្ម ដោយឡែក​អនុវិស័យ​ផលិតកម្ម​សត្វ និង​សុខភាព​សត្វ ដែល DTRA កំពុង​ជួយ​លើ​អនុ​វិស័យនេះ​។

ការ​ថ្លែង​បែបនេះ​ធ្វើឡើង នៅក្នុង​ជំនួប​ជាមួយ​លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់​និង​នេសាទ នៅ​ទីស្តីការ​ក្រសួង​នា​រសៀល​ថ្ងៃ​អង្គារ ១១​រោច ខែចេត្រ ឆ្នាំកុរ ឯកស័ក ព.ស ២៥៦៣ ត្រូវ​នឹង​ថ្ងៃទី​៣០ ខែមេសា ឆ្នាំ​២០១៩។



មាន​មតិ​ស្វាគមន៍​លោក រដ្ឋមន្ត្រី ក្នុងនាម​ឲ្យ​រាជរដ្ឋាភិបាល និង​ក្នុងនាម​ក្រសួងកសិកម្ម រុក្ខាប្រមាញ់ និង​នេសាទ​សូម​ថ្លែងអំណរគុណ​យ៉ាង​ជ្រាលជ្រៅ​ជូន​ចំពោះ​រដ្ឋាភិបាល​សហរដ្ឋ​អាមេរិក ដែល​បាននឹងកំពុង​ជួយ​គាំទ្រ​ក្នុង​ដំណើរការ​អភិវឌ្ឍ​ប្រទេស​កម្ពុជា ពិសេស​បាន​ជួយឧបត្ថម្ភ​ទាំង​បច្ចេកទេស និង​ថវិកា​ដើម្បី​អនុវត្ត​គម្រោង​នានា​ដែល​ពាក់ព័ន្ធ​វិស័យ​កសិកម្ម ជាក់ស្តែង​អង្គការ DTRA កំពុង​សហការ​អនុវត្ត​គម្រោង​មួយចំនួន​ជាមួយ​អគ្គនាយកដ្ឋាន​ផលិតកម្ម​សត្វ និង​សុខភាព​សត្វ ដូចជា​ការ​ការពារ​សុខ​ភាព​សត្វ និង​ជំងឺឆ្លង​សត្វ​។

ទាក់ទង​នឹង​ជំងឺប៉េស្ត​ជ្រូក​អា​ហ្វ្រី​ក លោក រដ្ឋមន្ត្រី​បាន​ជម្រាប​ជូន​ភ្ញៀវ​ថា ដើម្បី​ជៀសវាង​ផល​ប៉ះពាល់​ដែល​បណ្តាល​មក​ពី​ជំងឺ​នេះ​មក​លើ​ផលិតកម្ម​ជ្រូក​នៅ​កម្ពុជា ក្រសួង​បាន​ផ្អាក​ការអនុញ្ញាត​ឲ្យ​នាំ​ជ្រូក​ចូល​ពី​ប្រទេស​ដែល​កំពុង​កើត​ជំងឺ​នេះ​។ ព្រម​ជាមួយគ្នា​នេះ ក្រសួង​បាន​ជំរុញ និង​លើកទឹកចិត្ត​ឲ្យ​ក្រុមហ៊ុន​ ឬ​ កសិករ​ងាក​មក​ចិញ្ចឹម​ជ្រូក​ក្នុងស្រុក​ដើម្បី​បំពេញតម្រូវការ​ទីផ្សារ​។

លោក​សង្ឃឹមថា​ ប្រទេស​ជា​ដៃគូ និង​ដៃគូ​អភិវឌ្ឍ​នានា​នឹង​បន្ត​រួមគ្នា​ទប់ស្កាត់​បញ្ហា​ជំងឺ​នេះ​ឲ្យ​ខាងតែបាន​ទាំង​ក្នុងពេល​បច្ចុប្បន្ន ក៏ដូចជា​ពេល​អនាគត​។



លោក​បណ្ឌិត ROBERT POPE បាន​វាយតម្លៃ​ខ្ពស់​ចំពោះ​សមិទ្ធផល​ដែល​ក្រសួង ក៏ដូចជា​អគ្គនាយកដ្ឋាន​លិតកម្ម​សត្វ និង​សុខភាព​សត្វ​សម្រេច​បាន​ក្នុង​រយៈពេល​កន្លងមក ជាពិសេស​បាន​ដាក់​ចេញ​នូវ​វិធានការ​ទប់ស្កាត់​ជំងឺ​ប៉េស្ត​ជ្រូក​អាហ្វ្រិក​បាន​ទាន់​ពេល​វេលា និង​មាន​ប្រសិទ្ធភាព​។ ទន្ទឹម​នេះ លោក​បាន​ថ្លែងអំណរគុណ​ដល់​អគ្គនាយកដ្ឋាន​ផលិតកម្ម​សត្វ និង​សុខភាព​សត្វ​ដែល​បាន​ផ្តល់​កិច្ចសហការ​យ៉ាង​ល្អ​ប្រសើរ​ជាមួយ​ក្រុមការងារ​នៃ​អង្គការ DTRA​។ លោក​បាន​បន្លែ​ម​ថា នៅមាន​ការងារ​ជាច្រើន​ដែល​ត្រូវ​អនុវត្ត​រួមគ្នា​ដើម្បី​ធ្វើ​ឲ្យ​សម្រេច​បាន​នូវ​គោលបំណង​សំខាន់​គឺ​ទី​១ អភិវឌ្ឍ​ធនធានមនុស្ស ទី​២ ការងារ​ស្រាវជ្រាវ និង​ទី​៣ ការ​ធ្វើ​ឲ្យ​ប្រសើរ និង​លើកកម្ពស់​សមត្ថភាព​មន្ទីរ​ពិសោធន៍ និង​ទី​៤ ការងារ​តាមដាន​ជំងឺឆ្លង​សត្វ​ក្នុង​តំបន់ ដែល​កម្មវត្ថុ​ទាំងអស់​នេះ ​គឺ​ស្ថិត​ក្នុង​ផែនការ​នៃ​គម្រោង​ដែល​ត្រូវ​ជួ​យមក​កម្ពុជា​សម្រាប់​រយៈ​ពេល ០៦​ឆ្នាំ (២០១៩-២០២៥)​។

លោក រដ្ឋមន្ត្រី​បាន​ថ្លែងអំណរគុណ​ដល់​អង្គកា​រ DTRA និង​សង្ឃឹម​និង​ជឿជាក់​ថា ​អង្គការ​នេះ​នឹង​បន្ត​ជួយ​គាំទ្រ​ដល់​អគ្គនាយកដ្ឋាន​ផលិតកម្ម​សត្វ និង​សុខភាព​សត្វ​ក្នុង​ទប់ស្កាត់​ជំងឺឆ្លង​សត្វ​គ្រប់​ប្រភេទ​ដើម្បី​ជួយ​លើកកម្ពស់​ផលិតកម្ម​សត្វ និង​សុខភាព​សត្វ​នៅ​កម្ពុជា​ឲ្យ​បាន​កាន់តែ​ល្អប្រសើរ៕

Source: Kampuchea Thmey Daily