ភ្នំពេញ ៖ សមាគមអ្នកសារព័ត៌មានកម្ពុជា-ចិន ត្រូវបានសម្ពោធបើកជាផ្លូវការនៅសណ្ឋាគារសូហ្វីតែលភូគីត្រាភ្នំពេញ កាលពីព្រលប់ថ្ងៃទី៦ ខែឧសភានេះ ក្រោមអធិបតីភាពលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងដោយមានការអញ្ជើញចូលរួមពីលោក ផៃ ស៊ីផាន រដ្ឋមន្ត្រីប្រតិភូមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាល និងលោកស្រី Zuo Wenxing ទីប្រឹក្សានយោបាយ នៃស្ថានទូតចិន ប្រចាំកម្ពុជា។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍គាំទ្រ ចំពោះការបង្កើតសមាគមអ្នកសារព័ត៌មានកម្ពុជា-ចិននាពេលនេះ។ លោករដ្ឋមន្ត្រីសង្ឃឹមថា សមាគមអ្នកសារព័ត៌មានកម្ពុជា-ចិន នឹងទទួលបានជោគជ័យ ហើយធ្វើជាស្ពានគ្រឹះដ៏រឹងមាំមួយសម្រាប់ភ្ជាប់ទំនាក់ទំនងរវាងប្រជាជនប្រទេសទាំងពីរកម្ពុជា-ចិន។ លោករដ្ឋមន្ត្រីបានផ្ដាំផ្ញើថា នៅពេលណាយើងមិនទាន់មានស្ពានបេតុងទេ យើងអាចធ្វើស្ពានឫស្សីមួយក៏បាន។ សង្ឃឹមថា សមាគមអ្នកសារព័ត៌មានកម្ពុជា-ចិន ធ្វើជាស្ពានបេតុងគ្រឹះដ៏រឹងមាំមួយសម្រាប់ធ្វើឱ្យកាន់តែប្រសើរឡើងទំនាក់ទំនងកម្ពុជា-ចិន។
លោកស្រី Zuo Wenxing ទីប្រឹក្សានយោបាយនៃស្ថានទូតចិនប្រចាំកម្ពុជា ថ្លែងថា “ការបង្កើតសមាគមអ្នកសារព័ត៌មាន កម្ពុជា-ចិននេះ បានបញ្ចប់នូវប្រវត្តិសាស្ត្រធ្វើការដាច់ដោយឡែកពីគ្នារវាងប្រព័ន្ធផ្សព្វផ្សាយចិន និងកម្ពុជា ហើយបានលើកកម្ពស់ការផ្លាស់ប្តូរគ្នាកាន់តែស៊ីជម្រៅ។
ការធ្វើសមាហរណកម្មប្រព័ន្ធផ្សព្វផ្សាយភាសាទាំងពីរ នឹងក្លាយទៅជាបង្អួច សម្រាប់ការយល់ដឹងថ្មីអំពីមិត្តភាព រវាងប្រជាជននៃប្រទេសទាំងពីរ និងក្នុងតំបន់ទាំងមូល។ លោកស្រីរំពឹងថា សមាគមនេះនឹងដើរតួយ៉ាងសំខាន់ក្នុងការបញ្ជូនព័ត៌មានវិជ្ជមាន និងការរួមដៃគ្នាប្រឆាំងនឹងព័ត៌មានមិនពិត ដែលធ្វើឲ្យប៉ះពាល់ដល់ទំនាក់ទំនងរវាងប្រទេសទាំងពីរ”។ លោកស្រីបញ្ជាក់ថា ប៉ុន្មានឆ្នាំថ្មីៗនេះជាមួយនឹងការអនុវត្តគំនិតផ្តួចផ្តើម“ខ្សែក្រវាត់មួយ-ផ្លូវមួយ” និង“យុទ្ធសាស្ត្រចតុកោណរបស់រាជដ្ឋាភិបាលកម្ពុជា” សហគ្រាសចិន និងប្រជាពលរដ្ឋចិនកាន់តែច្រើន បានមកដល់ប្រទេសកម្ពុជា ដើម្បីវិនិយោគ ការធ្វើពាណិជ្ជកម្ម ឬទេសចរណ៍ រួមចំណែកលើកកម្ពស់ការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា ដែលតម្រូវការធនធានខាងព័ត៌មានកាន់តែសំបូរបែប។ លោកស្រីសង្ឃឹមថា ប្រព័ន្ធផ្សព្វផ្សាយនៅកម្ពុជា រួមទាំងសមាជិកនៃអ្នកសារព័ត៌មានកម្ពុជា-ចិន និងរាយការណ៍កាន់តែច្រើនអំពីសំឡេងល្អ និងសមិទ្ធផលល្អៗ នៃប្រទេសចិននិងកម្ពុជា និងបង្កើតបរិយាកាសសាធារណៈមតិល្អ សម្រាប់ទំនាក់ទំនងរវាងប្រទេសទាំងពីរ។
លោក ផៃស៊ីផាន ក៏បានគាំទ្រចំពោះការបង្កើតសមាគមអ្នកសារព័ត៌មានកម្ពុជា-ចិននេះ ព្រោះសមាគមនេះនឹងផ្សព្វផ្សាយព័ត៌មានដ៏សំខាន់បម្រើឲ្យទំនាក់ទំនង នៃប្រទេសកម្ពុជា-ចិន ខណៈវិស័យមានដើរតួនាទីសំខាន់ ចូលរួមចំណែកថែរក្សាសន្តិភាព ស្ថេរភាព និងការអភិវឌ្ឍប្រកបដោយចីរភាព។
តាមរបាយការណ៍លោក សយ សុភាព សហប្រធាន និងជាស្ថាបនិកនៃសមាគមអ្នកសារព័ត៌មានកម្ពុជា-ចិន បានអះអាងថា សមាគមលោកនឹងចូលរួមអនុវត្តគោរពតាមគោលនយោបាយប្រទេសទាំងពីរឲ្យបានល្អ តាមរយៈការផ្សព្វផ្សាយព័ត៌មានពិត និងប្រកបដោយវិជ្ជាជីវៈ ទាក់ទងអំពីការវិនិយោគរបស់ប្រទេសមហាមិត្តចិននៅកម្ពុជា ក៏ដូចជាការនាំចេញនូវផលិតផលគ្រប់ផ្នែកទាំងអស់របស់កម្ពុជា ទៅកាន់ប្រទេសចិន ឱ្យស្របតាមគោលនយោបាយរបស់រាជរដ្ឋាភិបាលកម្ពុជា និងសាធារណរដ្ឋប្រជាមានិតចិន ដែលប្រទេសទាំងពីរ បានពូនជ្រុំកសាងទំនាក់ទំនង និងកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ និងស្អិតរមួតចាប់តាំងពីមេដឹកនាំជំនាន់មុនរហូតមកដល់ពេលបច្ចុប្បន្ន។
សូមរំលឹកថា សមាគមអ្នកសារព័ត៌មានកម្ពុជា-ចិន ត្រូវបានទទួលស្គាល់ជាផ្លូវការពី រដ្ឋមន្ត្រីក្រសួងព័ត៌មាន ខៀវ កាញារីទ្ធ កាលពីថ្ងៃទី៣០ ខែមករា ឆ្នាំ២០១៩៕
Source: Kampuchea Thmey Daily
0 Comments