បាត់ដំបង ៖ យុវជនម្នាក់ ដែលប្រភពជាច្រើន បានដាក់ការសង្ស័យថា អាចមានផ្ទុកសារធាតុអាល់កុលផងនោះ បានស្លាប់ភ្លាមៗ យ៉ាងអាណោចអាធ័ម បន្ទាប់ពីបានបើកបរម៉ូតូរេពេញផ្លូវ រួចក៏ជ្រុលទៅបុកនឹងរថយន្ត។
លោកអធិការរង ឌឿន សម្បត្តិ បានអះអាងថា ករណីនេះ បានកើតឡើងកាលពីថ្ងៃទី១ ខែឧសភា ឆ្នាំ២០១៩ វេលា ម៉ោង ១០និង៤៥ នាទីយប់ ស្ថិតនៅក្រុមទី៨ ភូមិពោធិ៍២ ឃុំគារ ស្រុកមោងឫស្សី លើកំណាត់ផ្លូវជាតិលេខ៥ ចន្លោះបង្គោល គីឡូម៉ែត្រ លេខ ២៤៨- ២៤៩ រវាងម៉ូតូម៉ាកហុងដាឌ្រីម ធុនC125 ពាក់ស្លាកលេខ បាត់ដំបង1AF.7880 ជាមួយនឹងរថយន្តមិនស្គាល់អត្តសញ្ញាណ។
លោកអធិការរងបានបន្តថា នៅមុនពេលកើតហេតុ គឺភាគីម៉ូតូដែលបើកបរដោយឈ្មោះ ធី ឆេង ភេទ ប្រុស អាយុ២៥ ឆ្នាំ ស្នាក់នៅភូមិកូនខ្លុង ឃុំព្រៃតូច ស្រុកមោងឫស្សី បានធ្វើដំណើរមកពីលិច ទៅកើត ក្នុងល្បឿនលឿន និងមានការរេចង្កូតផង លុះមកដល់ចំណុចកើតហេតុខាងលើ បានបុកជាមួយនឹងរថយន្តមួយគ្រឿងមិនដឹងម៉ាកធុន(បើករត់គេចខ្លួនបាត់) ដែលកំពុងបើកបរ ច្រាសទិសគ្នា បណ្ដាលអោយយុវជនរូបនោះស្លាប់នៅនឹងកន្លែងតែម្តង។
បច្ចុប្បន្នសពត្រូវបានសមត្ថកិច្ចប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណីហើយ ចំណែករថយន្តដែលបើកគេចខ្លួនក៏សមត្ថកិច្ចកំពុងស្រាវជ្រាវដែរ៕
Source: Kampuchea Thmey Daily
0 Comments