កណ្ដាល ៖ សាកសពបុរសមិនស្គាល់អត្តសញ្ញាណម្នាក់ត្រូវបានគេប្រទះឃើញស្លាប់អណ្តែតទឹកហើមស្អុយទៅហើយ កាលពីព្រឹកថ្ងៃទី០២ ខែឧសភា ឆ្នាំ ២០១៩ នៅក្នុងបឹងសំពៅមាស ស្ថិតក្នុងភូមិ ឃ្លាំងស្បែក ឃុំកំពង់លួង ស្រុកពញាឮ ខេត្តកណ្តាល។
សមត្ថកិច្ចបានឲ្យដឹងថា កាលពីវេលាម៉ោងប្រហែល៨ព្រឹក ថ្ងៃទី២ ខែឧសភា ឆ្នាំ២០១៩ មានប្រជាពលរដ្ឋម្នាក់ បានមករាយការណ៍ប្រាប់នគរបាលមូលដ្ឋានថា បានប្រទះឃើញសា
កសពម្នាក់ស្លាប់អណ្តែតទឹក ហើយក៏បាននាំផ្លូវសមត្ថកិច្ចទៅត្រួតពិនិត្យនៅកន្លែងកើតហេតុតែម្តង។លោកវរសេនីយ៍ឯក ដួង តេង អធិការនគរបាលស្រុកពញាឮ បានមានប្រសាសន៍ថា ករណីសាកសពនេះ ក្រោយពីបង្កើតគណៈកម្មការចំរុះទៅត្រួតពិនិត្យបញ្ជាក់ថា ជនរងគ្រោះ(សព)ស្លាប់ដោយលង់ទឹកនៅទីនោះ ព្រោះនៅលើដងខ្លួនសាកសពពុំមានស្នាមរបួសអ្វីឡើយ។
នៅកន្លែងកើតហេតុ សាកសពត្រូវបានគេប្រះឃើញស្លាប់ដោយផ្កាប់មុខ ដោយអង្កុញជង្គង់ ក្នុងឯកសណ្ឋានស្លៀកខោខូវប៊យពណ៌ខៀវជើងវែង និងពាក់អាវដៃវែង ពណ៌ពងជីងចក់។
នៅលើដងខ្លួនសាកសពមានពាក់ពាក់ឡិកាជ័រពណ៌ខ្មៅនៅក្នុងហ៊ោបៅខោខាងក្រោយមានទូរស័ព្ទចំនួន១ គ្រឿង ម៉ាក Nokia ចុចពិល ពណ៌ លឿង មានស៊ីម គ្មានថ្ម នៅហ៊ោបៅខោមុខខាងឆ្វេង មានកញ្ចប់បារីហ្វីននិងដែកកេះចំនួន១ និង ហ៊ោបៅខោខាងស្តាំមានប្រាក់រៀលមួយចំនួន។
ប៉ូលិសនិយាយថា សាកសពនេះនៅមិនទាន់មានសាច់មកទទួលនៅឡើយទេតែត្រូវបានយកទៅឲ្យតាអាចារ្យរៀបចំបូជា(ដុត)ព្រោះសាកសពស្អុយទៅហើយមិនអាចទុកបន្តទៀតបានទេ៕
Source: Kampuchea Thmey Daily
0 Comments