ភ្នំពេញ ៖ បន្ទាប់ពីមានទំនាក់ទំនងស្នេហានិងស្រលាញ់ស្វែងយល់ចិត្តគ្នាមានរយៈពេលច្រើនឆ្នាំមកនោះ ទីបំផុតលោក ប៊ុន រតនា អតីតអ្នកដឹកនាំសម្តែងនៅផលិតកម្មថោន និងអ្នកនាង លីឈី ពិធីការិនីទូរទស្សន៍ថោន បានសម្រេចដឹកដៃគ្នាចូលរោងជ័យហើយ កាលពីថ្ងៃទី០៥ ខែឧសភា ឆ្នាំ២០១៩កន្លងមកនេះ។
ពិធីជប់លៀងមង្គលការរបស់តារាប្រុស-ស្រីមួយគូខាងលើនេះ បានធ្វើឡើងនៅទីតាំងដឺព្រេមៀសែនសុខជិតផ្សាទំនើបអ៊ីអន២ ខណៈដែលអញ្ជើញភ្ញៀវចូលរួមអបអរមង្គលការរបស់ខ្លួនមានចំនួនច្រើន។ មិនតែប៉ុណ្ណោះមង្គលការរបស់លោក ប៊ុន រតនា និងអ្នកនាង លីឈី ក៏ត្រូវបានគេកត់សម្គាល់ឃើញមានសុទ្ធតែតារាសិល្បៈប្រុស-ស្រីល្បីៗនាំគ្នាទៅចូលរួមយ៉ាងច្រើនកុះករផងដែរ។
បើតាមការបញ្ជាក់ឲ្យដឹងពីសាមីខ្លួនអ្នកទាំងពីរលោក ប៊ុន រតនា និងអ្នកនាង លីឈី និយាយថាពួកគេទាំងពីរនាក់បានស្គាល់គ្នាមានរយៈពេលច្រើនឆ្នាំមកហើយ ដោយក្នុងនោះក្រោយពេលស្គាល់គ្នា ក៏ចាប់ផ្តើមមានចិត្តស្រលាញ់គ្នាអំឡុងពេលប្រមាណជា២ឆ្នាំចុងក្រោយនេះតែប៉ុណ្ណោះក៏សម្រេចចិត្តរៀបចំពិធីអាពាហ៍ពិពាហ៍យកគ្នាធ្វើជាប្តី-ប្រពន្ធតែម្តង។
អតីតអ្នកដឹកនាំល្បីឈ្មោះរបស់ផលិតកម្មថោនលោក ប៊ុន រតនា បន្តទៀតថា ដំបូងឡើយរវាងលោកនិងអ្នកនាង លីឈី គឺគ្រាន់តែរាប់អានគ្នាក្នុងនាមមិត្តភាពរួមអាជីពការងារសិល្បៈដូចគ្នាប៉ុណ្ណោះប៉ុន្តែក្រោយពេលមើលឃើញពីចរិតល្អ មានការរួសរាយរាក់ទាក់ ហើយមិនចេះរញ៉េរញ៉ៃនោះ ខ្លួនក៏ចាប់ផ្តើមដាក់ចិត្តលួចស្រលាញ់ភរិយាអ្នកនាង លីឈី តែម្តង។
លោក ប៊ុន រតនាបានបន្ថែមទៀតថា នៅក្នុងពិធីមង្គលការរបស់លោកនិងភរិយាអ្នកនាងលីឈី នេះដែរ ក៏មានការអញ្ជើញភ្ញៀវមិត្តភក្តិសិល្បៈចូលរួមមានចំនួនច្រើន។ ខណៈដែលទីតាំងជប់លៀងមង្គលការមានរហូតទៅដល់២អាគារឯណោះ។ម្យ៉ាងទៀតលោកក៏អរគុណចំពោះវត្តមានរបស់ភ្ញៀវកិត្តិយសដែលបានចូលរួមច្រើនលើសការរំពឹងទុកផងដែរ៕
Source: Kampuchea Thmey Daily
0 Comments