ភ្នំពេញ ៖ រាជរដ្ឋាភិបាលជប៉ុន បានសន្យាថា នឹងបន្តជួយបណ្ដុះបណ្ដាលធនធានគ្រូបង្រៀននៅកម្ពុជាបន្ថែមទៀតដើម្បីបង្កើនសមត្ថភាព និង វិធីសាស្ត្រអប់រំសិស្សានុសិស្ស អោយទទួលបានចំណេះដឹងកាន់តែទូលំទូលាយបន្ថែមទៀត។
លោក ហូរីណូអ៊ុជិ ហ៊ីដេស៊ីសា Horinouchi Hedehisa ឯកអគ្គរាជទូតជប៉ុនប្រចាំកម្ពុជាបានឲ្យដឹងថា រាជរដ្ឋាភិបាលជប៉ុន នឹងបញ្ជូនគ្រូឧទ្ទេសជំនាញពីជប៉ុន មកកម្ពុជា ដើម្បីបណ្ដុះបណ្ដាល គ្រូគរុសិស្សនៅកម្ពុជា ឲ្យទទួលបានជោគជ័យ ក្នុងការអប់រំសិស្សក្នុងយុគសម័យទំនើប និងវិធីសាស្ត្រក្នុងការបង្ហាត់បង្រៀនសិស្សតាមបែបបច្ចេកវិទ្យាឌីជីថល ដើម្បីឲ្យសិស្សានុសិស្សទាំងអស់ ឆាប់ចេះ និងឆាប់ចាប់បាន នូវការពន្យល់ណែនាំរបស់គ្រូគរុសិស្ស លើមុខវិជ្ជាអប់រំ ដូចជាភាសាខ្មែរ គណិតវិទ្យា និងវិទ្យាសាស្ត្រសង្គមជាដើម។
ថ្លែងប្រាប់អ្នកសារព័ត៌មាន ក្រោយបញ្ចប់ពិធីបើកការដ្ឋានសាងសង់វិទ្យាស្ថានគរុកោសល្យរាជធានីភ្នំពេញ ក្រោមជំនួយឥតសំណងពីសំណាក់រាជរដ្ឋាភិបាលជប៉ុន កាលពីថ្ងៃទី៧ឧសភានៅវិទ្យាស្ថានគរុកោសល្យរាជធានីភ្នំពេញ លោក ឯកអគ្គរាជទូតជប៉ុនបានបន្តទៀតថា ក្រៅពីការបញ្ជូនគ្រូឧទ្ទេសជំនាញពីជប៉ុន មកកម្ពុជា រាជរដ្ឋាភិបាលជប៉ុន ក៏មានគ្រោងរៀបចំបញ្ជូនគ្រូឧទ្ទេសជំនាញពីកម្ពុជា ទៅសិក្សានៅប្រទេសជប៉ុនផ្ទាល់តែម្ដង ដើម្បីពង្រឹងសមត្ថភាពគ្រូឧទ្ទេសកម្ពុជា លើការអប់រំគរុសិស្សនេះ ឲ្យទទួលបានជោគជ័យ។
លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា បានកោតសរសើរ និងថ្លែងអំណរគុណដល់រាជរដ្ឋាភិបាលជប៉ុន ដែលតែងតែផ្ដល់ជំនួយឥតសំណងជាបន្តបន្ទាប់ដល់រាជរដ្ឋាភិបាលកម្ពុជា ក្នុងការអភិវឌ្ឍវិស័យអប់រំ និងរួមចំណែកក្នុងការគាំទ្រកែលម្អគុណភាពគ្រូបង្រៀននៅកម្ពុជា ព្រមទាំងចូលរួមក្នុងការអភិវឌ្ឍគម្រោងផ្សេងៗ។
លោករដ្ឋមន្ត្រីបានចាត់ទុកការកំណែទម្រង់ការបណ្ដុះបណ្ដាលគ្រូបង្រៀនគឺជាចំណុចអាទិភាពរបស់ក្រសួង។ ជាក់ស្តែងការបើកការដ្ឋានសាងសង់វិទ្យាស្ថានគរុកោសល្យរាជធានី ក្រោមជំនួយឥតសំណងពីសំណាក់រាជរដ្ឋាភិបាលជប៉ុននេះ គឺដើម្បីពង្រឹងគុណភាពគ្រូបង្រៀន ដែលជាការចូលរួមចំណែកដ៏សំខាន់ក្នុងយុទ្ធសាស្ត្រកំណែទម្រង់វិស័យអប់រំ។
ជាមួយគ្នានេះដែរលោករដ្ឋមន្ត្រីបានធ្វើការអំពាវនាវដល់ គរុសិស្សទាំងអស់ ត្រូវខិតខំប្រឹងប្រែងរៀនសូត្រជំនាញគ្រូបង្រៀននេះ បន្ថែមទៀត ដើម្បីពង្រឹងសមត្ថភាពផ្ទាល់ខ្លួនផង និងដើម្បីចូលរួមចំណែកជាមួយរាជរដ្ឋាភិបាល ក្នុងយុទ្ធសាស្ត្រកំណែទម្រង់វិស័យអប់រំនៅកម្ពុជា។
សូមបញ្ជាក់ថា រាជរដ្ឋាភិបាលជប៉ុន បានចាត់ទុកប្រទេសកម្ពុជា គឺជាប្រទេសគោលដៅដ៏សំខាន់មួយ ក្នុងការអភិវឌ្ឍវិស័យអប់រំ តាមរយៈការផ្ដល់ជំនួយថវិកា និងការសាងសង់ផ្សេងៗ ដើម្បីផ្ដល់ភាពងាយស្រួលដល់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្សគ្រូបង្រៀន ឲ្យកាន់តែមានភាពសំបូរបែប និង កាន់តែមានភាពរីកចម្រើន ដើម្បីឈានទៅប្រកួតប្រជែងលើឆាកអន្តរជាតិ៕
Source: Kampuchea Thmey Daily
0 Comments