បន្ទាប់ពីរកគ្រាប់បាល់បន្ថែម និងជួយក្រុមឲ្យទទួលបានជ័យជម្នះទល់នឹងក្រសួងការពារជាតិ កាលពីសប្តាហ៍ទី៥កន្លងទៅ ក្នុងពានរង្វាន់លីគកំពូលកម្ពុជា (Metfone Cambodian League 2019) ខ្សែប្រយុទ្ធសញ្ជាតិប្រេស៊ីល Luiz Eduardo Purcino (Dudu) បានបង្ហាញចំណុចវិជ្ជមាន ព្រមទាំងរកគ្រាប់បាល់បន្ថែមនិងការជឿជាក់ថា បឹងកេត នឹងអាចមានលទ្ធភាពឈ្នះក្រុមដទៃផ្សេងទៀត មិនថាឡើយក្រុមកំពូល។
កីឡាករខាងលើបានបន្ថែម «តំបន់ការពាររបស់យើងធ្វើការយ៉ាងល្អកាលពីប្រកួតមុន វាជាចំណុចប្រសើរឡើងរបស់យើង ហើយសូម្បីតែការលេងជាក្រុមក៏មានការយល់ចិត្តគ្នា។ ប្រសិនបើយើងនៅតែរក្សានូវការលេងដ៏ល្អ និងស៊ីចង្វាក់គ្នានេះបាន មានន័យថាយើងអាចយកឈ្នះលើក្រុមដទៃ មិនថាឡើយក្រុមកំពូលតារាង»។ កីឡាករវ័យ៣២ឆ្នាំរូបនេះធ្លាប់មានបទពិសោធន៍ប្រកបអាជីពច្រើនក្លិបនៅប្រទេសថៃ។
ខ្សែប្រយុទ្ធដដែលក៏បាននិយាយជុំវិញការរកគ្រាប់បាល់របស់ខ្លួន ៣គ្រាប់ក្នុង ២ប្រកួតចុងក្រោយថា « វាគឺជាគ្រាប់បាល់ដ៏ល្អសម្រាប់ខ្ញុំនៅកម្ពុជា ពីព្រោះថា ការប្រកួតគឺតានតឹង ហើយយើងត្រូវការឈ្នះដើម្បីពង្រឹងស្ថានភាពរបស់យើងលើតារាងពិន្ទុ។ ដូចនេះខ្ញុំព្យាយាមយ៉ាងខ្លាំង ដើម្បីទម្លុះសំណាញ់ទី ហើយគ្រាប់បាល់ទាំងនោះ ក៏អរគុណទៅមិត្តរួមក្រុមផងដែរ ដែលពួកគេបានបញ្ជូនយ៉ាងល្អឲ្យខ្ញុំទាត់បញ្ចូល»។
កីឡាករ Dudu ធ្លាប់លេងនៅក្លិប A.A. Caldense ចាប់ពីឆ្នាំ២០០៦ ដល់២០០៩ ខណៈនៅឆ្នាំ២០១០-២០១១ រូបគេបានសម្រេចទៅលេងនៅក្លិប Buriram United ប្រទេសថៃ ហើយគិតពីពេលនោះមករូបគេបន្តអាជីពនៅប្រទេសថៃ ជាបន្តបន្ទាប់គឺឆ្នាំ២០១១ដដែលបានបានទៅលេងនៅក្លិប Sriracha ហើយឆ្នាំ២០១២ ចេញទៅចូលរួមជាមួយក្រុម Osatspa Saraburi ឆ្នាំ២០១៣ ចូលរួមជាមួយក្រុម Phuket នៅឆ្នាំ២០១៤ ចូលរួមក្រុម Police FC ឆ្នាំ២០១៥-២០១៦ ទៅចូលរួមក្រុម Phan Thong United ឆ្នាំ២០១៧រូបគេបានលេងនៅក្លិប Sahab ក្នុងប្រទេសហ្សកដានី និងនៅក្លិប MISC-MIFA នៅម៉ាឡេស៊ី មុនមកដល់ក្លិបបឹងកេត របស់កម្ពុជា នៅឆ្នាំ២០១៩នេះ។
គួរឲ្យដឹងផងដែរថាការប្រកួតសប្តាហ៍ទី៦ នៃលីគកំពូលរបស់កម្ពុជា ក្រុមបឹងកេត ត្រូវប្រកួតទល់នឹងយុវជនសាលាបាល់ទាត់ជាតិ នៅវេលាម៉ោង៣និង៣០នាទីរសៀល ថ្ងៃអាទិត្យ ទី៥ខែឧសភា ឆ្នាំ២០១៩ នៅទីលានសាលាបាល់ទាត់ជាតិបាទី ខេត្តតាកែវ៕
Source: Kampuchea Thmey Daily
0 Comments