ភ្នំពេញ ៖ នាព្រឹកថ្ងៃសុក្រ ១៤រោច ខែចេត្រ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី៣ ខែឧសភា ឆ្នាំ២០១៩ លោក អនុរដ្ឋលេខាធិការ ក្រសួងធនធានទឹក និងឧតុនិយម ចាន់ ស៊ីណាត បាន អនុញ្ញាតឲ្យមន្ត្រីជាន់ខ្ពស់របស់ធនាគារពិភពលោក (World Bank, WB) ទទួលបន្ទុកការងារអនុវត្តលើវិស័យទឹកអន្តរជាតិ សម្រាប់ភូមិភាគអាស៊ី និងប៉ាស៊ី ហ្វិក លោក Takuya Kamata និងសហការីបានចូលជួប និងពិភាក្សា លើការងារកិច្ចសហប្រតិបត្តិការក្នុងក្របខណ្ឌទូទាំងប្រទេសកម្ពុជា និងតំបន់លើការគ្រប់គ្រងវិស័យធនធានទឹក។
ក្រសួងបន្តថា ក្នុងពេលកន្លងទៅ WB បានជួយក្រសួងធនធានទឹក និងឧតុនិយម លើការងារគ្រប់គ្រងវិស័យធនធានទឹកតាមរយៈគំរោងជាច្រើន។ ដែលមកដល់ពេលបច្ចុប្បន្ននេះរួមមានគម្រោងដូចតទៅ ៖១- គម្រោងកសាងផែនការយុទ្ធសាស្ត្ររយៈពេលវែងលើវិស័យធនធានទឹក។២- គម្រោងផលិតទឹកសម្រាប់កសិកម្ម។ ៣- គម្រោងគ្រប់គ្រងវិស័យទឹកចម្រុះក្នុងក្របខណ្ឌអាងទន្លេមេគង្គ (Integrated Water Resources Management, IWRM) ដែលមានCNMCជាអ្នកសហការអនុវត្តន៍ជាមួយនឹងប្រទេសជាសមាជិកពីរទៀតរបស់គណៈកម្មាធិការទន្លេមេគង្គ (Mekong River Commission, MRC)។៤- គម្រោងប្រព័ន្ធធារាសាស្ត្រ និងប្រព័ន្ធដោះទឹកតាមព្រំដែនរវាងប្រទេសកម្ពុជា និងប្រទេសវៀតណាម។
លោក Kamata បានមានប្រសាសន៍ កោតសរសើរ ដល់ លឹម គានហោ រដ្ឋមន្ត្រីក្រសួងធនធានទឹក និងឧតុនិយម ដែលបានសហការល្អជាមួយ និងធនាគារអភិវឌ្ឍន៍អាស៊ី ADB និងក្រសួងសេដ្ឋកិច្ច និងហិរញ្ញវត្ថុ (MEF) ធ្វើការបង្កើតនៅ មជ្ឈមណ្ឌលជាតិទិន្នន័យទឹក ដែលមានសារៈសំខាន់ និងប្រយោជន៍ធំធេងណាស់សម្រាប់ព្រះរាជាណាចក្រកម្ពុជា សម្រាប់បណ្តាប្រទេសក្នុងតំបន់ និងពិភពលោកទាំងមូល។ លោក Kamata បានបន្តទៀតថា មជ្ឈមណ្ឌលនេះជាខឿនទិន្នន័យដ៏ល្អបំផុតសម្រាប់គ្រប់គ្រងទឹក ប្រើប្រាស់ទឹក និងបញ្ជាទឹក ហើយលោកបានបញ្ជាក់យ៉ាងច្បាស់ទៀតថា ដល់ពេលសមស្របបំផុតហើយ ដែល WB ត្រូវតែជួយក្រសួងធនធានទឹក និងឧតុនិយមនៃព្រះរាជាណាចក្រកម្ពុជាលើមជ្ឈមណ្ឌលខាងលើ និងលើអនុវិស័យដទៃទៀតជាច្រើនក្នុងវិស័យធនធានទឹកទាំងមូល។
លោក អនុរដ្ឋលេខាធិការ បានស្នើឲ្យ WB ធ្វើការបញ្ជូនក្រុមបេសកកម្មមួយទៀតឲ្យបានឆាប់មុនពាក់កណ្តាលខែមិថុនាឆ្នាំនេះ ដើម្បីធ្វើការវាយតម្លៃបញ្ចប់លើផ្នែកដែល WB ត្រូវជួយដល់មជ្ឈមណ្ឌលខាងលើ។ លោក Kamata បានឯកភាព និងយល់ព្រម តាមសំណើ ហើយលោកបានបញ្ជាក់ច្បាស់ទៀតថា WB មិនត្រឹមធ្វើការវាយតម្លៃលើតម្រូវការសម្រាប់តែមជ្ឈមណ្ឌលតែមួយនោះទេ តែWB ក៏ត្រូវចាប់ផ្តើមឲ្យខានតែបានធ្វើការសិក្សាលើតម្រូវការទាំងអស់នៃអនុវិស័យនានាក្នុងវិស័យធនធានទឹកទាំងមូល៕
Source: Kampuchea Thmey Daily
0 Comments