ភ្នំពេញ ៖ លោកបណ្ឌិតអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា តាមការប៉ាន់ប្រមាណរបស់អង្គការអន្តរជាតិខាងការងារ ដែលហៅកាត់ថា ILOបានបង្ហាញថាមាន កម្មករនិយោជិតចំនួន ២.៧៨លាននាក់ បានបាត់បង់ជីវិតដោយសារគ្រោះថ្នាក់ការងារ និងជំងឺវិជ្ជាជីវៈជារៀងរាល់ឆ្នាំនៅលើសាកលលោក។
ក្នុងចំណោមនោះ មានកម្មករនិយោជិត ២.៤លាននាក់ បានស្លាប់ដោយសារជំងឺវិជ្ជាជីវៈ និងកម្មករនិយោជិតចំនួន ៣៧៤លាននាក់ទៀត បានទទួលរងនូវគ្រោះថ្នាក់ការងារដែលមិនបណ្តាលឲ្យស្លាប់។
ថ្លែងក្នុងឱកាសនៃការប្រារព្ធទិវាពិភពលោកដើម្បីសុវត្ថិភាព និងសុខភាពការងារ ក្រោមប្រធានបទ«សុវត្ថិភាព និងសុខភាពការងារ និងអនាគតនៃការងារ»កាលពី ថ្ងៃទី០៣ ខែឧសភា ២០១៩ តំបន់សេដ្ឋកិច្ចពិសេសនាងកុក ខេត្តកោះកុងលោកបណ្ឌិតរដ្ឋមន្ត្រីបានបន្តថា តាមស្ថិតិនៃគ្រោះថ្នាក់ការងារ និងជំងឺវិជ្ជាជីវៈនេះនៅបន្តកើនឡើងដែលក្នុងនោះការកើនឡើងហានិភ័យការងារផ្នែកសុខភាពផ្លូវចិត្ត ស្មុគស្មាញនឹងការងារ និងជំងឺមិនឆ្លងបានកើនឡើងគួរឲ្យកត់សម្គាល់នៅគ្រប់ផ្នែកនៃពិភពលោក និងប៉ះពាល់ដល់សេដ្ឋកិច្ចសកលលោក ព្រមទាំងទាមទារឲ្យមានវិធានការការពារសុវត្ថិភាពការងារ ឲ្យបានគ្រប់ជ្រោយបន្ថែមទៀតនៅទូទាំងពិភពលោក។
លោករដ្ឋមន្ត្រីបានបន្ថែមថា ដោយឡែក នៅក្នុងប្រទេសកម្ពុជា តាមរយៈរបាយការណ៍របស់បេឡាជាតិរបបសន្តិសុខសង្គម បានបង្ហាញឲ្យឃើញថា គ្រោះថ្នាក់ការងារ ករណីស្លាប់ និងការចំណាយទៅសំណងហានិភ័យការងារឆ្នាំ២០១៨ មានថយចុះស្មើនឹង ១៨.២៥% បើធៀបនឹងឆ្នាំ២០១៧ កន្លងទៅគឺគ្រោះ ថ្នាក់ការងារសរុបចំនួន ៣៤,៨០៨ករណី រួមមានគ្រោះថ្នាក់នៅកន្លែងធ្វើការមានចំនួន ២៥,២០៦នាក់ គ្រោះថ្នាក់ពេលធ្វើដំណើរចំនួន ៩,៥៣០នាក់ និងផ្សេងៗចំនួន ៧២នាក់។ ចំពោះករណីដួលសន្លប់របស់កម្មករនិយោជិត មានការថយចុះចំនួន ៥៤.៥៥% ដោយកើតឡើងនៅក្នុង ២២សហគ្រាស-គ្រឹះស្ថាន នៅឆ្នាំ២០១៧ មកត្រឹម ១០សហគ្រាស-គ្រឹះស្ថាន នៅឆ្នាំ២០១៨ ដែលនេះបង្ហាញពីការយកចិត្តទុកពីគ្រប់ភាគីពាក់ព័ន្ធក្នុងបង្ការ សុវត្ថិភាព និងសុខភាពការងារនៅកន្លែងធ្វើការ។
លោករដ្ឋមន្ត្រីបានឲ្យដឹងទៀតថា ក្រោមការអនុវត្តផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ឆ្នាំ២០១៤-២០១៨ ជាពិសេសលើវិស័យសុវត្ថិភាពការងារ និងសុខភាពការងារ ក្រសួងការងារ និងបណ្តុះបណ្តាលវិជ្ជាជីវៈ បានសម្រេចលទ្ធផលសំខាន់ៗរួមមានបានដាក់ឲ្យប្រើប្រាស់នូវផែនការមេលើកទី២ ស្តីពីសុវត្ថិភាព និងសុខភាពការងារ ឆ្នាំ២០១៨-២០២២ ដែលជាផែនទីចង្អុលផ្លូវក្នុងអភិវឌ្ឍវិស័យសុវត្ថិភាព និងសុខភាពការងារនៅក្នុងប្រទេសកម្ពុជា។ បានបន្តយន្តការនៃគណៈកម្មាធិការជាតិសុវត្ថិភាព និងសុខភាពការងារ ដើម្បីសម្របសម្រួល និងផ្តល់យោបល់ដើម្បីពង្រឹងប្រព័ន្ធគ្រប់គ្រងសុវត្ថិភាព និងសុខភាពការងារ ថ្នាក់ជាតិ និងសហគ្រាស គ្រឹះស្ថាន។
បានកែលម្អប្រព័ន្ធអធិការកិច្ចការងារឲ្យកាន់តែមានប្រសិទ្ធភាព និងគុណភាព តាមរយៈការកែលម្អរបាយការណ៍អធិការកិច្ចការងារ ការពង្រឹងសមត្ថភាពមន្ត្រីទទួលបន្ទុកអធិការកិច្ចការងារ និងការបង្កើនការចុះអធិការកិច្ចការងារបន្ថែមទៀតទៅដល់វិស័យសំណង់ ឡឥដ្ឋ និងសេវាកម្សាន្ត។
បានបន្តអនុវត្តគម្រោងលើកកម្ពស់ស្តង់ដារសុវត្ថិភាព និងសុខភាពការងារនៅក្នុងវិស័យសំណង់នៅកម្ពុជា របស់អង្គការអន្តរជាតិខាងការងារជប៉ុន ដោយបានរៀបចំលិខិតបទដ្ឋានគតិយុត្តិពាក់ព័ន្ធនឹងវិស័យសំណង់បន្ថែម និងការបណ្តុះបណ្តាលគ្រូបង្គោល និងសិក្ខាកាមស្តីពីការកែលម្អការងារ នៅក្នុងការដ្ឋានសំណង់ខា្នតតូច (WISCON) ព្រមទាំងគ្រោងនឹងរៀបចំគោលនយោបាយជាតិស្តីពីសុវត្ថិភាព និងសុខភាពការងារ។
ជាងនេះទៅទៀតក្រសួងបានដាក់ចេញនូវផែនយុទ្ធសាស្ត្រអភិវឌ្ឍន៍វិស័យការងារ និងបណ្តុះ បណ្តាលវិជ្ជាជីវៈឆ្នាំ២០១៩-២០២៣ ដែលសុវត្ថិភាព និងសុខភាពការងារស្ថិតនៅក្នុងកម្មវិធីទី១ «ការអភិវឌ្ឍលក្ខខណ្ឌការងារ និងសុខដុមនីយកម្មនៃទំនាក់ទំនងវិជ្ជាជីវៈ» ដែលផ្តល់នូវកាលានុវត្តជាយុទ្ធសាស្ត្រ ដើម្បីពង្រឹងលក្ខខណ្ឌសុវត្ថិភាព និងសុខភាពការងារ ជាពិសេសការរៀបចំច្បាប់ស្តីពីសុវត្ថិភាព និងសុខភាពការងារ ជំរុញ និងលើកទឹកចិត្តដល់សហគ្រាស គ្រឹះស្ថានដែលអនុវត្តតាមបទដ្ឋានការងារស្នូលសុវត្ថិភាព និងសុខភាពការងារ៕
Source: Kampuchea Thmey Daily
0 Comments