ក្រុមបាល់ទាត់អាស៊ីអឺរ៉ុប ត្រូវជួបក្រុមអគ្គីសនីកម្ពុជា ខណៈក្រុមយុវជនសាលាបាល់ទាត់ជាតិបាទីប៉ះក្រុមបឹងកេត ហើយក្រុមព្រះខ័នរាជស្វាយរៀងទទួលក្រុមអង្គរថាយហ្គឺរនិងក្រុមណាហ្គាវើលប៉ះភ្នំពេញក្រោន នៅល្ងាចថ្ងៃអាទិត្យ ទី៥ ខែឧសភា ឆ្នាំ២០១៩ ក្នុងសប្តាហ៍ទី៦នៃពានរង្វាន់លីគកំពូលកម្ពុជា (Metfone Cambodian League 2019)។
*អាស៊ីអឺរ៉ុប ប៉ះអគ្គីសនីកម្ពុជា
ក្រុមបាល់ទាត់អាស៊ីអឺរ៉ុប ត្រូវប៉ះក្រុមអគ្គីសនីកម្ពុជា នៅវេលាម៉ោង៣និង៣០នាទីរសៀលលើទីលានកីឡដ្ឋាន AEU Sport Park ហើយប្រកួតនេះមានផ្សាយផ្ទាល់តាមតាមហ្វេសប៊ុក CNCC ផងដែរ។ ក្រុមអាស៊ីអឺរ៉ុបគឺមានការសហការដឹកនាំពីសំណាក់គ្រូបង្វឹក២នាក់មានលោក សុក វាសនា និងលោក សំ វ៉ាន់ដេត។ ៥ប្រកួតមកនេះអាស៊ីអឺរ៉ុប ឈ្នះបាន៣លើកនិងចាញ់២លើក។ ចំណែកក្រុមអគ្គីសនីកម្ពុជា វិញមិនប្រើប្រាស់កីឡដ្ឋានបរទេសនោះទេនៅរដូវកាលនេះ ខណៈ៥ប្រកួតមកនេះអគ្គីសនីកម្ពុជា ប្រកួតឈ្នះបាន២លើកនិងចាញ់៣លើក។
*យុវជនសាលាបាល់ទាត់ជាតិ ប៉ះក្រុមបឹងកេត
ក្រុមយុវជនសាលាបាល់ទាត់ជាតិបាទី ត្រូវបើទ្វាកីឡដ្ឋានមជ្ឈមណ្ឌលសាលាបាល់ទាត់ជាតិបាទី ក្នុងខេត្តតាកែវ ទទួលក្រុមជើងឯក៣សម័យកាលបឹងកេតអែហ្វស៊ី នៅវេលាម៉ោង៣:៣០នាទីរសៀល។ ប្រកួតនេះមានផ្សាយផ្ទាល់តាមហ្វេសប៊ុករបស់ CNCC ផងដែរ។ ចំណែកក្រុមទាំង២មិនធ្លាប់មានប្រវត្តិប៉ះគ្នាពីមុនមកទេដោយសារតែក្រុមយុវជនសាលាបាល់ទាត់ជាតិ ទើបតែបានឡើងមកលេងលីគកំពូលកម្ពុជា រដូវកាលនេះ។
ក្រុមយុវជនសាលាបាល់ទាត់ជាតិបាទី ដែលកំពុងដឹកនាំដោយលោកKoji Gyotoku គ្រូបង្វឹកជនជាតិជប៉ុន ខណៈពេលនេះក្រុមនេះទើបតែបានយកឈ្នះលើក្រុមខេត្តកំពង់ចាម ដោយលទ្ធផល៣ទល់០ ក្រោយចាញ់៤លើកជាប់ៗគ្នា។ ចំណែកក្រុមបឹងកេត វិញជាបេក្ខភាពមួយមិនអាចមើលរំលងបានក្នុងការប្រជែងយកជើងឯកនៅរដូវកាលនេះ។ ក្រុមដែលដឹកនាំដោយលោក ហៅ សុជាតិ វិញកំពុងតែត្រូវការ៣ពិន្ទុបន្ថែមទៀត ដើម្បីប្រជែងកៅអីកំពូលតារាងក្រោយចាប់ផ្តើមរដូវកាលថ្មីមិនបានល្អ។
*ព្រះខ័នរាជស្វាយរៀង ជួបអង្គរថាយហ្គឺរ
ក្រុមបាល់ទាត់ព្រះខ័នរាជស្វាយរៀង ត្រូវប្រកួតជាមួយក្រុមអង្គរថាយហ្គឺរ នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង ហើយប្រកួតនេះមានផ្សាយផ្ទាល់តាមហ្វេសប៊ុករបស់កម្ពុជាថ្មីផងដែរ។ ក្រុមទាំង២មិនទាន់បរាជ័យដូចគ្នាគិតត្រឹមពេលនេះ ខណៈប្រកួតចុងក្រោយកាលពីរដូវកាលមុនគឺបានត្រឹមស្មើគ្នា១ទល់១។
ក្រុមព្រះខ័នរាជស្វាយរៀង ជាក្រុមដែលឈរកំពូលតារាងក្រោយមិនទាន់ស្គាល់ពាក្យថាបរាជ័យ ស្របពេលលោកConor Nestor ដែលជាគ្រូបង្វឹកបន្តលើកទឹកចិត្តកូនក្រុមឲ្យធ្វើការលើទីលានបានល្អរក្សាកៅអីឲ្យបានគង់ជាបន្ត។ ចំណែកក្រុមអង្គរថាយហ្គឺរ វិញកំពុងតែមានកម្លាំងចិត្តខ្លាំងក្រោយមិនទាន់បរាជ័យនៅក្រៅដៅ ខណៈលោកOriol Mahedano ដែលជាគ្រូបង្វឹកជនជាតិអេស្ប៉ាញប្រចាំក្រុមនៅតែមានជំនឿចិត្តថានឹងធ្វើជាសម្ពាធដល់ក្រុមខ្លាំងៗ ទោះបីជាក្រុមលោកមានភាគរយដណ្តើមពាននៅតិចក៏ដោយ។
*ណាហ្គាវើល ប៉ះភ្នំពេញក្រោន
ក្រុមណាហ្គាវើល ត្រូវប៉ះក្រុមភ្នំពេញក្រោន នៅវេលាម៉ោង៦ល្ងាចលើទីលានកីឡដ្ឋានស្តាតចាស់ ហើយប្រកួតនេះមានផ្សាយផ្ទាល់តាមប៉ុស្តិ៍ BTV News ផងដែរ។ ជំនួបគ្នា៥លើកចុងក្រោយឃើញថាក្រុមណាហ្គាវើល មិនដែលចាញ់ភ្នំពេញក្រោននោះទេ។
ក្រុមណាហ្គាវើល របស់លោក មាស ចាន់ណា មានសម្ពាធជាងរាល់ឆ្នាំព្រោះត្រូវរៀបចំក្រុមប្រកួត៣ពានរង្វាន់ផ្សេងគ្នាគឺក្នុងពានរង្វាន់ AFC Cup,ពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន ផងដែរ។ យ៉ាងណាក្តីនៅក្នុងពានរង្វាន់លីគកំពូលកម្ពុជា ក្រុមណាហ្គាវើល នៅមានឱកាសប្រដេញកំពូលតារាង ខណៈក្រុមនេះអស់ឱកាសឆ្លងផុតពូលជម្រុះពាន AFC Cup ហើយ។ ចំណែកក្រុមភ្នំពេញក្រោន នៅពេលនេះនៅសល់កីឡាករបរទេសតែ៣នាក់ទេ ក្រោយ២នាក់មុនបានរងរបួសរយៈពេលយូរហើយក្លិបសម្រេចផ្តាច់កិច្ចសន្យាមុន។ លោក Leonardo Vitorino ដែលជាគ្រូបង្វឹកកំពុងតែរងសម្ពាធក្រោយដឹកនាំក្រុមក្នុងប្រកួតបើកឆាកមិនសូវទទួលលទ្ធផលល្អ៕
Source: Kampuchea Thmey Daily
0 Comments