កំពង់ឆ្នាំង ៖ យុវជនម្នាក់បានរង បួសធ្ងន់បាក់ជើង២កំណាត់ ដោយសាររថយន្តបើកកៀរម៉ូតូបណ្ដាលឲ្យម៉ូតូ និងមនុស្សហោះបុកបង្គោលថ្មអគ្គិសនីពេញទំហឹង របួសធ្ងន់និងខូចម៉ូតូរួញមួយកំណាត់មុខ។ ហេតុការណ៍នេះបានកើតឡើងនៅវេលាម៉ោង៨និង៤០នាទីយប់ ថ្ងៃទី២២ ខែមករា ឆ្នាំ២០១៥ លើផ្លូវជាតិលេខ៥ មុខវិទ្យាល័យព្រះបាទសុរាម្រឹត ក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានឲ្យដឹងថា ជនរងគ្រោះមានឈ្មោះ សេង រ៉ា អាយុ២១ឆ្នាំ រស់នៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ជិះម៉ូតូហុងដាឌ្រីមសេរីឆ្នាំ២០១៤ បានរងរបួសបាក់ជើងខាងស្តាំ២កំណាត់។
មុនពេលកើតហេតុជនរងគ្រោះបានជិះម៉ូតូក្នុងល្បឿនលឿនក្នុងទិសដៅពីត្បូងទៅជើង លុះមកដល់ចំណុចកើតហេតុ ត្រូវបានរថយន្តមិនស្គាល់ម៉ាកបើកបរស្របទិសគ្នាកៀរពីក្រោយ ធ្វើឲ្យម៉ូតូគេរេចង្កូតទៅបុកបង្គោលថ្មអគ្គិសនីនៅចិញ្ចើមផ្លូវខាងស្តាំដៃយ៉ាងពេញទំហឹង បណ្ដាលឲ្យរូបគេរបួសធ្ងន់ និងម៉ូតូខ្ទេចមួយកំណាត់មុខ។
ក្រោយពេលកើតហេតុ រថយន្តបង្កបានបើករត់គេចទៅបាត់ ចំណែកជនរងគ្រោះត្រូវបានសមត្ថកិច្ចហៅរថយន្តមន្ទីរពេទ្យខេត្តមកដឹកបញ្ជូនយកទៅសង្គ្រោះក្នុងមន្ទីរពេទ្យខេត្ត ប៉ុន្តែដោយសភាពរបួសធ្ងន់ធ្ងរ ជនរងគ្រោះត្រូវបានគ្រូពេទ្យខេត្តបញ្ជូនទៅកាន់មន្ទីរពេទ្យក្រុងភ្នំពេញជួយសង្គ្រោះព្យាបាលបន្តទៀត។
ចំណែកម៉ូតូជនរងគ្រោះ ត្រូវបានសមត្ថកិច្ចដឹកបញ្ជូនមករក្សាទុកនៅក្នុងអធិការនគរបាលក្រុងកំពង់ឆ្នាំងទុកប្រគល់ជូនក្រុមគ្រួសារជនរងគ្រោះវិញ ហើយសមត្ថកិច្ចនឹងបន្តស្រាវជ្រាវរករថយន្តបង្កជាបន្តទៀតឲ្យមកទទួលខុសត្រូវជាមួយជនរងគ្រោះ៕
ឈៀង ថារិទ្ធ
0 Comments