កណ្ដាល ៖ ប្រជាពលរដ្ឋរស់នៅឃុំស្វាយប្រទាល ឃុំត្រើយស្លា ឃុំប្រាសាទ ឃុំតាលនី រួមជាមួយនឹងអាជ្ញាធរមូលដ្ឋានបានរាយការណ៍ឲ្យដឹងថា នៅក្នុងដែនអតីតឡូត៍នេសាទលេខ៣,៤,៥ ស្ថិតក្នុងភូមិសាស្ត្រស្រុកស្អាង ខេត្តកណ្តាល កំពុងកើតមានបទល្មើសនេសាទគ្រប់ប្រភេទយ៉ាងពេញបន្ទុក ដោយពុំដែលឃើញខាងជំនាញជលផលខណ្ឌកណ្ដាល ផ្នែកបាសាក់ និងជលផលសង្កាត់ស្អាង ចុះទៅធ្វើការទប់ស្កាត់ ឬបង្ក្រាបទាល់តែសោះ។
ក្នុងករណី អាជ្ញាធរនិងជំនាញជលផលមានភាពកម្សោយក្នុងការបង្ក្រាបនេះ បានធ្វើឲ្យជនល្មើសធ្វើសកម្មភាពប្រព្រឹត្តបានយ៉ាងអនាធិបតេយ្យបំផុតតាមតំបន់អភិរក្សពូជត្រីសំខាន់ៗ ធ្វើឲ្យមច្ឆជាតិស្ទើរតែវិនាសហិនហោចអស់ទៅហើយ។
ប្រភពពីប្រជាពលរដ្ឋឃុំស្វាយប្រទាលបានឲ្យដឹងថា នៅតាមបណ្តោយព្រែកតាជ័រ និងព្រែកទាហានសៅ រហូតដល់បឹងតាកូវ បឹងបាតខ្ទះ បឹងតាវ៉ា បឹងគន្ធាយ ប្រាំបួន គឺពោរពេញដោយសម្រាស់ សៃយ៉ឺន ស្បៃមុង និងបទល្មើសឆក់ត្រីប្រើដោយភ្លើងអាគុយរាប់រយគ្រឿង កំពុងធ្វើសកម្មភាពយ៉ាងអនាធិបតេយ្យពេញទំហឹង ទាំងយប់ទាំងថ្ងៃ ដោយគ្មានខ្លាចញញើតនឹងអាជ្ញាធរមានសមត្ថកិច្ចនោះឡើយ។
ប្រជាពលរដ្ឋរស់នៅឃុំត្រើយស្លាបានរាយការណ៍ឲ្យដឹងដែរថា នៅតាមបណ្តោយព្រែកឃ្លោក រហូតបឹងពាមសូអូតំរី អូរខ្ចាំបឹងសន្ទៃ រហូតដល់មាត់ប្រឡាយយាយបូ ស្ថិតក្នុងអតីតឡូត៍នេសាទលេខ៣,៤ គឺសម្បូរដោយបទល្មើសសម្រាស់ សៃយ៉ឺន ស្បៃមុង និងបូមបឹងធម្មជាតិពង្រីងរួចប្រើមងឆក់ និងដុំឆក់ប្រមូលផលត្រីយ៉ាងច្រើនកុះករ ដោយពួកឈ្មួញបានប្រើសិទ្ធិអំណាចជាខ្នងបង្អែកអ្នកធំនៅក្នុងមន្ត្រីជលផល ថ្នាក់ខេត្ត ឬស្រុក មកកាង និងប្រព្រឹត្តធ្វើបទល្មើសផ្សេងៗយ៉ាងគឃ្លើនបំផុត ជាពិសេសក្រុមអ្នកឆក់ត្រីមានរាប់រយនាក់ហ៊ានប្រព្រឹត្តទង្វើទាំងនោះដោយសារមានសមត្ថកិច្ច និងមន្ត្រីជលផលមួយចំនួនតូចបានយកលុយកាក់ ហើយបើកភ្លើងខៀវឲ្យពួកគេទៀតផង។
អ្នកភូមិប្រាសាទតាយ៉ូបានឲ្យដឹងថា នៅតាមបឹងបួ អូរ ព្រែក ជុំវិញភូមិរបស់ពួកគាត់ បើចង់ដឹងពួកគាត់ប្រាប់ថា ឲ្យជិះម៉ូតូ ឬទូកដើរក្រឡឹងមើលមួយជុំទៅឃើញហើយថាមានអ្វីខ្លះនោះ គឺគ្រាន់តែ(ពួកឆក់ត្រី) ចង់ស្មើមួយកងពលទៅហើយ។ ចំណែកនៅតំបន់សន្ទៃ អន្លង់ ត្រើយទឹក រហូតដល់ទ្រនំឡូត៍លេខ៤ចាស់ ធ្លាក់មកដល់តំបន់អភិរក្សឡូត៍លេខ៥ ឃុំប្រាសាទគឺសុទ្ធតែសម្រាស់ សៃយ៉ឺន ស្បៃមុង ណែនណាន់តាន់តាប់ទាំងអស់ ដែលពួកគាត់រអ៊ូរទាំថា រកតែកន្លែងរាយមងយកត្រីស្ល គឺពុំបានផង។
ប្រជាពលរដ្ឋក្នុងឃុំខាងលើបានឲ្យដឹងថា ដល់បទល្មើសនេសាទទាំងនោះកើតយ៉ាងពេញបន្ទុក តាំងពីតាមបឹងបួ ព្រែក អូរ រហូតដល់ក្នុងទន្លេបាសាក់ គឺមានខួបប្រាំង ខួបវស្សា ហើយមិនដឹងជាយ៉ាងណាទេបានជាមន្ត្រីជលផលខេត្តកណ្តាលក្រោមការគ្រប់គ្រងពីលោក ឃ្លាំង វណ្ណធុល ជលផលផ្នែកបាសាក់ ក្រោមការគ្រប់គ្រងពីលោក សេង ធីម ជលផលស្រុកស្អាង ក្រោមការគ្រប់គ្រងពីលោក ឃឹម ពេញ ជានាយសង្កាត់ រួមជាមួយនឹងអាជ្ញាធរបែរជាពុំមានចំណាត់ការណាមួយក្នុងការចុះបង្ក្រាប ឬទប់ស្កាត់បទល្មើសនេសាទខាងលើនេះទាល់តែសោះ។ ពួកគាត់រិះគន់ថា មិនដឹងភាពអន់កម្សោយ ឬអសមត្ថភាពក្នុងការងារក៏មិនដឹងដែរ។
ជាក់ស្ដែងនៅក្នុងពេលបច្ចុប្បន្ននេះ នៅត្រង់ចំណុចចុងពាមសួរ មានបុរសជើងខ្លាំងម្នាក់ឈ្មោះ ឃាង តូ រស់នៅភូមិព្រែកបាឡាត់ឆឹង ឃុំត្រើយស្លា រួមជាមួយនឹងឈ្មោះ ឈាង មេភូមិលេខ៨ និងជនជាតិវៀតណាមជាច្រើននាក់ទៀតបានទៅធ្វើសកម្មភាពបូមពង្រីងបឹង រួចយកអួនក្រឡាញឹកបង្កប់ដុំឆក់ដែលហៅថា (មងក្តៅ) និងប្រើឧបករណ៍ឆក់ដោយភ្លើងអាគុយជាច្រើនគ្រឿងទៀត សកម្មភាពនេះយ៉ាងគឃ្លើននៅនឹងមុខសមត្ថកិច្ចជលផលនិងអាជ្ញាធរ។
គួរបញ្ជាក់ដែរថា ព្រៃលិចទឹកដែលស្ថិតក្នុងអតីតឡូត៍នេសាទខាងលើ ស្ទើរវិនាសហិនហោចអស់ទៅហើយក្នុងបច្ចុប្បន្ននេះ ដោយសារតែត្រូវបានកាប់បំផ្លាញយកធ្វើជាសម្រាស់ដាក់នៅតំបន់ខាងលើនោះ ករណីនេះប្រជាពលរដ្ឋសំណូមពរដល់លោកម៉ៅ ភិរុន អភិបាលខេត្ត អាជ្ញាធរស្រុក និងជំនាញជលផលមេត្តាមានវិធានការទប់ស្កាត់អាជ្ញាធរស្រុក និងជំនាញជលផលមេត្តាមានវិធានការទប់ស្កាត់ឲ្យទាន់ពេលវេលា៕
រ៉ាបូរ
 ឯខាងជលផលអត់ខ្ចីធ្វើការបង្ក្រាបសោះ){kind=link}
0 Comments