រតនគិរី ៖ មានការភ្ញាក់ផ្អើលមួយបានកើតឡើង ខណៈមានផ្សែងហុយចេញពីដំបូលផ្ទះសំណាក់យីហោ"ឆាយវ៉ាង" សង្ស័យទុស្សេខ្សែភ្លើង កាលពីវេលាម៉ោង៦និង៣០នាទីព្រឹក ថ្ងៃទី២៩ ខែមករា ឆ្នាំ២០១៥ ភូមិជ័យជម្នះ សង្កាត់ឡាបានសៀក ក្រុងបានលុង។ ករណីនេះធ្វើឲ្យភ្ញាក់ផ្អើលដល់អ្នកស្នាក់នៅទាំងខ្មែរនិងបរទេស។
បើតាមសម្ដីពីម្ចាស់ផ្ទះសំណាក់បានឲ្យដឹងថា នៅមុនពេលកើតហេតុ រូបគាត់ឃើញមានផ្សែងហុយផ្នែកខាងក្រោយនៅជាន់ទី២ ទើបមានការភ្ញាក់ផ្អើលឆោឡោ ហើយបានទូរស័ព្ទហៅរថយន្តពន្លត់អគ្គីភ័យរបស់ស្នងការនគរបាលខេត្តចំនួន១គ្រឿងជួយបាញ់ទឹកពន្លត់ទាន់ពេលវេលា។ ម្ចាស់ផ្ទះខាងលើប្រាប់បន្តឲ្យដឹងទៀតថា អគ្គីភ័យនេះបណ្ដាលមកពីទុស្សេខ្សែភ្លើង ហើយពុំមានខូចខាតទ្រព្យសម្បត្តិនោះទេ គ្រាន់តែមានស្នាមឆេះខ្លោចអស់ស័ង្កសីពីរបីសន្លឹកតែប៉ុណ្ណោះ។
សមត្ថកិច្ចដែលចុះអន្តរាគមន៍ក្នុងហេតុការណ៍អគ្គីភ័យខាងលើនេះប្រាប់ឲ្យដឹងថា មានភ្ញៀវម្នាក់ឈ្មោះ លី លី ភេទស្រី អាយុ២១ឆ្នាំ ជនជាតិខ្មែរ ស្រុកកំណើតនៅខេត្តតាកែវ មុខរបរជាអ្នកបម្រើនៅភោជនីយដ្ឋាន"ពន្លឺថ្មី" បានឆេះខ្លោចស្លាប់ក្នុងបន្ទប់០៣២ និងមានមនុស្សប្រុសម្នាក់ទៀតឈ្មោះ កុល រិទ្ធី ភេទប្រុស អាយុ២៧ឆ្នាំ មុខរបរអ្នកលក់ពងទាបោះដុំ និងរាយ ដែលមានស្រុកកំណើតនៅភូមិវាល ឃុំព្រៃខ្លា ស្រុកស្វាយអន្ទរ ខេត្តព្រៃវែង បានយកស្ត្រីរងគ្រោះមកស្នាក់នៅបន្ទប់ជាមួយគ្នារងរបួសធ្ងន់។ សមត្ថកិច្ចខាងលើបន្តឲ្យដឹងទៀតថា ករណីទុស្សេខ្សែភ្លើងនេះផ្ដើមចេញពីបន្ទប់០៣២ នេះតែម្តង ដោយសមត្ថកិច្ចត្រួតពិនិត្យឃើញឆេះពិតាន និងកង្ហារខ្ទេចតែម្តង។ ក្រោយពេលកើតហេតុត្រូវរថយន្តអគ្គីភ័យចំនួន២គ្រឿងមកពន្លត់ទាន់ពេលវេលា ទើបស្ថានភាពប្រសើរឡើងវិញ។ សមត្ថកិច្ចចូលរួមមាន អធិការក្រុងបានលុង និងបច្ចេកទេសជំនាញព្រហ្មទណ្ឌកម្រិតធ្ងន់នៃស្នងការនគរបាលខេត្ត បានចុះទៅអន្តរាគមន៍ធ្វើកំណត់ហេតុ និងធ្វើកោសល្យវិច័យលើសាកសពជនរងគ្រោះ។
បច្ចុប្បន្ន សមត្ថកិច្ចយកសាកសពជនរងគ្រោះទៅតម្កល់នៅវត្តភូមិថ្មី រង់ចាំសាច់ញាតិមកទទួលយកទៅធ្វើបុណ្យតាមប្រពៃណី៕
តាជួង
0 Comments