ភ្នំពេញ ៖ កម្លាំងមន្ទីរប្រឆាំងគ្រឿងញៀនក្រសួងមហាផ្ទៃដែលដឹកនាំដោយព្រះរាជអាជ្ញារង និងក្រឡាបញ្ជី រួមនឹងលោកនាយការិយាល័យ បានចុះមកសហការជាមួយកម្លាំងមូលដ្ឋានទៅឡោមព័ទ្ធចាប់គ្រឿងញៀនតាមរបៀបទ្រុងទ្រាយដ៏ធំសំបើមមួយ ព្រមទាំងមានការបិតផ្លូវច្រកចូលគ្រប់កន្លែងទៀតផង ហើយធ្វើការឆែកឆេរនិងរុករកគ្រឿងញៀនសព្វកន្លែងពេញបន្ទប់ជួលរបស់ជនសង្ស័យជនជាតិវៀតណាមម្នាក់ តែជាលទ្ធផលគឺរកឃើញតែបំណែកគ្រឿងញៀនបន្តិចមើលសឹងមិនឃើញផងនេះ ជាការចោទប្រកាន់ និងការចាប់ឃាត់ខ្លួនជនសង្ស័យរូបនោះ។
ប្រភពព័ត៌មានពីកន្លែងកើតហេតុបានឲ្យដឹងថា នៅវេលាម៉ោង១៦ល្ងាច ថ្ងៃទី២៨ ខែមករា ឆ្នាំ២០១៥ គេឃើញកម្លាំងមន្ទីរប្រឆាំងគ្រឿងញៀនក្រសួងមហាផ្ទៃដែលដឹកនាំដោយលោក សឿង ណុល នាយការិយាល័យ លោក ផាន់ ពិសិដ្ឋ ក្រឡាបញ្ជី និង លោក គឺ ប៊ុណ្ណារ៉ា ព្រះរាជអាជ្ញារងអមសាលាដំបូងរាជធានី និងកម្លាំងនគរបាលផ្នែកជំនាញច្រើននាក់ទៀត បានចុះមកសហការជាមួយកម្លាំងនគរបាលមូលដ្ឋានប៉ុស្តិ៍ស្រះចកខណ្ឌដូនពេញ ចុះទៅឡោមព័ទ្ធផ្ទះជួលលេខ៥៧ ផ្លូវជាតិលេខ៥ ស្ថិតខាងជើងគល់ស្ពានជ្រោយចង្វា ស្ថិតក្នុងភូមិ១៦ ក្នុងសង្កាត់ស្រះចក ខណ្ឌដូនពេញដោយខណៈនោះក្រុមកម្លាំងចម្រុះបានបិទផ្លូវច្រកចូល ហើយធ្វើការឃាត់ខ្លួនស្ត្រីសង្ស័យជនជាតិវៀតណាមម្នាក់ឈ្មោះ ជា វុទ្ធី អាយុ២២ឆ្នាំ ដែលជួលបន្ទប់នោះស្នាក់នៅ បន្ទាប់មកក្រុមកម្លាំងទាំងអស់បានរុករក និងឆែកឆេរពេញបន្ទប់ ជាលទ្ធផលក្រុមសមត្ថកិច្ចចម្រុះបានអះអាងថា បានរកឃើញវត្ថុតាងថ្នាំញៀនប្រភេទម៉ាទឹកកកមួយបំណែកតូចមើលសឹងមិនឃើញផងនេះ ជាបន្ទុកនៃការចោទប្រកាន់ឃាត់ខ្លួនជនសង្ស័យរូបនោះ ហើយនាំចូលឡានដឹកយកទៅភ្លាមៗដើម្បីចាត់ការតាមជំនាញរបស់គេតែម្តង៕
រស្មី
0 Comments