នៅក្នុងសម័យបុរាណការធ្វើសង្គ្រាមដណ្តើមទឹកដីបានកើតឡើងនៅគ្រប់ទីកន្លែងលើពិភពលោក ពោលគឺជាតិសាសន៍ណា ដែលមានសមត្ថភាពខ្លាំង នោះគេអាចមានលទ្ធភាពក្នុងការដណ្តើមយកទឹកដីរបស់ជាតិសាសន៍ដទៃទៀតមកគ្រប់គ្រង។ ប៉ុន្តែការធ្វើសង្គ្រាមបែបនេះ មិនបានបញ្ចប់ត្រឹមនោះទេ នេះមានន័យថាថ្ងៃណាមួយជាតិសាសន៍ ដែលធ្លាប់តែខ្សោយនឹងងើបតបតឡើងវិញជាមិនខានឡើយ។ ហេតុដូច្នេះ ការកាប់សម្លាប់គ្នាមានជាបន្តបន្ទាប់ ដែលកើតឡើងពីការស្រឡាញ់ជាតិសាសន៍ខ្លួនឯង ហើយចង់ឲ្យជាតិសាសន៍ខ្លួនឯងល្អ រហូតឈានដល់ការបំផ្លាញជាតិសាសន៍ដទៃ។
យ៉ាងណាមិញ រហូតមកដល់សតវត្សទី២១នេះ សង្គ្រាមដោយសារការស្រឡាញ់ជាតិជ្រុលនៅតែបន្តកើតមាន។ ស្រលាញ់ជាតិសាសន៍ខ្លួនឯង វាជារឿងដែលជនជាតិណាក៏ធ្លាប់មានចំពោះជនជាតិខ្លួនឯង និងមាតុភូមិរបស់ខ្លួនដែរ។ មិនថាតែជាតិសាសន៍នោះអាក្រក់ ឬល្អក្នុងប្រវត្តិសាស្ត្រយ៉ាងណានោះទេ ប៉ុន្តែជនជាតិនៃប្រទេសនោះមិនបោះបង់ចោលនូវជាតិសាសន៍របស់ខ្លួនឡើយ។ យ៉ាងណាមិញ ការស្រឡាញ់ជាតិសាសន៍ខ្លួនឯងជ្រុលហួសហេតុពេក ឬជាតិនិយមពេកក៏បង្កជាបញ្ហាច្រើនណាស់ដែរ។ ហេតុអ្វីបានជាជាតិនិយមធ្វើឲ្យមានសង្គ្រាម ឬមានបញ្ហាក្នុងសង្គម?
បញ្ហាជាតិសាសន៍និយមគឺជាបញ្ហាដ៏រសើបមួយក្នុងសង្គមខ្មែរ តាំងពីយូរលង់ណាស់មកហើយ។ បច្ចុប្បន្ននេះ បញ្ហាជាតិសាសន៍ត្រូវបានគេយកមកប្រើក្នុងការប្រមូលយកផលប្រយោជន៍ផ្ទាល់ខ្លួន និងជាការអុចអាលឲ្យមានជម្លោះជាតិសាសន៍រវាងជាតិសាសន៍ដទៃ។ ជាក់ស្តែងកាលពីឆ្នាំ២០០៣ បញ្ហាជាតិសាសន៍និយមបានធ្វើឲ្យកម្ពុជាត្រូវសងការខូចខាតជាច្រើនលានដុល្លារអាមេរិក ទៅឲ្យភាគីថៃ។ ព្រឹត្តិការណ៍ឆ្នាំ២០០៣ បានធ្វើឲ្យស្ថានទូតថៃត្រូវបានដុតបំផ្លាញ ដោយសារតែក្រុមបាតុករមានការខឹងសម្បានឹងពាក្យចចាមអារ៉ាមជុំវិញរឿងរ៉ាវប្រាសាទអង្គរវត្ត។ នេះបង្ហាញថាជាតិនិយមជ្រុលពេកបានធ្វើឲ្យកម្ពុជាខ្លួនឯងត្រូវសងការខូចខាតទៅឲ្យភាគីម្ខាងទៀត។
ក្នុងការបោះឆ្នោតជាតិឆ្នាំ២០១៣នេះដែរ កម្ពុជាក៏បានជួបនឹងបញ្ហាជាតិសាសន៍និយមនេះម្តងទៀត។ ជាក់ស្តែងក្នុងរាជធានីភ្នំពេញមានការដុតឡានរបស់ប៉ូលីសក្រោយពេល ដែលក្រុមប្រជាពលរដ្ឋបានចោទប្រកាន់ថាមានឈ្មោះជនជាតិវៀតណាមក្នុងបញ្ជីឈ្មោះបោះឆ្នោត។ ជាលទ្ធផលទ្រព្យសម្បត្តិសាធារណៈត្រូវបានបំផ្លាញដោយសារតែកំហឹងរបស់ក្រុមប្រជាពលរដ្ឋ។ ចំពោះដំណោះស្រាយវិញ ប្រសិនបើ ប្រជាពលរដ្ឋរកឃើញថាពិតជាមានឈ្មោះជនអន្តោប្រវេសន៍ខុសច្បាប់មែន គួរណាស់តែពួកគាត់ឃាត់មនុស្ស ដែលសង្ស័យនោះទុក ហើយរាយការណ៍មកកាន់សមត្ថកិច្ច។ ម្យ៉ាងវិញទៀត ការដុតកម្ទេចរថយន្តរបស់រដ្ឋមិនមែនជាដំណោះស្រាយនោះទេ ហើយសកម្មភាពនេះគឺបញ្ជាក់ថាអ្នកធ្វើមិនមែនជាមនុស្សមានចំណេះដឹង សមជាពលរដ្ឋខ្មែរឡើយ។
ងាកមកនិយាយពីប្រវត្តិនៃសង្គ្រាមលោកឯណោះវិញ ក៏បានកើតឡើងដោយសារតែការប្រកាន់ពូសាសន៍ ឬជាតិនិយមជ្រុលពេកនេះដែរ។ ជាក់ស្តែងមេដឹកនាំរបស់អាឡឺម៉ង់បានបង្កើតខ្សែភាពយន្តមួយ ដែលមានលក្ខណៈបន្តុះបង្អាប់ចំពោះជនជាតិជ្វីហ្វ ដែលនេះបង្ហាញពីការរើសអើងជាតិសាសន៍មួយក្នុងប្រវត្តិសាស្ត្រពិភពលោក។
រហូតមកដល់ពេលនេះ ជាតិសាសន៍និយមមិនថាតែក្នុងប្រទេសកម្ពុជានោះទេ ប៉ុន្តែនៅលើពិភពលោកបានកំពុងតែបន្តកើតមានឡើងជាហូរហែ។ ជាក់ស្តែងដូចជាសង្គ្រាមនៅតំបន់មជ្ឈិបូព៌ាជាដើម ដែលមានសង្គ្រាមប្រដាប់អាវុធស្ទើរតែរាល់ថ្ងៃ។ ចំណែកឯក្នុងប្រវត្តិសាស្ត្រខ្មែរវិញ រឿងរ៉ាវនៃជាតិសាសន៍និយមបានធ្វើឲ្យប្រជាពលរដ្ឋខ្មែរស្អប់គ្នាឯងផងដែរ។ ស្អប់គ្នានៅត្រង់ថាពួកគេលាបពណ៌ចោទប្រកាន់គ្នាទៅវិញទៅមក ពោលគឺបើគេស្អប់អ្នកណាម្នាក់ហើយ នោះគេនឹងចោទអ្នកនោះថាជាជនជាតិនេះ ឬជាជនជាតិនោះជាដើម។
ជាការពិតណាស់ថា ការស្រឡាញ់ជាតិសាសន៍ខ្លួនឯងគឺជារឿងត្រឹមត្រូវ ប៉ុន្តែការស្រឡាញ់ជាតិហួសហេតុ អាចបង្កជាបញ្ហាផ្សេងៗ ដូចដែលបានរៀបរាប់ខាងលើមកនេះ។ ម្យ៉ាងវិញទៀត ក្នុងរយៈពេលប៉ុន្មានខែខាងមុននេះ សមាហរណកម្មសេដ្ឋអកិច្ចអាស៊ាននឹងកើតឡើង ហេតុដូច្នេះការបើកចិត្តឲ្យទូលាយរួមគ្នាជាធ្លុងមួយរវាងជាតិសាសន៍ដទៃគឺជាសញ្ញានៃសន្តិភាព។ យើងត្រូវចងចាំថាគ្មានអ្នកណាម្នាក់គេមកយកទឹកដីយើងទេ បើយើងជាពលរដ្ឋ ដែលខ្លាំងទាំងស្មារតី ទាំងប្រាជ្ញានោះ។ ប៉ុន្តែបើជាតិសាសន៍យើងនៅពេលនេះ និយាយហាក់ដូចជាស្តាប់គ្នាមិនបានផង តើនេះមិនហៅថាចំណុចខ្សោយរបស់យើងទេឬ?
ប្រសិនបើយើងដកតែសញ្ជាតិចេញ នោះមនុស្សគ្រប់គ្នានៅលើពិភពលោកនឹងមានលក្ខណៈដូចគ្នា ហើយមនុស្ស ដែលមានលក្ខណៈដូចគ្នានេះ ក៏ចង់បាននូវសន្តិភាពមួយដូចគ្នាផងដែរ។ ដូច្នេះ យើងទាំងអស់គ្នាគួរតែធ្វើខ្លួនជាពលរដ្ឋនៃពិភពលោក ពោលគឺកុំប្រកាន់ពូជសាសន៍ ឬជាបុគ្គលម្នាក់ជាតិនិយមជ្រុលពេក។ តាមរយៈលក្ខខណ្ឌនេះ មនុស្សគ្រប់គ្នានៅលើពិភពលោកនឹងទទួលបានសន្តិភាពគ្រប់ៗគ្នា៕
0 Comments