កំពង់ឆ្នាំង ៖ នៅក្នុងការពង្រឹងការអនុវត្តន៍គោលនយោបាយភូមិ/ឃុំមានសុវត្ថិភាពរយៈពេល១ខែ គិតពីថ្ងៃទី១០ ខែវិច្ឆិកា ដល់ថ្ងៃទី០៧ ខែធ្នូ ឆ្នាំ២០១៤ ការិយាល័យគ្រប់គ្រងអាវុធជាតិផ្ទុះ នៃស្នងការដ្ឋាននគរបាលខេត្តកំពង់ឆ្នាំង បានធ្វើការត្រួតពិនិត្យដកហូតបាននូវប្រភេទអាវុធដាក់តាមខ្លួនមួយចំនួនដូចជា កាំបិត ដាវ ពូថៅ កន្ត្រៃ ច្រវាក់ ចំពាមរាប់សិបដើមពីអ្នកដើរលេងពេលយប់។
លោក កែវ ឈុន នាយការិយាល័យគ្រប់គ្រងអាវុធជាតិផ្ទុះបាននិយាយឲ្យដឹងនៅព្រឹកថ្ងៃទី៣១ ខែធ្នូ ឆ្នាំ២០១៤ ថា ក្នុងរបាយការណ៍បូកសរុបរបស់ការិយាល័យគ្រប់គ្រងអាវុធជាតិផ្ទុះនៃស្នងការដ្ឋាននគរបាលខេត្ត ចាប់ពីថ្ងៃទី១០ ខែវិច្ឆិកា រហូតដល់ថ្ងៃទី០៧ ខែធ្នូ ឆ្នាំ២០១៤នេះ កម្លាំងចម្រុះបានចុះចល័តត្រួតពិនិត្យអាវុធជាតិផ្ទុះពេលយប់បានចំនួន៨៤លើក ជាលទ្ធផលគឺដកហូតបាន ដាវសាំម៉ូរ៉ៃ ចំនួន១៦ដើម,កាំបិតប៉ាំងតោ៣,កាំបិតស្នៀត២,កាំបិតចិត្តបន្លែ៨,កាំបិតត្នោត៣,កាំបិត បន្ទុះ១,កាំបិតចំពុះទង់៣,កណ្ដៀវ២,ចំពាមកៅស៊ូ៨,កន្ត្រៃ១០, ច្រវាក់៩, ស្នាប់ដៃ៥,ដែក បំពង់ទីប២,ដែកស្រួច១,បំពង់ពីរកំណាត់១ ព្រមទាំងឃាត់ខ្លួនជនសង្ស័យប្រើប្រាស់ថ្នាំញៀនបានចំនួន២នាក់ និងដកហូតថ្នាំញៀនប្រភេទម៉ាទឹកកកបានចំនួន២កញ្ចប់តូច, ម៉ូតូ១គ្រឿង,ទូរស័ព្ទដៃ៣គ្រឿង ,ប្រគល់ជូនការិយាល័យប្រឆាំងគ្រឿងញៀនចាត់ការបន្ត។
ក្នុងពេលប្រតិបត្តិការត្រួតពិនិត្យអាវុធជាតិផ្ទុះ កម្លាំងចម្រុះបានដកនូវអាវុធទាំងនេះពីក្រោមគោយន្ត ក្រោមកែបម៉ូតូ ដែលពួកគេបានដាក់តាមសំរាប់តតាំងជាមួយគូជំលោះរបស់ខ្លួននៅពេលមានទំនាស់ក្នុងពិធីរាំធុងបាស ពិធីបុណ្យទាន និងការប្រគំតន្ត្រីជាដើម។
ក្រោយពីមានការត្រួតពិនិត្យអាវុធជាតិផ្ទុះពេលយប់ជាប្រចាំរួចមក គេសង្កេតឃើញថា ករណីបទល្មើសដែលស្ដែងចេញពីអំពើហិង្សាមានការថយចុះគួរឲ្យកត់សម្គាល់។ សន្តិសុខសុវត្ថិភាពនៅគ្រប់មូលដ្ឋាន គឺជាកត្តាចាំបាច់បំផុតសំរាប់ជីវភាពរស់នៅរបស់ប្រជាពលរដ្ឋ ដែលចាំបាច់ស្នងការដ្ឋាននគរបាលខេត្តកំពង់ឆ្នាំងបានសហការជាមួយបញ្ជាការដ្ឋានកងរាជអាវុធហត្ថខេត្ត នឹងនៅតែបន្តចុះត្រួតពិនិត្យនៅតាមគោលដៅជាច្រើនទៀត ដើម្បីរឹតបណ្ដឹងក្នុងការរក្សាសន្តិសុខ សុវត្ថិភាពក្នុងមូលដ្ឋានក្រុងកំពង់ឆ្នាំង ដោយបង្កើនការចុះត្រួតពិនិត្យអាវុធជាតិផ្ទុះទៅលើគ្រប់មធ្យោបាយគ្រប់ប្រភេទ ដែលធ្វើដំណើរនៅពេលយប់ និងដកហូតអាវុធដែលមានគ្រោះថ្នាក់ដល់មនុស្ស៕
( ឈៀង ថារិទ្ធ )
0 Comments