ភ្នំពេញ ៖ រថយន្តតាកូម៉ាមួយគ្រឿង បើកដោយបុរសជនជាតិចិនម្នាក់ ទំនងជាងងុយដេកបានជ្រុលទៅបុកនិងឡើងលើរបាំងថ្មពុះចែកទ្រូងផ្លូវនៅចំណុចមុខបុរី៩៩៩ កាលពីវេលាម៉ោង២និង៥០នាទីរំលងអាធ្រាត្រ ឈានចូលថ្ងៃទី២៧ ខែមករា ឆ្នាំ២០១៥ ស្ថិតក្នុងសង្កាត់ទំនប់ទឹក ខណ្ឌចំការមន។
សាក្សីបានឲ្យដឹងថា មុនពេលកើតហេតុគេបានឃើញរថយន្តម៉ាកតាកូម៉ាមួយគ្រឿង ពណ៌ទឹកប្រាក់ ពាក់ស្លាកលេខ 2W-8017 បើកបរដោយបុរសជនជាតិចិនម្នាក់ ធ្វើដំណើរតាមបណ្តោយផ្លូវលេខ២៧១ ក្នុងទិសដៅពីលិចទៅកើតក្នុងល្បឿនលឿន ខណៈមកដល់ចំណុចកើតហេតុបានរ៉េចង្កូតឡើងលើរបាំងថ្មពុះចែកទ្រូងផ្លូវបណ្ដាលឲ្យគល់ជាប់ទៅមុខលេងរួច ប៉ុន្តែមិនមាននណាម្នាក់រងរបួសនោះទេ ហើយរបាំងថ្មក៏រងរកាខូចខាតបន្តិចបន្តួចតែប៉ុណ្ណោះ។
ក្រោយពេលកើតហេតុ សមត្ថកិច្ចបានចុះមកដល់ចំណុចកើតហេតុ និងស្ទូចរថយន្តទៅរក្សាទុកនៅការិយាល័យចរាចរណ៍ជើងគោកដើម្បីរង់ចាំធ្វើការដោះស្រាយនៅពេលក្រោយ៕
ឌួងវិរះជ័យ
0 Comments