ភ្នំពេញ ៖ យោងតាមរបាយការណ៍ពីនាយកដ្ឋានសណ្ដាប់ធ្នាប់ នៃអគ្គស្នងការដ្ឋាននគរបាលជាតិឲ្យដឹងថា កាលពីថ្ងៃទី៩ ខែមករា ឆ្នាំ២០១៥នេះ មានហេតុការណ៍គ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន១២លើក ក្នុងនោះយប់០៧លើក, បណ្តាលឲ្យមនុស្សស្លាប់ចំនួន០៥នាក់ (ប្រុស) របួសធ្ងន់ ១២នាក់(ស្រី១នាក់) និងរបួសស្រាល៥នាក់(ស្រី១នាក់)។
នៅក្នុងករណីគ្រោះថ្នាក់ចរាចរណ៍ទាំង១២លើកនេះ បានបង្កឲ្យមានការខូចខាតយានយន្តសរុប ១៤គ្រឿង ក្នុងនោះមានម៉ូតូចំនួន០៥គ្រឿង,រថយន្តធុនតូចចំនួន០៥គ្រឿង,រថយន្តធុនធំ៣គ្រឿង,និងយានផ្សេងៗ៣គ្រឿង។
របាយការណ៍ខាងលើប្រាប់បន្តថា មូលហេតុ ដែលបណ្តាលឲ្យកើតមានហេតុការណ៍គ្រោះថ្នាក់ចរាចរណ៍ គឺបណ្តាលមកពី ល្មើសល្បឿន ០៧លើក, មិនប្រកាន់ស្តាំ០៣លើក,ប្រជែងគ្រោះថ្នាក់១លើក និងស្រវឹង១លើក។ ក្នុងនោះអ្នកជិះម៉ូតូគ្រោះថ្នាក់ដោយមិនបានពាក់មួកសុវត្ថិភាពចំនួន១៥នាក់(យប់១១នាក់)។
ប្រភពព័ត៌មានពីនាយកសណ្ដាប់ធ្នាប់ នៃអគ្គស្នងការដ្ឋាននគរបាលជាតិបញ្ជាក់ថា រថយន្តដែលត្រូវផាកពិន័យនៅអង្គភាព កាលពីថ្ងៃទី០៩ ខែមករា ឆ្នាំ២០១៥នេះ សរុបចំនួន៦២៦ គ្រឿង ក្នុងនោះមាន រថយន្តទេសចរណ៍គ្រួសារ ៥៩គ្រឿង, រថយន្តដឹកអ្នកដំណើរធុនតូច ២៣៧គ្រឿង, រថយន្តដឹកទំនិញធុនតូចចំនួន១០៩ គ្រឿង, រថយន្តដឹកទំនិញធុនធំ ២២១គ្រឿង។ រថយន្តទាំងអស់ត្រូវបានបង់ប្រាក់ពិន័យរួចនៅ អធិការដ្ឋាននគរបាលស្រុក ចំនួន ៤៨ គ្រឿង នៅស្នងការដ្ឋាននគរបាលខេត្ត ៥៧៨គ្រឿង៕
0 Comments