ភ្នំពេញ ៖ កំណាត់ចុងក្រោយនៃផ្លូវជាតិលេខ១ ប្រវែង៤គីឡូម៉ែត្រចាប់ពីគល់ស្ពានព្រះមុនីវង្សទៅដល់ក្តីតាកុយ នឹងត្រូវបើកដំណើរការសាងសង់នៅខែមីនាខាងមុខនេះ បន្ទាប់ពីការដោះស្រាយគោលនយោបាយនៃផលប៉ះពាល់បានបញ្ចប់នោះ។
យោងតាមសេចក្តីប្រកាសព័ត៌មានរបស់សាលារាជធានីភ្នំពេញបានឲ្យដឹងថា ការស្ថាបនាកំណាត់ផ្លូវជាតិលេខ១ចុងបញ្ចប់ប្រវែង៤គី ឡូម៉ែត្រនេះនឹងត្រូវចំណាយថវិកាជាង២,១១លានដុល្លារ ដែលជាជំនួយរបស់រដ្ឋាភិបាលជប៉ុន។ គម្រោងស្ថាបនាផ្លូវនេះនឹងដាក់ឲ្យដេញថ្លៃនៅខែកុម្ភៈខាងមុខនេះនៅទីក្រុងតូក្យូ ប្រទេសជប៉ុន ដែលការដ្ឋាននេះអាចបញ្ចប់ក្នុងរយៈពេល១ឆ្នាំ។ ផ្លូវជាតិលេខ១ ជាផ្លូវតភ្ជាប់របស់អាស៊ាន ហាយវ៉េលេខ១ ដែលឆ្លងពីប្រទេសវៀតណាមមកកម្ពុជាឆ្ពោះទៅប្រទេសថៃ ម៉ាឡេស៊ី និងប្រទេសសិង្ហបុរី។
សេចក្តីជូនដំណឹងដដែលបន្តថា ដោយមើលឃើញកំណាត់ផ្លូវ ៤គីឡូម៉ែត្រ មានកំណើន ចរាចរច្រើន និងជាចំណុចច្រកចេញចូល យ៉ាងសំខាន់របស់រាជធានីភ្នំពេញ រាជរដ្ឋាភិបាលជប៉ុន បានសម្តេចដំឡើងកម្រាស់ asphalt concrete (ac)រហូតដល់ ២០សង់ទីម៉ែត្រ ដែលពីមុនផ្លូវជាតិលេខ១ចាប់ពី(ពីអ្នកលឿង មកដល់ក្តីតាកុយ )មានកម្រាស់តែ ៧ទៅ៩ សង់ទីម៉ែត្រ តែប៉ុណ្ណោះ។ដូច្នេះហើយរាជរដ្ឋាភិបាលជប៉ុនបានបន្ថែមថវិកាចំនួន ២.១១លានដុល្លារ ទៀតលើគម្រោងនេះ។
ឥឡូវនេះអាជ្ញាធររាជធានីបានបញ្ចេញគ្រឿងចក្រ សម្រាប់ឈូស ឆាយបង្ហាប់ដីជាបណ្តើរៗនៅកន្លែង ដែលមានជង្ហុកសម្បុកមាន់ច្រើន ដើម្បីសម្រួលដល់ការធ្វើចរាចរ និងបំបាត់ដីហុយនៅលើកំណត់ផ្លូវនេះ៕
0 Comments