ព្រះសីហនុ ៖ ក្នុងអំឡុងរយៈពេលប៉ុន្មានថ្ងៃនេះ ក្រោយពីរបណ្ដាញសារព័ត៌មាន.កាសែត.ទូរទស្សន៍ក្នុងស្រុកជាច្រើនធ្វើការចុះផ្សាយរិះគន់នូវភាពមិនទទួលខុសត្រូវលើសពស្ត្រីរងគ្រោះម្នាក់មិនស្គាល់អត្តសញ្ញាណ ដែលត្រូវគេនាំគ្នាទុកចោលដូចខ្មោចឆ្កែតាំងពីស្លាប់រហូតដល់សពរលួយជ្រុះសាច់សល់តែគ្រោងឆ្អឹងត្រូវសត្វឆ្កែចោមរោមខាំហែកស៊ីស្អុយអសោចពេញភូមិរួចមក បញ្ហានេះបានក្លាយជាប្រធានបទដ៏ស្រួចស្រាល់សម្រាប់មហាជនទូទៅក្នុងខេត្តព្រះសីហនុ ជាពិសេសក្រុមអ្នកផឹកកាហ្វេតាមតុគុយទាវ ដោយពួកគេខ្លះនិយាយរិះគន់ត្រង់ៗថាខ្មោចមនុស្សទាំងមូលស្លាប់នៅចំកណ្ដាលក្រុង ហើយជាតំបន់ភ្ញៀវទេសចរចេញចូលឆ្លងកាត់ទៀត ហេតុអីបាននាំគ្នាទុកខ្មោចមនុស្សចោលដូចខ្មោចឆ្កែរហូតទាល់តែរលួយសល់តែគ្រោងឆ្អឹងទើបបាននាំគ្នាភ្ញាក់ផ្អើលរកអ្នកទទួលខុសត្រូវ។
ទង្វើបែបនេះវាជាការមិនទទួលខុសយ៉ាងពិតប្រាកដសម្រាប់មន្ត្រីសមត្ថកិច្ចដែលពាក់ព័ន្ធគ្រប់លំដាប់ថ្នាក់រាប់ចាប់ពីថ្នាក់អាជ្ញាធរមូលដ្ឋានភូមិ.សង្កាត់.ប៉ូលិសអធិការដ្ឋានក្រុង.រហូតដល់ស្នងការដ្ឋាននគរបាលខេត្ត ពីព្រោះជាធម្មតានៅពេលកើតមានបញ្ហាអ្វីមួយជាក់ស្តែងដូចជាសពស្ត្រីរងគ្រោះខាងលើនេះ ភ្លាមៗ មន្ត្រីអាជ្ញាធរមូលដ្ឋានត្រូវតែរាយការណ៍ទៅប៉ូលិសអធិការដ្ឋានក្រុងហើយប៉ូលិសអធិការដ្ឋានក្រុងទោះស្ថិតនៅក្នុងកាលៈទេសៈណាក៏ដោយ ក៏ត្រូវធ្វើរបាយការណ៍ ឬរាយការណ៍ជាបន្ទាន់ទៅស្នងការដ្ឋាននគរបាលខេត្តឲ្យបានជ្រាប និងសុំមន្ត្រីប៉ូលិសបច្ចេកទេសជំនាញចុះមកពិនិត្យផងដែរ។ ប៉ុន្តែជាលទ្ធផលចុងក្រោយបែរជារកអ្នកទទួលខុសត្រូវលើសពមិនឃើញទៅវិញ ហើយនាំគ្នាទុកសពចោលដូចខ្មោចឆ្កែរហូតទាល់តែរលួយសល់តែឆ្អឹងស្អុយអសោចបង្កភាពភ្ញាក់ផ្អើលស្ទើរទូទាំងក្រុង ហើយសមត្ថកិច្ចម្នាក់ៗបែរជាឆ្លើយដាក់គ្នាយករួចខ្លួនដូចនេះទៅវិញ វាមិនល្អទាល់តែសោះតើចំណុចមិនទទួលខុសត្រូវបែបនេះវាមកពីរមូលហេតុអ្វី។ ជាមួយនឹងការវែកញែករកភាពទទួលខុសត្រូវយ៉ាងស្រួចស្រាល់ពាក់ព័ន្ធនឹងសពស្ត្រីរងគ្រោះខាងលើនេះ ក៏មានក្រុមអ្នកផឹកកាហ្វេខ្លះបាននិយាយរិះគន់ថា សពស្លាប់នៅតាមទីសាធារណៈ តាមព្រៃ.តាមវាល ដែលគ្មានញាតិសន្តានដូចនេះ វាជាប្រពៃណីហើយមិនសូវមានគេរវីរវល់នោះទេ ពីព្រោះសពស្លាប់បែបនេះវាគ្មានអ្នកជួយឧបត្ថម្ភលាភសក្ការៈ តែបើសិនជាសពស្លាប់នៅតាមសណ្ឋាគារឬផ្ទះសំណាក់វិញនោះគេ តែងតែឃើញសមត្ថកិច្ចគ្រប់ស្ថាប័នពាក់ព័ន្ធពពាក់ពពូនគ្នាចុះទៅពិនិត្យមើលទៅដូចជាមានការទទួលខុសត្រូវខ្លាំងបំផុត ប៉ុន្តែទាំងនេះមិនមែនបានន័យថាក្រុមមន្ត្រីទាំងអស់នោះស្រឡាញ់ការងារ ឬតួនាទីខ្លួននោះទេ គឺគ្រាន់ធ្វើដើម្បីទទួលបាននៅផលប្រយោជន៍តែប៉ុណ្ណោះ(គឺស៊ីតាមជំនាញ) ហើយខ្មោចស្លាប់នៅក្នុងម្ចាស់ផ្ទះសំណាក់ ឬសណ្ឋាគារមួយៗម្ចាស់ទីតាំងនឹងត្រូវចំណាយលុយយ៉ាងតិចបំផុតក៏១០០០ដុល្លារដែរ បើមិនអញ្ចឹងទេខ្មោចនោះច្បាស់ជាត្រូវគេរកលេសនេះលេសនោះមិនឲ្យយកខ្មោចចេញពីផ្ទះ ដោយទុកខ្មោចឲ្យស្អុយជាក់ជាមិនខានឡើយ វាផ្ទុយទៅនឹងខ្មោចដែលស្លាប់តាមទីសាធារណៈឬក្នុងព្រៃ។
អ្វីដែលបានលើកឡើងខាងលើនេះវាជាធាតុ ពិតដែលកំពុងកើតមានយ៉ាងពេញបន្ទុក និងជាប្រពៃណីអស់ទៅហើយសម្រាប់សមត្ថកិច្ចគ្រប់លំដាប់ថ្នាក់ ដែលពាក់ព័ន្ធក្នុងខេត្តព្រះសីហនុ។ តាមរយៈការលើកឡើងនូវភាពមិនប្រក្រតីខាងលើនេះ ប្រជាពលរដ្ឋក្នុងខេត្តព្រះសីហនុសូមធ្វើការអំពាវនាវទៅដល់រដ្ឋមន្ត្រីក្រសួងមហាផ្ទៃមេត្តាមានវិធានការលើបញ្ហាអសកម្មបែបនេះផង ដើម្បីជាការអនុវត្តច្បាប់ក្នុងភាពថ្លៃថ្នូរ និងកិត្តិយស សន្តិសុខសុវត្ថិភាពសង្គមជាតិ ជាពិសេសកុំឲ្យខ្មាសភ្ញៀវទេសចរបរទេសដែលកំពុងពេញនិយមមកលេងកម្សាន្តក្នុងខេត្តព្រះសីហនុ។
គួររំលឹកផងដែរថា ករណីប្រទះឃើញសាកសពនេះបានកើតឡើងតាំងពីថ្ងៃទី៣១ ខែធ្នូ ឆ្នាំ២០១៤មកម្ល៉េះ ដោយសាកសពស្ថិតនៅត្រង់ចំណុចខ្ចុះមួយកន្លែងជាប់មាត់បឹងព្រែកទប់ស្រប់ និងដងផ្លូវសណ្ឋាគារប្រាំពីរជាន់ស្ថិតនៅក្នុងភូមិលេខ១ សង្កាត់លេខ៣ ក្រុងព្រះសីហនុ ហើយភ្លាមៗគ្រប់សមត្ថកិច្ចគេឃើញចុះទៅពិនិត្យមើលផងដែរ ប៉ុន្តែមិនបានធ្វើការវេចខ្ចប់ទុកដាក់សពយកទៅបូជា ឬកប់នោះទេបែរជានាំទុកចោលរហូតដល់ថ្ងៃទី០៧ ខែមករា ឆ្នាំ២០១៥ សពឡើងស្អុយរលួយត្រូវសត្វឆ្កែខាំហែកស៊ីអូសពេញភូមិបង្កភាពភ្ញាក់ផ្អើលទើបនាំគ្នាឆោឡោរកអ្នកទទួលខុសត្រូវ៕
0 Comments