ក្រុមបាល់ទាត់ក្រសួងការពារជាតិ និងក្រុម Albirex Niigata រកបាន៣ពិន្ទុម្នាក់បន្ថែមទៀត សម្រាប់ការប្រកួតជម្រុះតាមតំបន់មណ្ឌលរាជធានីភ្នំពេញ នៃព្រឹត្តិការណ៍ Hun Sen-Cup នាថ្ងៃទី៩ខែមករា ឆ្នាំ២០១៥។
នៅក្នុងការប្រកួតជម្រុះលើកទី២នេះ ក្រុមក្រសួងការពារជាតិបានបានលុតក្រុមអាកាសចរស៊ីវិលយ៉ាងចាស់ដៃក្នុងលទ្ធផល១៨ទល់១ បន្ទាប់ពីលើកទី១ក្រុមនេះបានឈ្នះក្រុមព្រែកជ័យកីឡា ៣ទល់០នោះ។ កីឡាករភួង សុខសាណាម្នាក់ឯងទាត់បញ្ចូលទីបាន៩គ្រាប់នៅនាទី 4', 10', 23',26', 36', 44',62', 63', 67'។
ជាមួយនឹងជ័យជំនះនេះ បានធ្វើឲ្យ២ ប្រកួតរបស់ក្រសួងការពារជាតិមាន៦ ពិន្ទុ ដោយសារឈ្នះទាំង២ ប្រកួត ឯក្រុមអាកាសចរស៊ីវិលទើបលេងបាន១ ប្រកួតដែលលេងចាញ់ទ័ពនេះឯង។
ចំពោះក្រុម Albirex Niigata ក៏មាន៦ពិន្ទុដូចក្រុមក្រសួងការពារជាតិដែរ ដែលក្នុង២ប្រកួតឈ្នះទាំងពីរប្រកួត គឺលើកទី១ប្រកួតឈ្នះខណ្ឌទួលគោក២ ទល់០ និងលេងលើកទី២នេះ បានយកឈ្នះក្រុមខណ្ឌជ្រោយចង្វា៣ទល់១។
ក្រុមខណ្ឌជ្រោយចង្វា ពេលនេះ២ ប្រកួត ចាញ់ទាំង២ ប្រកួតមាន០ពិន្ទុ។ គួរបញ្ជាក់ថា ការប្រកួតដំបូងរបស់ខណ្ឌជ្រោយចង្វាចាញ់ក្រុមគីរីវង់សុខសែនជ័យ១ទល់២ ហើយលើកទី២នេះចាញ់ Albirex Niigata ១ទល់៣ទៀត។ ក្រុមនេះ ទំនងជាគ្មានឱកាសបានឡើងលេងបន្តវគ្គ១៦ក្រុមចុងក្រោយនោះទេ។
ចំណែកការប្រកួតមួយគូទៀត ក្រុមខណ្ឌទួលគោក ប្រកួតចាញ់ ក្រុមគីរីវង់សុខសែនជ័យ០ ទល់៣។ ២ប្រកួតរបស់ក្រុមខណ្ឌទួលគោកចាញ់ទាំង ២ ប្រកួត មាន ០ពិន្ទុ ក្នុងខណៈដែល ២ ប្រកួតរបស់គីរីវង់សុខសែនជ័យឈ្នះទាំង២ប្រកួតមាន៦ពិន្ទុ។
សម្រាប់ការប្រកួតជម្រុះក្នុងតំបន់រាជធានីភ្នំពេញ ដែលមាន៧ ក្រុម ចែកជា ២ ពូល ដែលពូលAមាន៣ក្រុម ហើយពូលBមាន៤ក្រុមនោះ គឺជម្រុះយកតែ៣ ក្រុមឡើងលេងបន្តប៉ុណ្ណោះ៕
0 Comments