ភ្នំពេញ ៖ ជនសង្ស័យ២នាក់ ត្រូវបានកម្លាំងកងរាជអាវុធហត្ថមូលដ្ឋានខណ្ឌដង្កោ ធ្វើការ ឃាត់ខ្លួន ជាក់ស្តែងករណីគាស់ផ្ទះប្រជាពលរដ្ឋលួចទ្រព្យសម្បត្តិមិនបានសម្រេច។
ហេតុការណ៍កើតឡើង កាលពីវេលាម៉ោង ២៣ និង៣៥នាទី យប់ថ្ងៃទី១ ខែមករា ឆ្នាំ២០១៥ នៅចំណុចផ្ទះលេខ០៩ ផ្លូវបេតុងបឹងតាម៉ាត ស្ថិតក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
ជនសង្ស័យទី១ឈ្មោះ ប៊ុន ណារ៉ូ ភេទប្រុស អាយុ២០ឆ្នាំ មុខរបរមិនពិត ប្រាកដ មានទីលំនៅផ្ទះជួលភូមិឫស្សី សង្កាត់ស្ទឹងមានជ័យ ខណ្ឌមានជ័យ និងទី២ឈ្មោះ អាន ពៅ ភេទប្រុស អាយុ៣៣ឆ្នាំ មុខរបរមិនពិតប្រាកដ ស្នាក់នៅនៅផ្ទះជួលភូមិឫស្សី សង្កាត់ស្ទឹងមានជ័យ ខណ្ឌមានជ័យ។ ចំណែកជនរងគ្រោះឈ្មោះ អាង សមិទ្ធ ភេទប្រុស អាយុ២៩ឆ្នាំ មុខរបរជាងម៉ាស៊ីន បច្ចុប្បន្នរស់នៅផ្ទះជួលលេខ០៩ កន្លែងកើតហេតុ។
លោកអនុសេនីយ៍ឯក ជា ផល្លា មេបញ្ជាការរងអាវុធហត្ថខណ្ឌដង្កោ ទទួលបន្ទុក ស្រាវជ្រាវ យុត្តិធម៌ ប្រាប់ឲ្យដឹងថា ជនសង្ស័យទាំង ២នាក់ ត្រូវបានកម្លាំងល្បាតរបស់លោកឃាត់ខ្លួនជាក់ស្តែង ខណៈដែលពួកវាជិះម៉ូតូ ០១ គ្រឿង ម៉ាក ស៊ុបព័រ គុប ជ្រុង សេ៥០ ពណ៌ទឹកប្រាក់ ពាក់ស្លាកលេខ ព្រៃវែង 1A-8708 ធ្វើសកម្មភាពគាស់ផ្ទះរបស់ជនរងគ្រោះខាងលើ តែមិនបានសម្រេច ដោយម្នាក់ជាអ្នកធ្វើសកម្មភាព និងម្នាក់ទៀតជាអ្នកចាំម៉ូតូ។
លោកអនុសេនីយ៍ឯក ជា ផល្លា ប្រាប់បន្តថា ក្រោយឃាត់ខ្លួនធ្វើការសាកសួរ ជនសង្ស័យទាំង២នាក់ ឆ្លើយសារភាពថា ពួកគេពិតជាបានធ្វើសកម្មភាពឆ្កឹះសោរ និងគាស់ផ្ទះ ប្រជាពលរដ្ឋ ដើម្បីលួចទ្រព្យសម្បត្តិប្រាកដមែន ប៉ុន្តែមិនបានសម្រេចនោះទេ ត្រូវសមត្ថកិច្ច ឃាត់ជាប់ទាំង២នាក់។ ក្នុងនោះជនសង្ស័យឈ្មោះ អាន ពៅ ក៏ធ្លាប់ជាប់គុកព្រៃស ចំនួន ៣ឆ្នាំ ពីបទលួច ហើយជនសង្ស័យទាំង ២នាក់ ក៏ជាមុខសញ្ញាប្រើប្រាស់គ្រឿងញៀនផងដែរ។ ជន សង្ស័យទាំង២នាក់ ក្រោយពីធ្វើការសាកសួរ បានបញ្ជូនបន្តទៅកាន់ទីបញ្ជាការដ្ឋានកងរាជអា វុធហត្ថរាជធានីភ្នំពេញ ចាត់ការតាមនីតិវិធី។
លោកអនុសេនីយ៍ឯក ជា ផល្លា ប្រាប់បញ្ជាក់ឲ្យដឹងថា ដោយមានការចង្អុលបង្ហាញពីលោកឧត្តមសេនីយ៍ទោ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ក៏ដូចជា ការបញ្ជាផ្ទាល់ពីលោកវរសេនីយ៍ទោ ស សុភណ្ឌ័ មេបញ្ជាការកងរាជអាវុធហត្ថខណ្ឌដង្កោ លោកតែងតែដឹកនាំកម្លាំងចុះល្បាតនៅក្នុងមូលដ្ឋានទាំងយប់ទាំងថ្ងៃ ពួនស្ទាក់ ទប់ស្កាត់រាល់បទល្មើសទាំងឡាយ កុំឲ្យកើតមានឡើង ដើម្បីរក្សាការពារសន្តិសុខ សុវត្ថិភាព ជួនប្រជាពលរដ្ឋ។
សូមបញ្ជាក់ថា ក្នុងការបង្ក្រាបជនសង្ស័យនេះ លោក នុត ពុធដារ៉ា អភិបាលខណ្ឌដង្កោ បានឧបត្ថម្ភនូវទឹកប្រាក់ចំនួន ១លានរៀល និងលោក វើក សាមឿន ចៅសង្កាត់ដង្កោ ក៏បានឧបត្ថម្ភនូវទឹកប្រាក់ចំនួន ២០ម៉ឺនរៀល ផងដែរ ដល់កងកម្លាំងអាវុធហត្ថ៕
0 Comments