កណ្ដាល ៖ ប្រជាកសិករមួយគ្រួសាររស់នៅភូមិត្រពាំងទួលឃុំសំរោងលើស្រុកអង្គស្នួលត្រូវបានចោរលួចគោរបស់គាត់អស់បីក្បាលទាំងយប់មិនដឹងថា ចោរចូលទៅលួចពីពេលណានោះទេបន្ទាប់ពីភ្ញាក់ពីដេកនៅវេលាម៉ោង៤ទៀបភ្លឺថ្ងៃទី៩ខែមករាក៏ស្រាប់តែបាត់គោអស់ពីក្រោល តែម្ដងពេលនាំគ្នាតាមរកឃើញស្នាមចោរព្រលះនៅសល់តែក្បាលនិងសាច់មួយចំនួន ដែលការនៅសល់បែបនេះដោយសារចោរយកមិនអស់ព្រោះគោរហូតដល់បីក្បាលឯណោះដូច្នេះនៅសល់សាច់ខ្លះទុកឲ្យម្ចាស់ហូបដែរ។
ជនរងគ្រោះម្ចាស់គោមានឈ្មោះជឿន សុធា ភេទប្រុស អាយុ៣៦ឆ្នាំមុខរបរកសិកររស់នៅភូមិកើតហេតុ។ គោដែលចោរលួចនោះមានបីក្បាលក្នុងនោះមានគោញី១ក្បាលនិងគោទឹមពីរក្បាលសុទ្ធតែធាត់ៗ។
បើតាមជនរងគ្រោះបានសន្និដ្ឋានថា ចោរអាចមានគ្នាប្រហែលបីនាក់ទើបអាចលួចគោបានរហូតដល់ទៅបីក្បាលក្នុងពេលតែមួយ។ ជនរងគ្រោះបន្ដថា កាលពីវេលាម៉ោងប្រហែល១រំលងអធ្រាត្រគាត់បានក្រោកពីដេកចុះមកមើលគោរបស់គាត់ដោយដាក់ចំបើងឲ្យគោស៊ីនៅក្នុងក្រោលទាំងអស់មិនទាន់បាត់ទៅណាទេ ប៉ុន្ដែរហូតមកដល់ម៉ោងប្រហែល៤ទៀបភ្លឺគាត់បានក្រោកពីដំណេកឡើងក៏ស្រាប់តែបាត់គោអស់ពីក្រោលតែម្ដង។ បន្ទាប់ពីដឹងថា បាត់ក៏មានការភ្ញាក់ផ្អើលឆោឡោឡើងដឹងដល់អ្នករស់នៅជិតខាងក៏នាំគ្នាជួយដើររកហើយក៏ប្រទះឃើញស្នាមចោរព្រលះយកសាច់នៅចំណុចវាលស្រែខាងលិចភូមសាំងដំរីឃុំឆក់ឈើនាងស្រុកអង្គស្នួល។
ពេលនោះគេឃើញនៅសល់ក្បាលគោនិងសាច់គោមួយចំនួនចោរព្រលះយកតែចាច់ភ្លៅ ជើងមុខក្រោយនិងសាច់ល្អៗមួយចំនួនទៀតក្រោយពីនេះគេបានទុកចោលនៅរាយប៉ាយទីនោះត្រូវបានម្ចាស់គោនិងអ្នកជិតខាងនាំគ្នាប្រមូលយកសាច់គោដែលសេសសល់ពីចោរយមកធ្វើម្ហូបចែកគ្នាហូបទៅ។
ជាមួយគ្នានេះនគរបាលក៏បានធ្វើការស្រាវជ្រាវដែរក្រែងអាចរកមុខចោរឃើញតែករណីចោរលួចគោបែបនេះពិបាករកដែរដោយសារក្រុមចោរទាំងនោះភាគច្រើនមិននៅក្នុងមូលដ្ឋានទេច្រើនតែមកពីខាងក្រៅស្រុក៕
វិទូ
0 Comments