នគរបាល​មន្ទីរ​ប្រឆាំង​គ្រឿងញៀន បាន​បង្ហាញ​មុខសញ្ញា​ជួញដូរ​គ្រឿងញៀន​១០​នាក់ ​និង​គ្រឿង​ញៀន​ជិត​មួយ​គីឡូក្រាម​

ភ្នំពេញ ៖ កាលពី​រសៀល​ថ្ងៃទី​៩ ខែមករា ឆ្នាំ​២០១៥ នគរបាល​មន្ទីរ​ប្រឆាំង​គ្រឿងញៀន​នៃ​អគ្គស្នង​ការ​ដ្ឋាន​នគរ​បាល​ជាតិ​បាន​ធ្វើការ​បង្ហាញមុខ​សញ្ញា​ជនសង្ស័យ​ជួញដូរ​គ្រឿងញៀន​ចំនួន​១០​នាក់ ដែល​ក្នុង​នោះ​មាន​បុរស​ជនជាតិ​នីហ្សេរីយ៉ា​ចំនួន​០៨​នាក់ និង​នារី​ជនជាតិ​ខ្មែរ​០២​នាក់ រួម​ទាំង​គ្រឿង​ញៀន​ប្រភេទ​មេ​តំ​ហ្វេ​តា​មីន​ចំនួន​៨០២,៤៤​ក្រាម ជញ្ជីង​សម្រាប់​ថ្លឹង ទូរស័ព្ទ​ដៃ​ជាច្រើន​គ្រឿង និង​វត្ថុ​តាង​មួយ​ចំនួន​ទៀត ដែល​ធ្វើការ​បង្ហាញ​និង​ធ្វើតេស្ត​នៅ​ចំពោះមុខ​ជនសង្ស័យ​ទាំងអស់​ផង​ដែរ។​

ជនសង្ស័យ​ដែល​ជា​មុខសញ្ញា​ជួញដូរ​គ្រឿងញៀន​ទាំង​១០​នាក់​ដែល​ត្រូវ​ឃាត់ខ្លួន​រួមមាន ទី​1.ឈ្មោះOkorom Kizito ទី​2. ឈ្មោះFrancis nnamdi ទី​3.ឈ្មោះNna buifefa vour okorom ទី​4.​ឈ្មោះ​Sunday nwabuisi ទី​5.ឈ្មោះ Nna mezie Victor ទី​6. ឈ្មោះIzuchukkwu Chukwma ទី​7.ឈ្មោះ Tony mmaduka chu kwuonye ទី​8.ឈ្មោះ Simon maduka uka ndu និង​នារី​ជនជាតិ​ខ្មែរ​ទី១-​ឈ្មោះ ម៉ន វិ​ន​យុង និង​ទី​២-ឈ្មោះ អេង ច​ន្ធី​នាថ។​

បញ្ជាក់​បន្ថែម​ដែរ​ថា កាលពី​រសៀល​ថ្ងៃទី​៨ ខែមករា ឆ្នាំ​២០១៥ កិច្ចប្រតិបត្តិការ​បង្ក្រាប​ករណី​ជួញដូរ​គ្រឿងញៀន​ខាងលើ ដឹកនាំ​បញ្ជា​ដោយ​លោក ខៀវ សាម៉ន ប្រធាន​មន្ទីរ​ប្រឆាំង​គ្រឿងញៀន នៃ​អគ្គស្នងការដ្ឋាន​នគរ​បាល​ជាតិ ដោយមាន​សម្របសម្រួល​ពី​លោក កែវ សុជាតិ ព្រះរាជអាជ្ញា​រង អម​សាលាដំបូង​រាជធានី​ភ្នំពេញ និង​កម្លាំង​ជំនាញ​នៃ​មន្ទីរ​ប្រឆាំង​គ្រឿងញៀន ក្រសួងមហាផ្ទៃ សហការ​ជាមួយ​កម្លាំង​នគរបាល​មូលដ្ឋាន​ចុះ​ឆែកឆេរ​លំនៅ​ដ្ឋាន​រស់នៅ​របស់​ជនជាតិ​ស្បែក​ខ្មៅ​ខាងលើ​ចំនួន​ប្រាំ​ទីតាំង ស្ថិត​ក្នុង​ភូមិសាស្ត្រ​ខណ្ឌ​ចំនួន​២ គឺ​ខណ្ឌមានជ័យ និង​ខណ្ឌចំការមន ទើប​ឈាន​ទៅ​ដល់​ការ​ចាប់​ឃាត់ខ្លួន​ជនសង្ស័យ​ទាំងអស់​ខាង​លើ​នេះ។​

បច្ចុប្បន្ន​ពាក់ព័ន្ធ​នឹង​ជនសង្ស័យ សមត្ថកិច្ច​នគរបាល​មន្ទីរ​ប្រឆាំង​គ្រឿងញៀន នៃ​អគ្គស្នងការ​ដ្ឋាន​នគរ​បាល​កំពុងធ្វើការ​ក៏​សាង​សំណុំរឿង​ដើម្បី​បញ្ជូន​ទៅ​សាលាដំបូង​រាជធានី​ភ្នំពេញ៕

​រ៉ា​វុ​ទ្ធ​