ភ្នំពេញ ៖ នៅក្នុងឆ្នាំ២០១៤ដែលទើបកន្លងផុតទៅកាលពីពេលថ្មីៗនេះមានរឿងរ៉ាវរបស់តារាសិល្បៈខ្មែរចំនួន៥ដួងបានក្លាយជាហេតុការណ៍ដែលទទួលបានការចាប់អារម្មណ៍ខ្លាំងពីមជ្ឈដ្ឋានមហាជន ទូទៅ។
១ . តារាចម្រៀង អូ រស្មីៈ នៅក្នុងឆ្នាំ២០១៤តារាចម្រៀងរូបនេះបានធ្វើឲ្យមជ្ឈដ្ឋាននានា ផ្ដោត ការចាប់អារម្មណ៍ខ្លាំងតាមរយៈរឿងហេតុនាំក្មេងស្រីទៅរួមភេទជាមួយភ្ញៀវកាលពីថ្ងៃទី១៨ ខែមករា ឆ្នាំ២០១៤។ តារាចម្រៀងសំនៀងរដឺនដែលមានវ័យប្រមាណ៣៦ឆ្នាំរូបនេះ ត្រូវបានកម្លាំង នគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាល រាជ ធានីភ្នំពេញ ចាប់ឃាត់ខ្លួនពីបទនាំក្មេងស្រីមិនទាន់គ្រប់អាយុទៅរួមភេទជាមួយអាណិកជនក្រោមការ សន្យាថា ក្រោយរួមភេទជាមួយភ្ញៀវរួចនាងនឹងជួយឲ្យក្មេងស្រីរងគ្រោះក្លាយជាតារាចម្រៀងដ៏ ល្បីនៅកម្ពុជា។
២ . អតីតតារាសម្ដែងល្បី ស្រីតូច ចំណានៈ នៅក្នុងឆ្នាំ២០១៤ អតីតតារាសម្ដែង និង ពិធីការិនី អ្នកនាង ម៉ៅ សុចំណាន ហៅស្រីតូច ចំណាន ហាក់បានចេញមុខមាត់ពិតច្រើនបន្ទាប់ពី នាងបានរស់នៅក្នុងស្ថានភាពលាក់បាំងទាក់ទងនឹងរឿងរ៉ាវស្នេហាមិនចេញមុខក្រោយពីបានផ្តាច់ ខ្លួនចេញពីពិភពសិល្បៈអស់រយៈពេលជាង១០ឆ្នាំកន្លងមកនោះ។ ខណៈរូបថតជាច្រើនសន្លឹកដែលបង្ហាញពីសុភមង្គលនៃចំណងស្នេហារបស់នាងជាមួយនឹងលោកឧកញ៉ា គិត ម៉េង រួមទាំងកូនៗ ត្រូវបានបែកធ្លាយនោះ ពោលគឺព័ត៌មានស្ដីពីរឿងរ៉ាវស្នេហារបស់អតីតតារាសម្ដែង និងជាពិធីការិនី ល្បីរូបនេះក៏ត្រូវបានមជ្ឈដ្ឋានទូទៅផ្ដោតការចាប់អារម្មណ៍ខ្លាំង ក្នុងនេះក៏មានមហាជនភាគច្រើនបាន សម្ដែងការកោតសរសើរចំពោះជោគវាសនារបស់នាងដែលមានស្វាមីជាអ្នកជំនួញមានទ្រព្យសម្បត្តិ ស្ដុកស្ដម្ភថែមទៀត។
៣ . កំពូលតារាចម្រៀង ព្រាប សុវត្ថិៈ កាលពីថ្ងៃទី២៩ ខែមីនា ឆ្នាំ២០១៤ កំពូលតារា ចម្រៀងដ៏ល្បីល្បាញប្រចាំផលិតកម្ម ហង្សមាស និងរស្មីហង្សមាស រូបនេះបានធ្វើឲ្យមានការភ្ញាក់ ផ្អើលទាក់ទិននឹងរឿងរ៉ាវជម្លោះដ៏ចម្រូងចម្រាសមួយជាមួយនឹងក្រុមហ៊ុនប្រព័ន្ធទូរស័ព្ទ Smart រហូត ឈានដល់ការប្តឹងឲ្យបិទការប្រគំតន្ត្រីដ៏ធំមួយដែលធ្វើឡើងនៅខេត្តស្ទឹងត្រែង។ បញ្ហាជម្លោះនេះកើត ឡើងដោយសារតារាចម្រៀងដ៏ល្បីរូបនេះបានខឹងសម្បាទៅនឹងអ្នកគ្រប់គ្រងកម្មវិធីប្រគំតន្ត្រីនេះបាន រចនាផ្ទាំងផ្សព្វផ្សាយដាក់រូបតារាចម្រៀង ខេមរៈ សេរីមន្ត នៅពីលើ និងធំជាងរូបភាពខ្លួន។
៤ . តារាសម្ដែង ពិធីការិនី និងជាតារាបង្ហាញម៉ូដ ចន ច័ន្ទលក្ខិណាៈ បន្ទាប់ពីរឿងរ៉ាវលែង លះគ្នាជាមួយនឹងអតីតស្វាមីនោះ តារាសម្តែង ពិធីការិនី និងជាតារាបង្ហាញម៉ូដ អ្នកនាង ចន ច័ន្ទ លក្ខិណា ក៏បានធ្វើឲ្យមជ្ឈដ្ឋានមហាជនមានការភ្ញាក់ផ្អើលជាមួយនឹងរឿងប្រមូលស្នាមមេដៃមិត្តអ្នក សិល្បៈដើម្បីស្នើសុំទៅក្រសួងពាក់ព័ន្ធធ្វើការពន្យារពេលក្នុងការអនុញ្ញាតឲ្យចាក់ បញ្ចាំងខ្សែភាពយន្តភាគថៃជាថ្មីនៅលើកញ្ចក់ទូរទស្សន៍នានានៅក្នុងស្រុក។ ក្រៅពីទទួលបាននូវប្រតិកម្ម និងការរិះគន់ ខ្លះៗនោះ សកម្មភាពរបស់តារាសិល្បៈមួយដួងនេះក៏ទទួលបាននូវការគាំទ្រ ការកោតសរសើរ និង ទទួលបាននូវលទ្ធផលមួយជំហានផងដែរ។
៥ . តារាកំប្លែង នាយ ពែកមីៈ ក្រោយពីជួបនូវព្យុះព័ត៌មានមានទំនាក់ទំនងស្នេហាលួចលាក់ ជាមួយតារាកំប្លែងស្រីរួមក្រុមគឺនាងខ្ញុងនោះ តារាកំប្លែងដែលជាអតីតកម្មករសំណង់រូបនេះក៏បានធ្វើ ឲ្យមជ្ឈដ្ឋានមហាជនមានការចាប់អារម្មណ៍ និងធ្វើការរិះគន់ផងដែរទាក់ទិននឹងការលាក់បាំងរឿងរ៉ាវ កើតមានករណីគ្រោះថ្នាក់ក្រឡាប់រថយន្តនៅខេត្តកំពតកាលពីល្ងាចថ្ងៃទី១២ ខែវិច្ឆិកា ឆ្នាំ២០១៤ កន្លងមក៕
0 Comments