ព្រះសីហនុ ៖ ជនជាតិរុស្ស៊ីម្នាក់ត្រូវបានសមត្ថកិច្ចប៉ូលិសចរាចរណ៍ជើងគោកនៃស្នងការដ្ឋាននគរបាលខេត្តព្រះសីហនុសម្រេចបញ្ជូនខ្លួនទៅកាន់សាលាដំបូងខេត្តនៅព្រឹកថ្ងៃទី២ ខែមករា ឆ្នាំ២០១៥នេះដើម្បីចាត់ការតាមនីតិវិធីច្បាប់ពាក់ព័ន្ធបទចោទប្រកាន់បើកបរបង្កគ្រោះថ្នាក់ចរាចរណ៍ក្នុងស្ថានភាពស្រវឹង។
នេះជាលើកទីមួយហើយដែលគេមើលឃើញពីរភាពច្បាស់លាស់ក្នុងការអនុវត្តន៍ច្បាប់របស់មន្ត្រីប៉ូលិសចរាចរណ៍ខេត្តព្រះសីហនុ។ ប៉ុន្តែទោះជាយ៉ាងនេះក្តីក៏មានប្រភពមួយបានលូចខ្សឹបប្រាប់ឲ្យដឹងថា ការចាប់បញ្ជូនជនជាតិរុស្សីខាងលើនេះទៅតុលាការវាជាជម្រើសចុងក្រោយ ខណៈពេលការចរចាគ្នាពាក់ព័ន្ធរឿងលុយកាក់បិទសំណុំរឿងមិនបានសម្រេចនោះ។
ជនជាតិរុស្សីខាងលើមានឈ្មោះVictorstupakivភេទប្រុសអាយុ២៥ឆ្នាំបើកបររថយន្តម៉ាក(PAELVDE)ពណ៌សពាក់ស្លាកលេខព្រះសីហនុ2A.4670មានទីលំនៅបណ្ដោះអាសន្ននៅក្នុងសង្កាត់លេខ៤ក្រុងព្រះសីហនុ ខេត្តព្រះសីហនុ។
គួរបញ្ជាក់ថាជនជាតិរុស្សីខាងលើនេះកាលពីវេលាម៉ោង៩និង៣០នាទីថ្ងៃទី០១ ខែមករា ឆ្នាំ២០១៥ស្ថិតនៅក្នុងស្ថានភាពស្រវឹងជោកបានបើករថយន្តរបស់ខ្លួនម៉ាក(PAELVDE)ក្នុងល្បឿនលឿនតាមបណ្ដោយផ្លូវឯករាជ្យក្នុងគោលដៅពីរង្វង់មូលតោ២ទៅផ្សារលើ ហើយក៏បានទៅបុករថយន្តមួយគ្រឿងម៉ាកតូយូតា(កាមរី) ពណ៌សពាក់ស្លាកលេខភ្នំពេញ2X9363 ដែលបើកបរដោយឈ្មោះឡាំឆាយាភេទប្រុសអាយុ២៨ឆ្នាំមានមុខរបរលក់ដូរ.មានទីលំនៅសង្កាត់បឹងសាឡាងខណ្ឌទួលគោក រាជធានីភ្នំពេញគឺបុកនៅត្រង់ចំណុចខាងមុខហាងលក់ស៊ុបណាក់ណាក់ក្នុងគោលដៅបញ្ច្រាសទិសគ្នាបណ្ដាលឲ្យរងការខូចខាតជាទម្ងន់ក្នុងពេលនោះតែម្ដង។ ក្រោយពេលកើតហេតុរថយន្តរងគ្រោះ និងរថយន្តបង្កហេតុត្រូវបានសមត្ថកិច្ចប៉ូលិសចរាចរណ៍នាំយកទៅរក្សាទុកនៅការិយាល័យប៉ូលិសចរាចរណ៍ជើងគោខេត្តដើម្បីធ្វើការដោះស្រាយគ្នា។
ការចរចាររវាងជនរងគ្រោះ និងជនបង្កហេតុជនជាតិរុស្សីពាក់ព័ន្ធនឹងសំណង់ថ្លៃការខូចខាតមិនសូវចោទជាបញ្ហានោះទេគឺអាចនិយាយគ្នាបាន ប៉ុន្តែការចរចាបិទសំណុំរឿងស៊ីដាច់ត្រឹមប៉ូលិសមិនបញ្ជូនទៅតុលាការមិនសម្រេច ដោយសារមានចំនួនច្រើនពេកធ្វើឲ្យជនជាតិរុស្សីនោះគ្មានលទ្ធភាពក៏ត្រូវគេបញ្ជូនទៅសាលាដំបូងខេត្តដូចនេះតែម្តង៕
0 Comments