ព្រះវិហារ ៖ វត្តដំបូកខ្មៅក្របៅជ្រំតាំងខ្លួននៅលើកំពូលភ្នំត្បែងមានជ័យ ស្ថិតនៅភូមិបេងកោង ឃុំព្រះឃ្លាំង ស្រុកត្បែងមានជ័យ ជាទីកន្លែងគោរពសក្ការៈបូជាមួយដ៏ល្បីដែលប្រជាជននៅទូទាំងខេត្តព្រះវិហារតែងតែចងចាំនិងនិយាយរំលឹកពីជំនឿបារមីលោកតាឥសីគង់ស្ថិតថែរក្សាទីវត្តអារាម និងប្រជាជនរស់នៅជុំវិញទីនោះទទួលបានភាពសុខសាន្តរហូតមកដល់បច្ចុប្បន្ន។
ភាពល្បីល្បាញដូចបានអធិប្បាយនេះ គឺបានទាក់ទាញសប្បុរសជនក្នុង និងក្រៅប្រទេសចូលរួមបរិច្ចាគថវិកា ធនធានសម្ភារៈមានតំលៃយ៉ាងច្រើនដើម្បីចូលរួមចំណែកកសាងសំណង់ព្រះវិហារនិងជណ្ដើរបេតុងបង្កាន់ដៃនាគមានកាំជណ្តើរជាង៧០០កាំទ្បើងទៅកាន់វត្តដំបូកខ្មៅ ស្ថិតនៅលើកំពូលភ្នំត្បែងមានជ័យ។ នៅសងខាងជណ្ដើរទ្បើងទៅកាន់កំពូលភ្នំមានគម្របព្រៃប្រឹក្សាពណ៌បៃតង និងដើមឈើតូច-ធំដុះមីរដេរដាស ចាប់តាំងពីក្រោមជើងភ្នំរហូតដល់កំពូលភ្នំ គួរឲ្យយើងចង់ទស្សនាគយគន់។
ទីតាំងភូមិសាស្ត្រចូលទៅកាន់ទីវត្តអារាម គឺមានចម្ងាយផ្លូវប្រវែង៥០០ម៉ែត្រភ្ជាប់ពីផ្លូវជាតិលេខ៦២អមដោយលំនៅដ្ឋានប្រជាជន,ចំការកៅស៊ូនិងចំការចេករឹតតែទាក់ទាញអារម្មណ៍យើងឲ្យមានភាពធូរស្បើយសប្បាយរីករាយថែមទៀត។ នៅតំបន់ក្បែរជើងភ្នំត្បែងមានជ័យជិតវត្តដំបូកខ្មៅក៏មានរមណីយដ្ឋានធម្មជាតិទឹកធ្លាក់១កន្លែងទៀតគួរឲ្យយើងចង់ទៅទស្សនាដើរកំសាន្តសប្បាយជាលក្ខណៈក្រុមគ្រួសារថែមទៀត។
ប្រជាជននៅមូលដ្ឋាន និងពុទ្ធបរិស័ទគោរពព្រះពុទ្ធសាសនាមកពីទីជិតឆ្ងាយនៅទូទាំងព្រះរាជាណាចក្រកម្ពុជាបានផ្ដល់គុណតំលៃ ចាត់ទុកវត្តដំបូកខ្មៅក្របៅជ្រំជាទីកន្លែងគោរពសក្ការៈបូជាផង និងជាទីកន្លែងរមណីយដ្ឋានធម្មជាតិដ៏ប្រណីតថែមទៀត ព្រោះរាល់ពេលមានពិធីបុណ្យធំមានមនុស្សចាស់-ក្មេងជាច្រើននាក់ បាននាំគ្នាទៅជួបជុំដើរកំសាន្តសប្បាយនៅទីនោះ។
ប្រជាពលរដ្ឋម្នាក់រស់នៅក្បែរវត្តដំបូកខ្មៅឈ្មោះ ទេព ចាន់ស៊ី ភេទស្រី អាយុ៤៥ឆ្នាំ បានរៀបរាប់ឲ្យអ្នកសារព័ត៌មានដឹងថា សព្វថ្ងៃនេះសមិទ្ធផលវត្តដំបូកខ្មៅមានការរីកចម្រើនជាលំដាប់ដោយសារកម្លាំងសាមគ្គីមានការចូលរួមចំណែកធនធានផ្ទាល់ពីសំណាក់ប្រជាជននៅមូលដ្ឋាន និងពុទ្ធបរិស័ទជិតឆ្ងាយ។ ម្យ៉ាងទៀតដោយមានកត្តាគ្រប់គ្រងល្អរបស់ព្រះចៅអធិការវត្តដែលបានខំសន្សំបច្ច័យទុកសម្រាប់តែកសាងអភិវឌ្ឍន៍ទីវត្តអារាមនិងព្រះវិហារ។
ប្រជាពលរដ្ឋបន្តទៀតថា ការចាប់កំណើតកសាងជណ្ដើរដ៏វែងអស់រយៈពេល៧ឆ្នាំកន្លងមកដើម្បីធ្វើដំណើរទ្បើងទៅកាន់វត្តដំបូកខ្មៅគឺបានទទួលភាពល្បីល្បាញ និងមានការចាប់អារម្មណ៍ខ្លាំងចាប់តាំងពីពេលនោះមក។ ជណ្ដើរទ្បើងទៅកាន់កំពូលភ្នំមានកំពស់១.៨០០ម៉ែត្រ ហើយមានសាលាដំណាក់សង់អំពីថ្មបេតុងចំនួន៣សម្រាប់ឈប់សម្រាកពីការនឿយហត់។
នៅក្បែរវត្តដំបូកខ្មៅក្របៅជ្រំលើកំពូលភ្នំត្បែងមានជ័យមានប្រជាពលរដ្ឋរស់នៅចំនួន៣គ្រួសារផងដែរ៕
មង្គល
0 Comments