រតនគិរី ៖ លោកហេង រតនា ស្នងការរងនគរបាលខេត្តរតនគិរីទទួលកិច្ចការព្រំដែន កាលពីវេលាម៉ោង១រសៀល ថ្ងៃទី២២ ខែមករា ឆ្នាំ២០១៥ បានចាប់រថយន្តខ្នាតធំដឹកឈើធ្នង់ឡាំងជ្រុង និងហ៊ុបមូល ហើយឃាត់ខ្លួនបានមនុស្សចំនួន៣នាក់ នៅទីបញ្ជាការវរការពារព្រំដែនលេខ២០៣ ស្ថិតនៅភូមិចាប់ ឃុំញ៉ាង ស្រុកអណ្ដូងមាស ខេត្តរតនគិរី ក្រោយមកក៏ស្រាប់តែមានការដោះលែងទៅវិញ។ ឈើប្រភេទធ្នង់ទាំងនោះដែលមានម្ចាស់ឈ្មោះ នាង ដឹកជញ្ជូនមកពីដែនឧទ្យានជាតិវរៈជ័យចេញមកពីក្រុមហ៊ុន"នុភាពសុភី" ដោយប្រើឈ្មោះឧកញ៉ាម្នាក់ជាខ្នងបង្អែក។ បច្ចុប្បន្ន ឈ្មោះ នាង តែងតែដឹកជញ្ជូនឈើយ៉ាងសកម្ម ដោយមានទំនាក់ទំនងល្អជាមួយនឹងមន្ត្រីជំនាញរដ្ឋបាលព្រៃឈើ មន្ត្រីបរិស្ថាន និងកងកម្លាំងប្រដាប់អាវុធគ្រប់ប្រភេទ។ ប្រសិនបើថ្នាក់លើមិនយកចិត្តទុកដាក់ចំពោះជំនួញឈើប្រណិតនេះទេ នៅពេលឆាប់ៗខាងមុខនេះ ឈើនៅដែនឧទ្យានជាតិវរៈជ័យ នឹងវិនាសហិនហោចជាពុំខានឡើយ។
ករណីបង្ក្រាបឈើប្រណិតនេះ អ្នកយកព័ត៌មានកម្ពុជាថ្មីបានទូរស័ព្ទសុំការបំភ្លឺទៅលោក វង សុក្រសិរី នាយខណ្ឌរដ្ឋបាលព្រៃឈើខេត្តកាលពីរសៀលថ្ងៃទី២២ ខែមករា ឆ្នាំ២០១៥ ប៉ុន្តែទូរស័ព្ទជាប់រវល់រហូតសឹងតែពេញមួយថ្ងៃរសៀល៕
0 Comments