ភ្នំពេញ ៖ ផល សោភ័ណ្ឌ អ្នកប្រដាល់ក្លិបតាឡីដំរីមានរិទ្ធ និងឯម វិចិត្រអ្នកប្រដាល់ក្លិបឫទ្ធីពោធិសែនជ័យនឹងជួបគ្នាលើសង្វៀនរោងសៀក នារសៀលថ្ងៃអាទិត្យ ទី១៥ ខែកុម្ភៈ ឆ្នាំ២០១៥នេះ ដើម្បីប្រកួតដណ្ដើមពានប្រចាំខែរបស់គូបូតា ដែលមានតម្លៃស្មើ១.០០០ដុល្លារ អ្នកឈ្នះបាន៧០០ដុល្លារ អ្នកចាញ់បាន៣០០ដុល្លារ។
ឯម វិចិត្រ និងផល សោភ័ណ្ឌនេះធ្លាប់ជួបគ្នាម្តងហើយកាលពីថ្ងៃទី២៧ ខែមករា ឆ្នាំ២០១៣ ដែលក្នុងការជួបគ្នាពេលនោះ ឯម វិចិត្រ វាយចាញ់ សុភ័ណ្ឌ ដោយពិន្ទុ។ នៅក្នុងការជួបគ្នាលើកទី២នេះ ក្រុមអ្នកវិភាគប្រដាល់ក្នុងស្រុកមិនមានជំនឿចិត្តថា ឯម វិចិត្រ ឈ្នះ ផល សោភ័ណ្ឌនោះទេ។
ផល សោភ័ណ្ឌ គេជាប្រដាល់ជើងខ្លាំងស្រករក្រោយ គេមានកណ្ដាប់ដៃនិងកែងល្អណាស់ ហើយថែមទាំងលឿន និងរហ័សថែមទៀត។ ប្រមាណ៣ប្រកួតចុងក្រោយនេះ សោភ័ណ្ឌ បានផ្ដួលអ្នកប្រដាល់ថៃ៣នាក់ឲ្យសន្លប់ក្នុងទឹកទី២ដូចគ្នា។ ចំណែក ឯម វិចិត្រវិញ គេជាជើងខ្លាំងស្រករមុន ហើយក៏ពុំសូវបានឡើងប្រកួតទៀត ធ្វើម៉េចអាចឈ្នះ សោភ័ណ្ឌនោះ។ ម្យ៉ាងទៀត ឯម វិចិត្រ ឥឡូវនេះមិនខ្លាំងដូចពីមុនទេ ដោយសារកម្លាំងស៊ុហ្វរបស់ថមថយច្រើន។
ឯម វិចិត្រ ឡើងប្រកួតលើកចុងក្រោយនេះ វាយឈ្នះ ពេជ្រ ប៊ុនធឿន អ្នកប្រដាល់ក្លិបពន្លឺសាមគ្គីខេត្តបាត់ដំបងក្នុងទឹកទី២។ ចាំមើល រវាង សោភ័ណ្ឌ និង ឯម វិចិត្រនេះ តើនរណាជាអ្នកឈ្នះទទួលបានប្រាក់លាននោះ?
ផាន់ ចំណាន អ្នកប្រដាល់ក្លិបរាជសីហ៍បង្ក្រាបគ្រឿងញៀនខេត្តរតនគិរីនឹងឡើងប្រកួតសងសឹក ឯម ចាន់យ៉ា អ្នកប្រដាល់ក្លិបឫទ្ធីពោធិសែនជ័យ។ ចំណាន ធ្លាប់វាយចាញ់ ឯម ចាន់យ៉ា ដោយពិន្ទុម្តងកាលពីថ្ងៃទី០១ ខែសីហា ឆ្នាំ២០១៤។ តែការចាញ់របស់គេស្ថិតក្នុងលក្ខណៈប្រផិតប្រផើយប៉ុណ្ណោះ។ ពួកគេពីរនាក់នេះជួបគ្នាក្នុងប្រភេទទម្ងន់៦៣,៥០០គីឡូក្រាម។ រវាងអ្នកទាំងពីរនាក់នេះ បើតាមការកត់សម្គាល់នោះ គឺមានសមត្ថភាពបច្ចេកទេសប្រហាក់ប្រហែលគ្នាទេ។ ដូច្នេះសម្រាប់ការជួបគ្នាលើកទី២នេះ គេមិនហ៊ានទស្សន៍ទាយថាអ្នកណាឈ្នះអ្នកណាចាញ់នោះឡើយ?
ការប្រកួតចុងក្រោយរបស់ ផាន់ ចំណាន គឺវាយចាញ់ ឃឹម ពេជ្រចិន្តា អ្នកប្រដាល់ក្លិបនិរោធមានជ័យក្នុងទឹកទី២ ឯការប្រកួតចុងក្រោយរបស់ ឯម ចាន់យ៉ាវិញនោះ គឺវាយចាញ់ ឯក កៃឈៀង អ្នកប្រដាល់ក្លិបមកុដរាជសីដោយពិន្ទុ។
មាស សារិទ្ធ អ្នកប្រដាល់ក្លិបភារម្យគុនខ្មែរ ត្រូវឡើងសាកកណ្ដាប់ដៃជាមួយ ជា សារ៉ាក់ អ្នកប្រដាល់ក្លិបអមតៈគុនខ្មែរខេត្តសៀមរាប។ អ្នកប្រដាល់ទាំងពីរនាក់នេះ មិនដែលជួបគ្នាទេកន្លងមក។ ជា សារ៉ាក់ បាត់មុខជាយូរឆ្នាំហើយ ដែលកាលនៅប្រកួតគេមានវាយខ្លាំងគួរសមដែរ គ្រាន់តែគេមានចិត្តប្រដាល់តូចប៉ុណ្ណោះ។ ចំណែក មាស សារិទ្ធ គេក៏មិនជាខ្លាំង និងចិត្តតូចដែរ។ សារិទ្ធនេះ ក៏បាត់មុខជិតមួយឆ្នាំដែរមិនដែលឃើញឡើងប្រកួត។ សម្រាប់ការជួបគ្នានេះ មិនដឹងថានរណាជាអ្នកឈ្នះនោះទេ?
អ្នកប្រដាល់ជើងថ្មី ខាត់ វិឆ័យ ក្លិបមជ្ឈមណ្ឌលកីឡាខ.ភ.ម នឹងជួបប្រកួតជាមួយយុគ យក្សខួច អ្នកប្រដាល់ក្លិបអប់រំកាយកីឡាខេត្តបន្ទាយមានជ័យ។ វិឆ័យ ប្រហែលជាពុំឈ្នះយក្សខួចនោះឡើយសម្រាប់ការជួបគ្នានេះ៕
វិសិទ្ធ
0 Comments