រតនគិរី ៖ ផ្ទះប្រជាពលរដ្ឋមួយខ្នងត្រូវបានអគ្គីភ័យឆាបឆេះផ្ទះអស់គ្មានសល់ ហេតុការណ៍នេះបានកើតឡើងនៅវេលាម៉ោង១១ព្រឹក ថ្ងៃទី១២ ខែកុម្ភៈ ឆ្នាំ២០១៥ ស្ថិតនៅភូមិលំផាត់ ឃុំជ័យឧត្តម ស្រុកលំផាត់ ខេត្តរតនគិរី។
បើតាមការឲ្យដឹងពីលោក ចាន់ ណារិទ្ធ មេប៉ុស្តិ៍នគរបាលឃុំជ័យឧត្តមបានឲ្យដឹងថា អគ្គីភ័យបានឆាបឆេះផ្ទះប្រជាពលរដ្ឋមួយខ្នងមានទំហំទទឹង៨ម៉ែត្រ និងបណ្តោយ៩ម៉ែត្រ ប្រក់ស័ង្កសី ជញ្ជាំងក្ដារ ហើយម្ចាស់ផ្ទះមានឈ្មោះ សា រដ្ឋា ភេទប្រុស អាយុ២៣ឆ្នាំ ជនជាតិខ្មែរ និងប្រពន្ធឈ្មោះ ជិក ឈុននី ភេទស្រី អាយុ៤៤ឆ្នាំ ជនជាតិខ្មែរ ខណៈពេលពួកគាត់ទៅលក់ឥវ៉ាន់។ លោកបានបន្តទៀតថា អគ្គីភ័យឆាបឆេះចេញពីគីឡូត៍មួយកន្លែងដែលជាប់ព្រំគ្នា ហើយប្រជាពលរដ្ឋក៏បានឃើញមានផ្សែងចេញពីក្នុងផ្ទះធ្វើឲ្យមានការភ្ញាក់ផ្អើល ក៏បានជិះម៉ូតូទៅប្រាប់ម្ចាស់ផ្ទះ ខណៈពេលដែលម្ចាស់ផ្ទះមកដល់ គឺផ្ទះបានឆេះយ៉ាងសន្ធោសន្ធៅទៅហើយ ទម្រាំឡានដឹកទឹកឯកជនមកដល់ អគ្គីភ័យបានលេបត្របាក់អស់ទាំងស្រុងទៅហើយ។
តាមប្រភពពីម្ចាស់ផ្ទះខាងលើបាននិយាយឲ្យដឹងថា គាត់បាត់បង់អស់ទ្រព្យសម្បត្តិរបស់គាត់អស់ទាំងស្រុង រួមមានដូចជា គ្រែនាងនួនចំនួន២ ពូក២ ទូឈើ១ តុធម្មតា៦ ទូរទស្សន៍១គ្រឿង ស្រូវ១០បាវ និងសម្ភារៈមួយចំនួនធំទៀត។
បច្ចុប្បន្ននគរបាលប៉ុស្តិ៍ឃុំជ័យឧត្តមកំពុងស្រាវជ្រាវអំពីអគ្គីភ័យដែលបង្កឲ្យមានការឆាបឆេះផ្ទះរបស់ប្រជាពលរដ្ឋ។
ជាចុងក្រោយម្ចាស់ផ្ទះអំពាវនាវដល់អាជ្ញាធរមូលដ្ឋានក៏ដូចជា លោកជំទាវ ប៊ុន រ៉ានី ហ៊ុន សែន ប្រធានកាកបាទក្រហមមេត្តាជួយដល់ខ្ញុំ និងនាងខ្ញុំផង៕
តាជួង
0 Comments