បន្ទាយមានជ័យ ៖ ក្នុងរដូវកាលថ្មីឆ្នាំសិក្សា២០១៤-២០១៥នេះ សកលវិទ្យាល័យគ្រប់គ្រង និងសេដ្ឋកិច្ចសាខាខេត្តបន្ទាយមានជ័យ បានបើកវគ្គប្រកួតបាល់ទាត់ដណ្ដើមពានរង្វាន់ UME Cup ដែលមានក្រុមកីឡាករត្រូវប្រកួតចំនួន៨ក្លិប។
ពិធីបើកវគ្គប្រកួតបាល់ទាត់នេះធ្វើឡើងកាលពីថ្ងៃទី១២ ខែកុម្ភៈ ឆ្នាំ២០១៥ នៅបរិវេណសកលវិទ្យាល័យ UME សាខាខេត្តបន្ទាយមានជ័យ ក្រោមវត្តមានរបស់លោក ណង ថា សកលវិទ្យាធិការរង និងជានាយកសកលវិទ្យាល័យ UME បន្ទាយមានជ័យ និងក្រុមកីឡាករទាំង៨ក្លិប និងនិស្សិត UME។ លោក ទុំ ភេន សាស្ត្រាចារ្យសកលវិទ្យាល័យ UME បានលើកពីប្រវត្តិនៃការបង្កើតក្លិបកីឡាបាល់ទាត់ប្រចាំសកលវិទ្យាល័យ UME សាខាខេត្តបន្ទាយមានជ័យបានបង្កើតឡើងពីឆ្នាំ២០០៧-២០០៨ ដែលពេលនោះបង្កើតក្លិបកីឡាបាល់ទាត់បុរសមានចំនួន៤ក្លិប រួមមានក្លិបU1 ក្លិបតោកំណាចមានជ័យ ក្លិបអធិរាជវាលស្មៅ និងក្លិបស្ទាំងមាស។ មកដល់ពេលនេះ UME បានបន្ថែម៤ក្លិបទៀតសម្រាប់ការប្រកួតជារៀងរាល់ឆ្នាំមកសល់ឆ្នាំ២០១៤កន្លងទៅនេះក្លិបកីឡាបាល់ទាត់ UME ទទួលបានជោគជ័យជារៀងរាល់ឆ្នាំ ក្នុងនោះឈ្នះការប្រកួតបាល់ទាត់មហាជនដណ្ដើមពានរង្វាន់៧មករា បានទទួលពាន៣ឆ្នាំជាប់គ្នា។ ដោយឡែកសម្រាប់ការប្រកួតដណ្ដើមពានរង្វាន់ UME Cup ដែលត្រូវប្រព្រឹត្ត ចាប់ផ្តើមពីថ្ងៃទី១២ ខែកុម្ភៈ ឆ្នាំ២០១៥ រហូតដល់ថ្ងៃទី២៧ ខែមិនា ឆ្នាំ២០១៥ រៀងរាល់ថ្ងៃព្រហស្បតិ៍និងថ្ងៃស្រុក វេលាម៉ោង២និង២០នាទី នៅទីលានវិទ្យាល័យហ៊ុនសែនខ្លាកូន ដោយមានចែកចេញជា២ពូល គឺពូលAមាន៤ក្លិប និង Bមាន៤ក្លិប។
លោក ណង ថា សកលវិទ្យាធិការរង និងជានាយកសកលវិទ្យាល័យ UME បន្ទាយមានជ័យបានមាប្រសាសន៍ថា ដោយឃើញពីលទ្ធផលនៃក្លិបបាល់ទាត់ UME សាខាខេត្តបន្ទាយមានជ័យ ដែលតែងទទួលបានជ័យលាភីជារៀងរាល់ឆ្នាំ លោកគ្រោងនឹងជម្រើសកីឡាករក្នុងក្លិបមួយៗ ដើម្បីយកទៅប្រកួតថ្នាក់ជាតិ និងទៅប្រកួតនៅសកលវិទ្យាល័យជាដៃគូនាប្រទេសថៃ។ លោកក៏បានផ្តាំផ្ញើដល់កីឡាករទាំងអស់ត្រូវគោរពនូវវិន័យ សីលធម៌ក្នុងការប្រកួត ព្រោះថាកីឡានាំមកនូវសុខភាព សេចក្ដីថ្លៃថ្នូរ ហើយជៀសផុតពីគ្រឿងញៀន៕
អ,ពៅ
0 Comments