កណ្ដាល ៖ ជនសង្ស័យម្នាក់ក្នុងចំណោមបក្សពួក៣នាក់ ត្រូវបានប្រជាពលរដ្ឋស្វាគមន៍ម្នាក់មួយដៃមួយជើង បណ្ដាលឲ្យសន្លប់ស្តូកស្តឹងនៅត្រង់ចំណុចមុខកន្លែងសេវាវីង ក្នុងភូមិលេខ៤ ឃុំស្វាយរលំ ស្រុកស្អាង ខេត្តកណ្តាល កាលពីវេលាម៉ោង១២និង១០នាទី ថ្ងៃទី១២ ខែកុម្ភៈ ឆ្នាំ២០១៥ ខណៈក្រុមជនសង្ស័យទាំងនោះបានមកធ្វើជានាក់ដកលុយ ដែលគេផ្ញើមក ហើយបន្លំខ្លួនប្រមូលយកលុយ របស់ម្ចាស់វីងរត់ឡើងជិះម៉ូតូ បើកចេញទៅបុកធុងសាំងដែលនៅក្បែរនោះ។
ជនសង្ស័យដែលត្រូវប្រជាពលរដ្ឋចាប់បានវាយមួយដៃមួយជើងបណ្ដាលឲ្យសន្លប់នោះមានឈ្មោះ អ៊ូ វណ្ណថន ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិទួលក្រសាំង ឃុំរការខ្ពស់ ស្រុកស្អាង ខេត្តកណ្តាល។ រីឯជនសង្ស័យពីនាក់ទៀតមិនស្គាល់អត្តសញ្ញាណបានរត់គេចខ្លួនបាត់ស្រមោលតែម្តង។
បើតាមសាក្សីនៅកន្លែងកើតហេតុបាននិយាយថា នៅថ្ងៃទី១២ ខែកុម្ភៈ ឆ្នាំ២០១៥ វេលាម៉ោង១២និង១០នាទី មានបុរសម្នាក់ចូលមកកន្លែងវីងរបស់ឈ្មោះ ម៉េង ចំរ៉ុង រកទិញកាតទូរស័ព្ទ០៩៧ចំនួន១០ដុល្លារ ពេលជាមួយគ្នានោះក៏មានមនុស្សម្នាក់ទៀតចូលមកក្នុងផ្ទះរបស់ឈ្មោះ ចំរ៉ុង ក៏បានប្រមូលយកលុយពីថតតុដាក់ចូលថង់ខ្មៅរួចរត់ឡើងជិះម៉ូតូC125 ដែលមានមនុស្សប្រុសម្នាក់ទៀត
ចាំឌុបចេញទៅទិសខាងលិច។ ភ្លាមនោះឈ្មោះ ចំរ៉ុង ក៏បានស្រែកឆោឡោដេញចាប់បានបុរសម្នាក់ដែលដឹកជនល្មើសលួចលុយជិះម៉ូតូទៅបុកធុងសាំងបណ្ដាលឲ្យដួល ក៏ត្រូវប្រជាពលរដ្ឋនៅជិតនោះព្រួតវាយបណ្ដាលឲ្យសន្លប់តែម្ដង។ ចំណែកជនល្មើសម្នាក់លួចលុយក៏រត់គេចខ្លួនចុះតាមមាត់ទន្លេបាត់។ ជនល្មើសដែលទិញកាតទូរស័ព្ទបានគេចខ្លួនទៅមុន ហើយម្ចាស់ផ្ទះបើកសេវាវេរនិងបើកលុយ( វីង)ឈ្មោះ ម៉េង ចំរុង បានបញ្ជាក់ថា សម្ភារៈដែលបាត់បង់មានលុយដុល្លារចំនួន៥០០០ដុល្លារ។
ប៉ូលិសមូលដ្ឋានបានឲ្យដឹងថា នៅកន្លែងកើតហេតុមានម៉ូតូចំនួន០១គ្រឿង ម៉ាកហុងដា C125ពណ៌ខ្មៅសេរី២០១៣ ជារបស់ជនល្មើសបន្សល់ទុកនិងអត្តសញ្ញាណប័ណ្ណចំនួន០១សន្លឹក៕មុនី
0 Comments