ប៉ៃលិន ៖ ដើម្បីឲ្យទិន្នផលដំណាំកសិកម្ម មានការរីកចម្រើនពិសេសដំឡូងមី ដូច្នេះ ប្រជាកសិករត្រូវតែមានការជ្រើសរើសពូជជាចម្បង ព្រមទាំងមានបច្ចេកទេសត្រឹមត្រូវ មិនត្រូវដាំពូជដែលពុំមានគុណភាពនៅលើដីនោះឡើយ ហើយម្យ៉ាងវិញទៀតកសិករត្រូវទាញយកបទពិសោធន៍ពីអ្នកដទៃដែលធ្លាប់ធ្វើការដាំដុះ ឬមន្ត្រីជំនាញនៃមន្ទីរកសិកម្មខេត្ត ដែលបានធ្វើការផ្សព្វផ្សាយក្នុងមូលដ្ឋានផងដែរ។ ជាក់ស្តែងនៅព្រឹកថ្ងៃទី០៩ ខែកុម្ភៈ ឆ្នាំ២០១៥ លោក សាយ សុផាត ប្រធានមន្ទីរកសិកម្មខេត្តប៉ៃលិន បានអញ្ជើញចុះត្រួតពិនិត្យពូជដំឡូងមីបង្កាត់ថ្មី ឈ្មោះថា៨៩ ដែលនាំមកពីប្រទេសថៃ ស្ថិតនៅចំណុចក្បាលឡាន ក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន របស់កសិករគម្រូ ដែលបានទទួលបានទិន្នផលខ្ពស់ កំពុងប្រមូលផល ដោយមានការចូលរួមពីប្រធានការិយាល័យផ្សព្វផ្សាយកសិកម្មខេត្ត ប្រធាននិងអនុប្រធានសហគមន៍ អាជ្ញាធរមូលដ្ឋាន ព្រមទាំងប្រជាកសិករជាច្រើននាក់ផងដែរ។
លោក សាយ សុផាត ប្រធានមន្ទីរកសិកម្មខេត្តប៉ៃលិនបានឲ្យដឹងថា ដំឡូងមីដែលប្រជាកសិករដាំ នៅខេត្តប៉ៃលិន មានច្រើនប្រភេទ ក្នុងនោះដែរប្រភេទពូជបង្កាត់ថ្មី ដែលមានឈ្មោះថា៨៩ នាំចូលពីប្រទេសថៃ ប្រជាកសិករអាចទទួលផលក្នុង១ហិកតារហូតដល់ជាង៥០តោន លើសពីពូជធម្មតាដែលធ្លាប់ដាំ ក្នុង១ហិកតាចំនួន២៥ទៅ៣០តោនប៉ុណ្ណោះ។ លោកបន្តថា ក្រុមការងាររបស់មន្ទីរ និងអ្នកចូលរួម បានសាកល្បងដកដំឡូងមីក្នុងចម្ការនេះមកថ្លឹង ឃើញថាទទួលបានផលច្រើន បើប្រៀបធៀបពីទិន្នផល ពូជដំឡូងមីធម្មតា និងពូជដំឡូងបង្កាត់ពូជថ្មី ចំណែកទិន្នផល ក៏ខុសគ្នាដែរក្នុង១ហិកតាដូចគ្នា។ លោកប្រធានមន្ទីរក៏បានណែនាំដល់ប្រជាកសិករទាំងអស់ឲ្យបែរមកជ្រើសរើសពូជបង្កាត់ថ្មីដែលមានឈ្មោះថា៨៩នេះវិញ ព្រោះថាវាធន់នឹងអាកាសធាតុ ,មានការងាយស្រួលក្នុងការថែទាំ ហើយមើមមានទំហំធំវែងល្អ ជាពិសេសប្រភេទពូជនេះសម្បូរទៅដោយម្សៅដែលមានទម្ងន់ធ្ងន់ថែមទៀតផង។ លោកបញ្ជាក់ថា តម្លៃដំឡូងមីបច្ចុប្បន្នកំពុងតែធ្លាក់ចុះ ដោយសារទីផ្សាររបស់ប្រទេសជិតខាងធ្លាក់ចុះផងដែរ ហើយលោកនឹងអាជ្ញាធរខេត្តកំពុងតែសម្របសម្រួលនឹងរកវិធីដោះស្រាយអំពីការប្រឈមនេះ។
ប្រជាកសិករម្នាក់ ឈ្មោះ អ៊ុក ទូច ជាកសិករគម្រូ និងជាម្ចាស់ចម្ការដែលដាំពូជដំឡូងមីបង្កាត់ថ្មីបានឱ្យដឹងថា កាលពីមុនលោកបានដាំពូជធម្មតា ដោយក្នុង១ហិកតា ទទួលបានផលត្រឹមតែ២៥ ទៅ៣០តោនប៉ុណ្ណោះ។ តែបច្ចុប្បន្នគាត់ជ្រើសរើសពូជបង្កាត់ថ្មី ដែលមានឈ្មោះ៨៩នេះ គាត់អាចទទួលបានផលចាប់ពី៥៥ទៅ៨០តោនក្នុង១ហិកតា។ លោកក៏បានប្រាប់ពីវិធីដាំដំឡូងមីតាមលក្ខណៈបច្ចេកទេស ដូចជាត្រូវជ្រើសរើសពេលវេលានៃការដាំ ហើយពេលដាំត្រូវពូនរងដែលមានទំហំចាប់ពី១ម៉ែត្រទៅ១.២ម៉ែត្រ គម្លាតពីរងមួយទៅរងមួយទៀត ប្រវែង១ម៉ែត្រ ទៅ១.៣ម៉ែត្រ និងដាំពីគុម្ពមួយទៅគុម្ពមួយ ចន្លោះពី០.៨ទៅ១ម៉ែត្រ។
កសិករម្នាក់ទៀត ឈ្មោះ រស់ ខែមរី ភេទស្រី អាយុ៤៣ឆ្នាំ រស់នៅភូមិដីក្រហម សង្កាត់ អូរតាវ៉ៅ ក្រុងប៉ៃលិនបានឱ្យដឹងថា ការដាំដំឡូងមីនេះ ក្នុង១ហិកតាគឺចំណាយអស់ប្រាក់ប្រហែល១២០០ដុល្លារ លុះពេលទទួលផល ក្នុង១ហិកតា បើពូជធម្មតាបានត្រឹមតែ៣០តោន ហើយបើប្រៀបធៀបនឹងតម្លៃបច្ចុប្បន្នគឺបានត្រឹមតែរួចខ្លួន ឬខាតដើម។ តែពេលគាត់ជ្រើសរើសពូជបង្កាត់ថ្មីនេះ គឺអាចចំណេញក្នុង១ហិកតាជាង១ពាន់ដុល្លារ។ ដូច្នេះពូជបង្កាត់ថ្មី រូបគាត់ទទួលស្គាល់ថា បានទិន្នផលខ្ពស់គួរឱ្យចាប់អារម្មណ៍មែន។
ក្រោយពីក្រុមការងារធ្វើការពិសោធន៍រួចមកបានទទួលស្គាល់ថាដំឡូងមីបង្កាត់ពូជថ្មីនេះ គឺពិតជាមានទិន្នផលខ្ពស់គួរឱ្យកត់សម្គាល់មែន ពោលគឺកើនទិន្នផលលើសពូជធម្មតាទ្វេដង៕ សេង សុវណ្ណារិទ្ធ
0 Comments