ក្រចេះ ៖ ដើម្បីចូលរួមចំណែកជួយដល់រាជរដ្ឋាភិបាល និងសង្គមជាតិនោះ កាលពីថ្ងៃទី២៨ ខែកក្កដា ឆ្នាំ២០១៥នេះ ក្រុមយុវជនកាកបាទក្រហមកម្ពុជា សហការជាមួយក្រុមយុវជនសម្ព័ន្ធសេនានាគ បានចុះជួបជាមួយថ្នាក់ដឹកនាំខេត្តប្រារព្ធពិធីបញ្ចូលសមាជិកថ្មីចំនួនជាង៥០នាក់ និងចុះចែកអំណោយដល់ប្រជាពលរដ្ឋដែលជួបការខ្វះខាតនៅតាមតំបន់ភូមិ/ឃុំមួយចំនួននៅលើទឹកដីខេត្តក្រចេះរយៈពេលមួយថ្ងៃពេញផងដែរ។
នៅក្នុងឱកាសចុះធ្វើសកម្មភាពមនុស្សធម៌ ដោយបានសហការជាមួយក្រុមយុវជនកាកបាទក្រហមកម្ពុជានោះ លោក ប៉ាន់ខែម ប៊ុនថន ប្រធានប្រតិបត្តិក្រុមយុវជនសម្ព័ន្ធសេនានាគ និងជាជំនួយការសម្ដេចតេជោបានមានប្រសាសន៍ថា នេះមិនមែនជាលើកទីមួយទេ ដែលក្រុមយុវជនសម្ព័ន្ធសេនានាគរបស់លោកចុះធ្វើសកម្មភាពមនុស្សធម៌ ពោល ក្រោមការដឹកនាំ និងចង្អុលបង្ហាញពីលោក ឌៀង សារុន សមាជិកគណៈកម្មការកណ្ដាលគណបក្សប្រជាជនកម្ពុជា គឺក្រុមយុវជនសម្ព័ន្ធសេនានាគ បានចុះជួយប្រជាជនទីទ័លក្រ ចាស់ជរា ជនរងគ្រោះធម្មជាតិ និងគ្រោះថ្នាក់ផ្សេងៗ..ល..។ នៅគ្រប់ច្រកល្ហកទាំងអស់ គឺទទួលបានដំណឹងយប់ ទៅយប់ ដឹងថ្ងៃ ទៅថ្ងៃ ដោយមិនបានមើលរំលង ឬទុកពួកគាត់ឲ្យស្លាប់ដោយអត់បាយនោះឡើយ។
លោក ប៉ាន់ខែម ប៊ុនថន ថ្លែងបញ្ជាក់ថា ជាក់ស្ដែងដូចជាថ្ងៃនេះ ក្រុមយុវជនរបស់យើងបានចុះមកបំពេញតួនាទីសកម្មភាពមនុស្សធម៌ ដោយយកគំរូតាមកាកបាទក្រហមកម្ពុជា និងរាជរដ្ឋាភិបាលបាននាំយកអំណោយមានអង្ករ គ្រឿងឧបភោគ-បរិភោគ និងថវិកាចែកជូនប្រជាជនដែលជួបការខ្វះខាត ចាស់ជរា នៅតាមភូមិ/ឃុំមួយចំនួននៅលើទឹកដីខេត្តក្រចេះ ដោយមិនបានប្រកាន់ពណ៌សម្បុរ ពូជសាសន៍ ឬនិន្នាការនយោបាយបក្សណាៗនោះឡើយ។
លោកបញ្ជាក់ទៀតថា លោកក៏សូមថ្លែងអំណរគុណផងដែរចំពោះក្រុមយុវជនកាកបាទក្រហមកម្ពុជា ដែលបានផ្ដល់ឱកាសដល់ក្រុមយុវជនសម្ព័ន្ធសេនានាគរបស់លោកឲ្យបានចូលរួមក្នុងសកម្មភាពមនុស្ស សង្គម នៅលើទឹកដីខេត្តក្រចេះនាថ្ងៃនេះ ដើម្បីយកគំរូ និងរៀនសូត្រតាមសម្រាប់អភិវឌ្ឍសង្គមជាតិខ្មែរយើង៕
ក្រុមយុវជនកាកបាទក្រហម និងក្រុមយុវជនសម្ព័ន្ធសេនានាគ រួមគ្នាធ្វើសកម្មភាពមនុស្សធម៌នៅលើទឹកដីខេត្តក្រចេះ
0 Comments