ភ្នំពេញ ៖ លោកឧត្តមសេនីយ៍ឯក គៀត ច័ន្ទថារិទ្ធ អគ្គស្នងការរង និងជាអ្នកនាំពាក្យអគ្គស្នងការនគរបាលជាតិ បានថ្លែងប្រាប់សារព័ត៌មាននគរបាលជាតិ កាលពីថ្ងៃទី២៨ ខែកក្កដា ថា នគរបាលកំពុងបន្តយ៉ាងសកម្មក្នុងការស្វែងរកចាប់ខ្លួនទណ្ឌិត ឈូក បណ្ឌិត អតីតអភិបាលក្រុងបាវិត ខេត្តស្វាយរៀង ពាក់ព័ន្ធករណីប្រើប្រាស់អាវុធបាញ់ឲ្យរបួសទៅលើកម្មការនីរោងចក្រ នៅក្រុងបាវិត ខេត្តស្វាយរៀង។
នៅព្រឹកថ្ងៃទី២៧ ខែកក្កដា ឆ្នាំ២០១៥ កម្មការិនីចំនួន៣ នាក់ បម្រើការងារនៅរោងចក្រកៅវ៉េ ស្ថិតនៅក្រុងបាវិត ខេត្តស្វាយរៀង ដែលរងគ្រោះ ដោយការបាញ់ប្រហារពីសំណាក់លោកឈូក បណ្ឌិតអតីតអភិបាលក្រុងបាវិត កាលអំឡុងខែកុម្ភៈ ឆ្នាំ២០១២ បានឡើងដាក់ពាក្យបណ្ដឹងមករដ្ឋសភា ស្នើសុំកិច្ចអន្តរាគមន៍ពីរដ្ឋសភា និងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ដើម្បីចាប់លោក ឈូក បណ្ឌិត ដាក់ទោសតាមច្បាប់។
លោកឧត្តមសេនីយ៍ឯក គៀត ច័ន្ទថារិទ្ធ បានបញ្ជាក់ថា ក្រសួងមហាផ្ទៃ និងអគ្គស្នងការដ្ឋាននគរបាលជាតិ មិនមានការធ្វេសប្រហែស ឬបន្ធូរដៃក្នុងការស្រាវជ្រាវ ដើម្បីស្វែងរកចាប់ខ្លួនពិរុទ្ធជន ឈូក បណ្ឌិត យកមកផ្ដន្ទាទោសនោះទេ។ រយៈពេលកន្លងមកនេះ ករណីពិរុទ្ធជន ឈូក បណ្ឌិត គឺជាករណីមួយដែលតុលាការបានជំនុំជម្រះសម្រេចទោសរួចហើយ ហើយក៏បានចេញដីកាឲ្យចាប់ខ្លួនផងដែរ កាលពីថ្ងៃទី២៥ ខែមិថុនា ឆ្នាំ២០១៥ មកម្ល៉េះ។ លោកបន្តថា ចាប់ពីពេលនោះមកកងកម្លាំងមានសមត្ថកិច្ចបានស្រាវជ្រាវ និងកំពុងបន្តស្រាវជ្រាវជាបន្តបន្ទាប់ ជាពិសេសដោយមានការដាក់បទបញ្ជាយ៉ាងម៉ឺងម៉ាត់ដាច់ខាតពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានធ្វើការក្រើនរំឮកជាបន្តបន្ទាប់ និងបានប្រគល់ភារកិច្ចច្បាស់លាស់ឲ្យនាយកដ្ឋាននគរបាលព្រហ្មទណ្ឌ ដែលមានកម្លាំងជំនាញមួយក្រុមធ្វើការងារនេះ និងស្រាវជ្រាវធ្វើម៉េចតាមចាប់ទណ្ឌិត ឈូក បណ្ឌិត យកមកផ្ដន្ទាទោសឲ្យបាន។
លោកឧត្តមសេនីយ៍ឯក គៀត ច័ន្ទថារិទ្ធ បានបញ្ជាក់ថា សមត្ថកិច្ចបានខិតខំប្រឹងប្រែងណាស់កន្លងមកនេះមិនបានបន្ធូរដៃនោះទេ ហើយរយៈពេលកន្លងយើងទទួលបានព័ត៌មានថា លាក់ខ្លួននៅកន្លែងនេះ នៅកន្លែងនោះ ប៉ុន្តែរកទៅចេះតែឃ្វាង និងគេចផុត តែទោះជាយ៉ាងណាយើងនៅតែមិនបន្ធូរដៃក្នុងការតាមចាប់នោះទេ។ លោកអគ្គស្នងការរងនគរបាលជាតិបានបញ្ជាក់ថា ចុងក្រោយនេះសមត្ថកិច្ចបានស្នើទៅអគ្គលេខាធិការដ្ឋាននគរបាលអន្តរជាតិ ដើម្បីចេញនិវេទក្រហម ហើយក្រោយមកអគ្គលេខាធិការដ្ឋាននគរបាលអន្តរជាតិ បានចេញនិវេទក្រហមឲ្យប្រទេសជាង១៩០លើពិភពលោកតាមចាប់ពិរុទ្ធជន រូបនេះ ប្រគល់ឲ្យកម្ពុជា ដើម្បីយកមកផ្ដន្ទាទោសតាមច្បាប់។
លោកបន្តថា ចំពោះករណីនេះ ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ នឹងបន្តខិតខំស្រាវជ្រាវចាប់ពិរុទ្ធជន ឈូក បណ្ឌិត យកមកផ្ដន្ទាទោសឲ្យបាន ដើម្បីរកយុត្តិធម៌ឲ្យកម្មការនីយើងឲ្យបាន។ ហើយក្នុងករណីប្រជាពលរដ្ឋបានឃើញទណ្ឌិត ឈូក បណ្ឌិត នៅទីកន្លែងណា សូមមេត្តាសហការជួយផ្តល់ព័ត៌មានដល់សមត្ថកិច្ច ដើម្បីចាប់ខ្លួនយកមកផ្ដន្ទាទោសតាបច្បាប់។
យោងតាមពាក្យបណ្ដឹងរបស់កម្មការិនីទាំង៣ នាក់ផ្ញើទៅសម្តេច ហេង សំរិន ប្រធានរដ្ឋសភាបានឲ្យដឹងថា កាលពីឆ្នាំ ២០១២ មានកម្មករជាច្រើននាក់ នៅរោងចក្រកៅវ៉េ បានធ្វើបាតុកម្ម ក្នុងនោះមាន មានពួកគេទាំងបីនាក់ចូលរួម ដើម្បីទាមទារឲ្យថៅកែដំឡើងប្រាក់ឈ្នួលដល់ពួកគេ ស្រាប់តែពេលនោះលោក ឈូក បណ្ឌិត បានដកកាំភ្លើងបាញ់ចូលហ្វូងកម្មករជាច្រើនគ្រាប់ ដែលជាហេតុនាំឲ្យពួកយើងខ្ញុំទាំងបីនាក់ ត្រូវគ្រាប់កាំភ្លើង ស្ទើរតែ បាត់បង់ជីវិត។ ប៉ុន្តែរហូតមកដល់ពេលបច្ចុប្បន្ននេះ នាងខ្ញុំទាំងបីនាក់ ពុំទាន់ទាន់ទទួលបានយុត្តិធម៌នៅឡើយទេ ដោយជនប្រព្រឹត្តបទល្មើស (ឈូក បណ្ឌិត)អតីត អភិបាលក្រុងបាវិត កំពុងរស់នៅ ក្រៅសំណាញ់ច្បាប់នៅឡើយ។ ក្នុងលិខិតនោះអះអាងថា ការចេញតវ៉ា ជាថ្មីនេះធ្វើឡើង ដោយយោងតាមប្រសាសន៍ របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងសម្ដេចក្រឡាហោម ស ខេងរដ្ឋមន្ត្រីក្រសួងមហាផ្ទៃ បានចេញមកអន្តរាគមន៍ ឲ្យចាត់វិធានការណ៍ ទៅតាមផ្លូវច្បាប់ចំពោះ លោកឧកញ៉ា សុខ ប៊ុន ជាមួយ កញ្ញាសាសា។
ជនរងគ្រោះទាំងនេះ រួមមានឈ្មោះ ប៊ុន ចិន្តា , នុត សុខន និង កែវ នា ដែលជាកម្មករនៅរោងចក្រ កៅវេ នៅក្រុងបាវិត បានស្នើសុំឲ្យសម្ដេចប្រធានរដ្ឋសភាជួយជំរុញលើករណីសំណុំរឿងរបស់ពួកគេទាំងបីនាក់ ដើម្បីអោយសម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងសម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃធ្វើអន្តរាគមន៍ ដើម្បីតាមចាប់ខ្លួនជនល្មើសយកមកផ្ដន្ទាទោសទៅតាមផ្លូវច្បាប៕
អ្នកនាំពាក្យ ៖ សមត្ថកិច្ចមិនបានបន្ធូរដៃក្នុងការតាមចាប់ខ្លួនទណ្ឌិត ឈូក បណ្ឌិត អតីតអភិបាលក្រុងបាវិតនោះទេ
0 Comments