កណ្ដាល ៖ កម្លាំងសមត្ថកិច្ចស្រុកល្វាឯមធ្វើការឃាត់ខ្លួនបុរស២នាក់ ដែលកំពុងប្រើប្រាស់គ្រឿងញៀន បន្ទាប់ពីប្រជាពលរដ្ឋបានរាយការណ៍។ ហេតុការណ៍នេះបានកើតឡើងកាលពីវេលាម៉ោង០៤និង៣០នាទី ថ្ងៃទី២៩ ខែកក្កដា ឆ្នាំ២០១៥ នៅចំណុចលើផ្ទះឈ្មោះ សុខ សេងលី ស្ថិតនៅភូមិតាជោ ឃុំសារិកាកែវ ស្រុកល្វាឯម ខេត្តកណ្ដាល។
ប៉ូលិសស្រុកល្វាឯមបានប្រាប់ឲ្យដឹងថា ជនសង្ស័យទាំងពីរនាក់ទី១-មានឈ្មោះ សុខ សេងលី ភេទប្រុស អាយុ៣៦ឆ្នាំ ជនជាតិខ្មែរ មុខរបរនេសាទត្រី មានទីលំនៅភូមិតាជោ ឃុំសារិកាកែវ ស្រុកល្វាឯម ខេត្តកណ្ដាល និងទី២-ឈ្មោះ ហៀង ឡី ភេទប្រុស អាយុ២៥ឆ្នាំ ជនជាតិខ្មែរ មុខរបរ នេសាទត្រី មានទីលំនៅភូមិតាជោ ឃុំសារិកាកែវ ស្រុកល្វាឯម ខេត្តកណ្ដាល។
ប៉ូលិសបានប្រាប់ឲ្យដឹងទៀតថា នៅមុនពេលកើតហេតុ មានប្រជាពលរដ្ឋបានទូរស័ព្ទមកប្រាប់សមត្ថកិច្ចយើងថាមានអ្នកប្រើគ្រឿងញៀននៅលើផ្ទះជិតផ្ទះគាត់។ ហើយភ្លាមៗនោះសមត្ថកិច្ចយើងបានរៀបកម្លាំងទៅដល់កន្លែងកើតហេតុ ក៏ស្រាប់តែបានឃើញមុខសញ្ញាកំពុងប្រើប្រាស់គ្រឿងញៀននៅលើផ្ទះរបស់ឈ្មោះ សុខ សេងលី។
កម្លាំងយើងបានឃាត់ខ្លួនមុខសញ្ញាបានចំនួន០២នាក់តែម្ដង និងដកហូតបានដបទឹកក្រូចជ័រចំនួន១កញ្ចប់ បារីសេក១កញ្ចប់ មានបារីចំនួន២ដើម ថង់តូចៗ ចំនួន៣ (ដាក់ថ្នាំប្រើកន្លងមកអស់ហើយ) ទុយយោចំនួន១១កំណាត់ ក្រដាសពណ៌ប្រាក់ និងកម្ទេចថង់តូចៗមួយចំនួន(ជាឧបករណ៍សម្រាប់ជក់)។ ជនសង្ស័យទាំងពីរនាក់ រួមនឹងវត្ថុតាង កម្លាំងជំនាញកំពុងកសាងសំណុំរឿងដើម្បីចាត់ការទៅតាមនីតិវិធីច្បាប់៕
សមត្ថកិច្ចស្រុកល្វាឯម ឃាត់ខ្លួនបុរស២នាក់ ពាក់ព័ន្ធករណីប្រើប្រាស់សារធាតុញៀនខុសច្បាប់
0 Comments