ក្លិប Montreal Impact ប្រ​ម៉ាញ់​បាន​កីឡាករ Didier Drogba

ក្លិប Montreal Impact បាន​ប្រកាស​ការ​ចុះហត្ថលេខា​ទិញ​យក​អតីត​ខ្សែប្រយុទ្ធ​របស់​ក្លិប​តោ​ខៀវ Chelsea​កីឡាករ Didier Drogba។

កីឡាករ​ស្ថិតនៅក្នុង​ក្រុម​ជម្រើសជាតិ​កូ​ឌី​វ័រ​ម្នាក់នេះ ដែល​ត្រូវ​បាន​ដោះលែង​ដោយ​ក្លិប​នៅ​ទីក្រុង​ឡុង​ដ៏​ខាងលិច​មួយ​នេះ កាលពី​ដំណាច​រដូវ​កាល​កន្លងទៅ នឹង​ត្រូវ​ចូល​លេង​ជា​ផ្លូវ​ឲ្យ​ក្លិប Montreal Impact នៅ​ប្រទេស​កាណាដា នៅ​ពេល​ដែល​គាត់​ទទួល​បាន​ការអនុញ្ញាត​ការងារ​រួចហើយ​នោះ។

ក្លិប​លេង​នៅ​ក្របខណ្ឌ​បាល់ទាត់ MLS មួយ​នេះ បច្ចុប្បន្ន​ឈរ​នៅ​លេខ​រៀង​ទី​៦ ហើយ​បាន​ប្រកាស​ឲ្យ​ដឹង​ពី​ដំណឹង​ល្អ​របស់ខ្លួន​កាលពី​យប់​ថ្ងៃ​ចន្ទ​កន្លងទៅ។

ប្រធាន​ក្លិប Impact លោក Joey Saputo បាន​និយាយ​នៅលើ​វេ​ប​សាយ​របស់​ក្លិប​ថា វា​គឺជា​កិត្តិយស​ខ្លាំង​ណាស់​ដែល​អាច​ស្វាគមន៍​ការ​មក​ដល់​របស់​កីឡាករ Didier Drogba មកកាន់​ក្លិប Impact។ តាម​អ្វី​ដែល​លោក​ទទួល​បាន​បន្ទាប់ពី​មាន​កិច្ចប្រជុំ​ជាមួយ​កីឡាករ​ជើងចាស់​ម្នាក់​នេះ លោក​យល់​ឃើញ​ថា គាត់​ពិតជា​ចង់​លេង​ឲ្យ​ក្រុម Montreal​ខ្លាំង​ណាស់។

លោក Saputo បាន​បញ្ជាក់​ទៀត​ថា វា​គឺជា​ថ្ងៃ​ដ៏​មហា​អស្ចារ្យ​មួយ នៅក្នុង​ប្រវត្តិសាស្ត្រ របស់​ក្លិប ហើយ​ការ​មក​ដល់​របស់​គាត់ នឹង​ផ្តល់​អត្ថប្រយោជន៍​គ្រប់​រូបភាព​ទាំងអស់​ដល់​ក្លិប។

សូម​បញ្ជាក់​ថា កីឡាករ Drogba ធ្លាប់​ឈ្នះ​ស្បែកជើង​មាស Premier League Golden Boot ២​លើក អំឡុង​ពេល​វេលា​របស់​លោក​នៅ​ជាមួយ​ក្លិប Chelsea​ក្រោយ​រកបាន​២០​គ្រាប់ អំឡុង​រដូវ​កាល​២០០៦-០៧ និង​២៩​គ្រាប់ អំឡុង​រដូវ​កាល​២០០៩-១០​។ គាត់​បាន​ឈ្នះ​ជើងឯក​បាល់ទាត់ Premier League ៤​លើក អំឡុង​ការផ្ទេរ​២​លើក​ជាមួយ​ក្លិប Chelsea ក៏ដូចជា FA Cups ៤​លើក League Cups ៣​លើក Community Shields ២​លើក និង UEFA Champions League ម្តង​កាលពី​ឆ្នាំ​២០១២៕

ក្លិប Montreal Impact ប្រ​ម៉ាញ់​បាន​កីឡាករ Didier Drogba