ភ្នំពេញ ៖ នៅក្នុងឱកាសជួប ជាមួយលោក ឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តី ការគណៈរដ្ឋមន្ត្រី នៅក្នុងជំនួបពិភាក្សាការងារកាលពីព្រឹកថ្ងៃទី១២ខែសីហា ឆ្នាំ ២០១៥ នៅទីស្តីការគណៈរដ្ឋមន្ត្រី លោក Christopher B. Montero ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វីលីពីនប្រចាំព្រះរាជាណាចក្រកម្ពុជា បានជម្រាប នៅពេលខាងមុខ នេះ ក្រុមហ៊ុនហ្វីលីពីន នឹងបង្កើតរោងម៉ាស៊ីនកិនស្រូវដ៏ទំនើបមួយ នៅក្នុងខេត្តសៀមរាប និងធ្វើកិច្ចសហការជាមួយកសិករកម្ពុជា ក្នុងការប្រមូលទិញស្រូវមកកិនជាអង្ករនាំចេញទៅកាន់ទីផ្សារហ្វីលីពីន ដែលនេះជាការបង្កើនការផ្លាស់ប្ដូរពាណិជ្ជកម្មរវាងប្រទេសកម្ពុជា និងហ្វីលីពីន ដែលនឹងធ្វើឲ្យមាន ការរីកចម្រើនមួយកម្រិតទៀត។
យោងតាមការផ្សាយរបស់ទីភ្ញាក់ងារសារព័ត៌មានកម្ពុជាបានឲ្យដឹងថា លោក ឯក ថា អនុប្រធាននាយកដ្ឋានព័ត៌មាន និងប្រតិកម្មរហ័ស នៃទីស្តី ការគណៈរដ្ឋមន្ត្រីបានប្រាប់អ្នកសារព័ត៌មានបន្ទាប់ពីជំនួបនោះថា កិច្ចពិភាក្សា បានផ្តោតសំខាន់ទៅលើការពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងទេសចរណ៍រវាងប្រទេសទាំងពីរកម្ពុជា និងហ្វីលីពីន។ លោកបន្តថា នៅក្នុងជំនួបនោះលោកទូតបានជម្រាបព័ត៌មានទៅលោកឧបនាយក រដ្ឋមន្ត្រី សុខ អាន ថា នៅសប្តាហ៍ក្រោយនឹងមានក្រុមអ្នកវិនិយោគហ្វីលីពីនមួយក្រុមមកធ្វើទស្សនកិច្ចនៅកម្ពុជា ដើម្បីពិនិត្យទីតាំងធ្វើវិនិយោគ។
លោកបន្ត ថា មានក្រុមហ៊ុនហ្វីលីពីនមួយបានសម្រេចនឹងមកបង្កើតរោងម៉ាស៊ីនកិនស្រូវនៅកម្ពុជា ដើម្បីពង្រឹងផ្នែកពាណិជ្ជកម្មរវាងកម្ពុជា និងហ្វីលីពីន។ តាមរយៈការវិនិយោគនេះក្រុមហ៊ុនហ្វីលីពីន នឹងបង្កើតរោងម៉ាស៊ីនកិនស្រូវដ៏ទំនើបមួយ នៅក្នុងខេត្តសៀមរាប និងធ្វើកិច្ចសហការជាមួយកសិករកម្ពុជា ក្នុងការប្រមូល ទិញស្រូវមកកិនជាអង្ករនាំចេញទៅកាន់ទីផ្សារហ្វីលីពីន ដែលនេះជាការបង្កើនការផ្លាស់ប្ដូរពាណិជ្ជកម្មរវាងប្រទេសកម្ពុជា និងហ្វីលីពីន ដែលនឹងធ្វើឲ្យមាន ការរីកចម្រើនមួយកម្រិតទៀត។
លោកឯកអគ្គរដ្ឋទូតបន្តថា ក្នុងរយៈពេល៤ខែ ដែលលោកបំពេញបេសកកម្មនៅកម្ពុជាបានសង្កេតឃើញថា កម្ពុជាមានសក្តានុពលលើវិស័យជាច្រើន ដែលធ្វើឲ្យហ្វីលីពីន និងកម្ពុជាអាចពង្រីកទំនាក់ទំនង និងធ្វើកិច្ចសហប្រតិបត្តិការឲ្យកាន់តែខ្លាំងដូចជាវិស័យពាណិជ្ជកម្មវិស័យកសិកម្ម និងទេសចរណ៍ និង វិស័យអប់រំ។ រដ្ឋាភិបាលហ្វីលីពីននឹងបង្កើតការិយាល័យពាណិជ្ជកម្មមួយនៅកម្ពុជាតែម្តង ដើម្បីងាយស្រួលក្នុងការទំនាក់ទំនង និងជំរុញការធ្វើវិនិយោគ និង ពាណិជ្ជកម្មរវាងប្រទេសទាំងពីរ។
ប្រភពដដែលបានឲ្យដឹងបន្តថា ក្នុងជំនួបនោះឯកឧត្តមឧបនាយករដ្ឋមន្ត្រី សុខ អាន បានជម្រាបជូនភ្ញៀវផងដែរ ពីសក្តានុពលនៃវិស័យទេសចរណ៍កម្ពុជា ដែលសម្បូរទៅដោយប្រាង្គប្រាសាទ ដែលជាបេតិកភណ្ឌពិភពលោក និងបាន ជាប់លំដាប់ថ្នាក់លេខ១ក្នុងពិភពលោកជារមណីយដ្ឋាន ដែលស្អាត និងគួរមកទស្សនា។ លោកបានបន្តថា វិស័យទេសចរណ៍ កម្ពុជាមានកំណើនកើន ឡើងប្រមាណ១៥ ភាគរយជារៀងរាល់ឆ្នាំ ហើយឆ្នាំ២០១៤ កន្លងទៅមានភ្ញៀវ ទេសចរបរទេសប្រមាណ៤,៥ លាននាក់បានមកទស្សនាប្រទេសកម្ពុជា។
លោកឧបនាយករដ្ឋមន្ត្រីក៏បានជំរុញឱ្យប្រទេសហ្វីលីពីន មកធ្វើការវិនិយោគទៅលើវិស័យទេសចរណ៍នៅកម្ពុជា តាមរយៈការសាងសង់សណ្ឋាគារ និងសេវាបម្រើឲ្យវិស័យទេសចរណ៍។ ជាមួយនេះឯកឧត្តម សុខ អាន ក៏បាន ជំរុញផងដែរឲ្យមានការភ្ជាប់ការហោះហើរត្រង់ពីហ្វីលីពីន មកកាន់ប្រទេស កម្ពុជាឲ្យបានច្រើនបន្ថែមទៀត។ ទាក់ទងនឹងចំណុចនេះ ឯកអគ្គរដ្ឋទូតហ្វីលីពីនសង្ឃឹមថា នៅពេលខាង មុខនឹងមានការហោះហើរត្រង់ពីហ្វីលីពីនមកកាន់ទីក្រុងភ្នំពេញ ដោយផ្ទាល់តែម្តង។
ពាក់ព័ន្ធនឹងការវិនិយោគបង្កើតរោងម៉ាស៊ីនកិនស្រូវនៅកម្ពុជាឯកឧត្តមឧបនាយករដ្ឋមន្ត្រីបានលើកទឹកចិត្តថា ដោយសារប្រទេសហ្វីលីពីនជាប្រទេសនាំ ចូលអង្ករដ៏ច្រើននៅក្នុងតំបន់ ដូចនេះក្រុមហ៊ុនហ្វីលីពីនអាចមកវិនិយោគលើ វិស័យស្រូវអង្ករនៅកម្ពុជា ហើយធ្វើការផលិតនាំចេញទៅលក់នៅប្រទេសហ្វីលីពីនតែម្តង។
កន្លងមកនេះទេសចរហ្វីលីពីនមកទស្សនាកម្ពុជាមានចំនួន៩៣.៤៧៥នាក់ ហើយការហោះហើរពីប្រទេសហ្វីលីពីនមកកាន់ខេត្តសៀមរាប មានចំនួន៤ ជើងក្នុង១សប្តាហ៍។ ទំហំពាណិជ្ជកម្មទ្វេភាគីក្នុងឆ្នាំ២០១៤ មានទឹកប្រាក់ប្រមាណ២៥,៧ លានដុល្លារអាម៉េរិក ក្នុងនោះកម្ពុជានាំចេញទៅហ្វីលីពីនបានចំនួនជាង៦.៨០០.០០០ដុល្លារ ហ្វីលីពីននាំចូលមកកម្ពុជាមានទឹកប្រាក់ចំនួនជាង ១៨លានដុល្លារអាម៉េរិក។ ឆ្នាំ២០១៣មានទឹកប្រាក់ចំនួន២១,៥លានដុល្លារអាមេរិក ក្នុងនោះកម្ពុជានាំចេញទៅហ្វីលីពីនមានចំនួនជាង១៤ លានដុល្លារ និង ហ្វីលីពីននាំចូលមកកម្ពុជាមានចំនួនជាង៧លានដុល្លារ៕
ក្រុមហ៊ុនហ្វីលីពីន នឹងបង្កើតរោងម៉ាស៊ីនកិនស្រូវដ៏ទំនើបមួយ នៅក្នុងខេត្តសៀមរាប
0 Comments