ព្រះវិហារ ៖ បែកធ្លាយព័ត៌មានអាស្រូវរបស់អង្គភាពសង្កាត់រដ្ឋបាលព្រៃឈើគូលែនមានមូលដ្ឋាននៅក្នុងឃុំស្រយង់ស្រុកគូលែនបានបង្ហើបឲ្យដឹងថា លោកឃានចាយនាយសង្កាត់រដ្ឋបាលព្រៃឈើគូលែននិងលោកពេជ្របូរិននាយរងសង្កាត់បានឃុបឃិតគ្នាលក់វត្ថុតាងឈើលេខ១ប្រភេទសុក្រំចំនួន៨០កំណាត់ដែលនគរបាលចាប់បានកាលពីថ្ងៃទី០៣កក្កដា២០១៥។
សមត្ថកិច្ចបានរាយការណ៍ឲ្យដឹងនៅព្រឹកថ្ងៃទី២១ ខែសីហា ឆ្នាំ២០១៥ថាវត្ថុតាងឈើទាំងនោះជារបស់លោកផិតណាក់មន្ដ្រីបរិស្ថានខេត្តព្រះវិហារប្រចាំទិសព្រំប្រទល់ស្រុកគូលែនត្រូវបាននគរបាលសេដ្ឋកិច្ចខេត្តចុះបង្ក្រាបរឹបអូសដែលម្ចាស់ឈើឈ្មោះផិតណាក់បានយកទៅលាក់ទុកតាមគុម្ពចេកនិងដុបព្រៃ។ បន្ទាប់ពីបង្ក្រាបកំលាំងនគរបាលបានប្រគល់អោយជំនាញមេព្រៃដែលមានវត្តមានលោកឃានចាយទៅទទួលយកវត្ថុតាងឈើទាំង៨០កំណាត់នោះដើម្បីកសាងសំណុំរឿងបញ្ជូនទៅកាន់តុលាការខេត្ត។
ប្រភពព័ត៌មានបានបន្តថា ឈើសុក្រំដែលចាប់បានមានមុខចាប់ពី២៥ដល់៥០សង់ទីម៉ែត្រកំរាស់១តឹកប្រវែង២ម៉ែត្រស្មើនឹងប្រមាណ៧ម៉ែត្រគូប។
ឈើដែលចាប់បានមានរយៈពេលជាង១ខែមកហើយគឺខាងនគរបាលបានស៊ើបដឹងថា លោកឃានចាយនិងលោកពេជ្របូរិនបានឃុបឃិតគ្នាលក់វាឲ្យឈ្មួញអស់ទៅហើយ។
អ្នកសារព័ត៌មានមិនអាចជួបទំនាក់ទំនងសុំការបំភ្លឺពីលោកឃានចាយនិងលោកពេជ្របូរិនបានទេពាក់ព័ន្ធទៅនឹងប្រភពព័ត៌មានចោទប្រកាន់លោកទាំង២នាក់ថាបានលក់វត្ថុតាងឈើសុក្រំចំនួន៨០កំណាត់កាលពីពេលថ្មីៗនេះ។ អ្នកសារព័ត៌មានរង់ចាំទទួលការបំភ្លឺដោះបន្ទុកពីលោកទាំង២នូវរឿងអាស្រូវខាងលើនេះ៕
បែកធ្លាយនាយសង្កាត់និងនាយរងព្រៃឈើគូលែនរងការចោទថាឃុបឃិតគ្នាលក់ឈើសុក្រំ
0 Comments