មន្ទីរទេសចរណ៍ និងអាជ្ញាធរខេត្តពោធិ៍សាត់គ្រោងអភិវឌ្ឍតំបន់ទេសចរណ៍ចំនួនពីរ

ពោធិ៍សាត់ ៖ ខេត្តពោធិ៍សាត់ គឺជាខេត្តដែលមានទីតាំងស្ថិតនៅភាគខាងលិចនៃប្រទេសកម្ពុជា និងស៊ុមស្របតាមទ្រនិចនាឡិកាពីភាគខាងជើងជាមួយខេត្តបាត់ដំបង ដែលជាប់ទន្លេសាប ,ខេត្តកំពង់ឆ្នាំង , ខេត្តកំពង់ស្ពឺ , កោះកុង ,ដែនសមុទ្រ និងប្រទេសថៃ។ ជាខេត្តដែលមានទីតាំងរវាងទន្លេសាប និងចុងភាគខាងជើងនៃ ជួរភ្នំក្រវាញ។ នេះជា ខេត្តពោធិ៍សាត់ទន្លេ bisects ខេត្តនេះកំពុងរត់ពីភ្នំក្រវាញនៅភាគខាងលិចទន្លេសាបនៅទិសខាងកើត។ ខេត្តពោធិ៍សាត់ជាខេត្តដែលសល់តំបន់ព្រៃឈើប្រមាណជា៥០% ហើយផ្នែកមួយនៃបណ្តាខេត្តចំនួនប្រាំបួនដែលជាផ្នែកមួយនៃ ជីវមណ្ឌលបម្រុងទន្លេសាប។

ខេត្តពោធិ៍សាត់បើតាមរបាយការណ៍របស់មន្ទីរផែនការខេត្តបានឲ្យដឹង ថាមានប្រជារាស្ត្រសរុប៤៧៣.៣២២នាក់ ក្នុងនោះប្រុស ២៣៣.៣៥៦ នាក់ ស្រី២៣៩.៩៦៦ នាក់។ សរុបចំនួនគ្រួសារមានចំនួន ១០៤.៦៩៦គ្រួសារ ក្នុងនោះមេគ្រួសារជាស្ត្រីចំនួន១៨.៨៧ ភាគរយ អត្រាកំណើនប្រចាំឆ្នាំ ១.១២ ភាគរយ នៅក្នុងខេត្ត។

ទឹកដីខេត្តពោធិ៍សាត់នេះរួមមាន ផ្ទៃដីសរុបចំនួន ១២.៦៩២គីឡូម៉ែត្រ មាន៦ស្រុក មានឃុំសង្កាត់៤៩ និង៥០៧ភូមិ ប្រជារាស្ត្រនៅក្នុងខេត្តនេះមាន ៣,២ ភាគរយនៃប្រជាជនរស់នៅទូទាំងប្រទេសកម្ពុជា ដង់ស៊ីតេប្រជារាស្ត្ររបស់ខេត្ត គឺ២៨ នាក់ ក្នុងមួយ គីឡូម៉ែត្រ ការ៉េ ទាបជាង ដង់ស៊ីតេថ្នាក់ជាតិដែលមានតែ ៦៤ នាក់ ក្នុងមួយគីឡូម៉ែត្រការ៉េ ។

ក្រៅពីទិដ្ឋភាពប្លែកៗនៅតាមដងទន្លេសាប ខេត្តនេះនៅមានតំបន់ ខ្លះៗទៀតសម្រាប់លួងចិត្តដល់ទេសចរផងដែរដូចជាៈ រមណីយដ្ឋានធម្មជាតិទឹកធ្លាក់ច្រកល្អៀង មានចម្ងាយ៤១គីឡូម៉ែត្រពីទីរួមស្រុកក្រគរខាងត្បូងផ្លូវជាតិលេខ០៥ ដោយតំបន់នេះ នៅតាមដងផ្លូវអមទៅដោយមានស្រែចម្ការប្រជាពលរដ្ឋ និងមាន កូនភ្នំ មានព្រៃ មានទឹកអូរប្រឡាយនៃតំបន់ប្រព័ន្ធធារាសាស្ត្ររបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយបានស្ថាបនាជូនដល់ប្រជាពលរដ្ឋធ្វើស្រែចម្ការគ្រប់រដូវរួមទាំងមានប្រព័ន្ធផ្លូវថ្នល់សម្រាប់ដឹកកសិផលទៅលក់នៅទីប្រជុំជនបានទៀត។ ជាមួយគ្នានោះដែរក៏មានធម្មជាតិ ដែលមានទឹកជាប្រចាំ និងសម្បូរដោយរុក្ខជាតិហូបផ្លែបែបធម្មជាតិដូចជា គុយ សិរមាន់ ភ្ញៀវ រួមទាំងផ្លែឈើផ្សេងៗទៀតដែលអាចបេះពិសាបានបើមិនចង់បេះខ្លួនឯងទេលោកអ្នកក៏អាចទិញផ្លែឈើទាំងនោះបានតាមដងផ្លូវ ដែលបងប្អូនបានដាក់លក់ផងដែរ។

លោកសំ ឃីមប្រធានមន្ទីរទេសចរណ៍ខេត្តពោធិ៍សាត់បានឲ្យដឹងថា ខេត្តនេះក៏មានសក្ដានុពលអំណោយផលដល់ការរស់នៅរបស់ប្រជាពលរដ្ឋ មានភាពងាយស្រួលក្នុងការប្រកបរបររកស៊ីចិញ្ចឹមជីវិតផងដែរ។ ព្រោះតំបន់ខ្ពង់រាបជាតំបន់ដំណាំកសិឧស្សាហកម្ម តំបន់វាលទំនាបគឺពឹងផ្អែកលើដំណាំកសិកម្មច្រើនដូចជាដំណាំស្រូវជាដើមព្រមទាំងប្រជាកសិករប្រកបរបរនេសាទត្រីនៅបឹងធម្មជាតិទន្លេសាបបានទៀត។

លោក សំ ឃីម ប្រធានមន្ទីរទេសចរណ៍ខេត្តពោធិ៍សាត់បានប្រាប់អ្នកយកព័ត៌មានឲ្យដឹងកាលពីវេលាម៉ោង១១ព្រឹកថ្ងៃទី០៦ ខែសីហា ឆ្នាំ២០១៥ នេះថា តំបន់ទេសចរណ៍ចំនួនពីរ ដែលកំពុងតែទាក់ទាញភ្ញៀវទេសចរជាតិ និងអន្តរជាតិមកទស្សនាច្រើនបំផុតក្នុងទឹកដីខេត្តពោធិ៍សាត់នោះ ពេលនេះត្រូវបានអាជ្ញាធរខេត្តពោធិ៍សាត់ទទួលគម្រោងពីវិនិយោគមកអភិវឌ្ឍន៍ដំបន់ទាំងពីរនាពេលខាងមុខនេះ ហើយនៅខាងស្រុកក្រគរ គឺចំនួនពីរកន្លែងទី១ តំបន់ទេសចរណ៍ធម្មជាតិបឹងទន្លេសាប ភូមិសហគមន៍បណ្ដែតទឹកកំពង់លួង និងទី២ តំបន់ទេសចរធម្មជាតិទឹកធ្លាក់ច្រកល្អៀង។

លោក សំ ឃីមបានបន្តថា លោកបានឃើញកញ្ចប់ថវិកាក្នុងរបាយការណ៍អភិវឌ្ឍន៍តំបន់ទេសចរណ៍ពីរកន្លែងនៅស្រុកក្រគរនេះ មានចំនួនទឹកប្រាក់ (មួយលានប្រាំសែនដុល្លារអាមេរិក) ត្រូវបានអាជ្ញាធរខេត្ត និងមានដាក់គម្រោងធ្វើការអភិវឌ្ឍចំនួនពីរកន្លែងហើយដើម្បីកែប្រែតំបន់នេះឲ្យក្លាយទៅជារមណីយដ្ឋានទេសចរណ៍ ដែលមានស្តង់ដារសម្រាប់ទទួលភ្ញៀវជាតិ និងអន្តរជាតិដែល ដោយត្រូវបានអនុវត្តនៅចុងឆ្នាំ២០១៥ក្នុងពេលខាងមុខនេះ។

លោកសំ ឃីម បានបានបន្តទៀតថា នៅថ្ងៃទី១៣ ខែសីហា ឆ្នាំ២០១៥ខាងមុខនេះខាងមន្ទីរទេសចរណ៍ និងអាជ្ញាធរខេត្តរួមជាមួយខាងក្រុមហ៊ុនវិនិយោគ នឹង ចុះសិក្សានៅតំបន់ទេសចរណ៍ធម្មជាតិរមណីយដ្ឋានទឹកធ្លាក់ច្រកល្អៀងនៅខាងភូមិសាស្ត្រឃុំឈើតុំ ស្រុកក្រគរ ខេត្តពោធិ៍សាត់ ដែលមានចម្ងាយផ្លូវជាង៤០គីឡូម៉ែត្រខាងត្បូងផ្លូវជាតិលេខ០៥ នៅបរិវេណផ្លូវបំបែកទីរួមស្រុកក្រគរ។ ក្នុងនោះត្រូវសិក្សាឲ្យច្បាស់លាស់នៃកាគ្រប់គ្រងដាច់ដោយឡែកក្នុងទីតាំងទេសចរណ៍នេះងាយស្រួលគ្រប់គ្រងដាច់ចេញពីខាងបរិស្ថាន ថាតើអាជ្ញាធរនិងខាងបរិស្ថានឲ្យវិសាលភាពតំបន់នេះត្រឹមណាខ្លះក្នុងការអភិវឌ្ឍរួមទាំងការពង្រីកដងផ្លូវធំទូលាយកុំឲ្យមានការធ្វើដំណើរមកកម្សាន្តកកស្ទះភ្ញៀវជាតិ និងអន្តរជាតិជាពិសេសគឺនៅពេលមានបុណ្យទានប្រពៃណីខ្មែរ និងបុណ្យប្រពៃណីចិនវៀតណាមគឺភ្ញៀវជាតិមកកម្សាន្តកកស្ទះ។ ក្រោយពេលដែលពួកគេមកកម្សាន្តនៅតំបន់ច្រកល្អៀងរួចភ្ញៀវជាតិនិងអន្តរជាតិទាំងនោះអាចមកទស្សនានៅលើផ្ទៃទឹកនៃតំបន់ទេសចរណ៍បែបធម្មជាតិផ្ទះបណ្ដែតទឹកនៃការរស់នៅរបស់បងប្អូនសហគមន៍ក្នុងផ្ទៃបឹងទន្លេសាបនេះថែមទៀត។

លោកសុខ វឿន ជាមន្ត្រីសម្របសម្រួលទេសចរណ៍ក្នុងតំបន់សហគមន៍ទេសចរណ៍ភូមិបណ្ដែតទឹកប្រចាំការឃុំកំពង់លួងប្រាប់ថា ភ្ញៀវទេសចរ ដែលច្រើនលើសលប់ជាងគេពីមួយឆ្នាំទៅមួយឆ្នាំមកកម្សាន្តនៅទីនេះគឺភាគច្រើនជាភ្ញៀវអន្តរជាតិចម្រុះជាតិសាសន៍។ លោកបន្តថា ឆ្នាំ២០១៥នេះមានការកើនឡើងលើសជាងឆ្នាំ២០១៤គួរឲ្យកត់សម្គាល់នេះគ្រាន់តែគិតត្រឹមឆមាសទី០១ ដើមខែ មករា ដល់ខែមិថុនា ឆ្នាំ២០១៥នេះ ភ្ញៀវទេសចរអន្តជាតិសុទ្ធសាធមកទស្សនានៅតំបន់ទេសចរសហគមន៍ភូមិបណ្ដែតទឹក ឃុំកំពង់លួងមានចំនួន២.៨៨៨ នាក់គឺកើនជាងឆ្នាំ២០១៤ ហើយរដូវប្រាំងមិនសូវមានភ្ញៀវមកកម្សាន្តទៀត។

លោក វឿន បន្តថា ភ្ញៀវដែលសម្រុកមកកម្សាន្តទីនេះខ្លាំងជាងគេនោះគឺចាប់ពីដើមខែកក្កដារហូតដល់ខែវិច្ឆិកា។ នៅនៅរដូវវស្សាទឹកទន្លេសាបចាប់ផ្ដើមឡើង ពួកគេមកច្រើនណាស់ ព្រោះគេមានឧកាសមើលពីផ្ទៃបឹងទន្លេសាបទាំងមូលបាន រួមទាំងទៅលំហែកាយទៅទស្សនានៅតំបន់អភិរក្សមួយចំនួន ដូចជាកំពង់ផ្គោល កំពង់ប្រាក់ តំបន់ដីរនាថជាដើមដើម្បីគយគន់មើលហ្វូងសត្វស្លាប់រាប់សែនក្បាលចម្រុះពណ៌លើបឹងទន្លេសាបនេះ។ លោកវឿន ក៏បានរំលឹកបញ្ជាក់ថា ទីតាំងទេសចរណ៍មួយនេះ ខាងទូរទស្សន៍ជាតិរបស់ប្រទេសបារាំងក៏បានបើកយន្តហោះមកផ្ដិតរូបភាពនេះចំនួនពីរថ្ងៃយកទៅផ្សាយពីតំបន់ស្រស់ត្រកាលនេះដែរ។

ទាក់ទិននឹងការអភិវឌ្ឍន៍ចំនួនពីរតំបន់នេះលោកអ៊ឹង គឹមលាង អភិបាលរងខេត្តពោធិ៍សាត់ទទួលកិច្ចការអភិវឌ្ឍន៍បានប្រាប់អ្នកយកព័ត៌មានឲ្យដឹងថា ខេត្តពោធិ៍សាត់ជាខេត្តដែលមានតំបន់ទេសចរណ៍ច្រើន ហើយមានសក្ដានុពលទៅលើវិស័យទេសចរណ៍ និងផ្នែកកសិឧស្សាហកម្មទើបអាជ្ញាធរខេត្តជ្រើសយកតំបន់ទេសចរចំនួនពីរសិនដើម្បីយកមកធ្វើការអភិវឌ្ឍជាជំហានដំបូង។ ពោលគឺតំបន់ធម្មជាតិទេសចរណ៍ទឹកធ្លាក់ច្រកល្អៀង និងតំបន់ទេសចរណ៍ធម្មជាតិសហគមន៍ផ្ទះបណ្ដែតទឹកកំពង់លួងដើម្បីប្រែក្លាយឲ្យទៅជារមណីយដ្ឋានទេសចរណ៍ធម្មជាតិបែបវប្បធម៌ដែលមានស្តង់ដារសម្រាប់ទទួលភ្ញៀវជាតិ និងជាតិចម្រុះជាតិសាសន៍ចូលមកទស្សនារួមទាំងការទេសចរកម្សាន្តតាមទូកកាណូតលើផ្ទៃទន្លេសាប គយគន់មើលផ្ទះបណ្ដែតទឹក សិក្សាពីការរស់នៅរបស់ប្រជជនភូមិនេះផងរួមទាំងមើលហ្វូងសត្វស្លាប និងមើលព្រះសុរិយារាបលិច ដែលចាំងឆ្លុះពណ៌ធម្មជាតិដ៏ស្រស់ត្រកាលនៅលើផ្ទៃទឹកបឹងធម្មជាតិទន្លេសាបនេះ។

លោកអភិបាលរងបានពន្យល់ទៀតថា ចំពោះតំបន់ទេសចរណ៍ធម្មជាតិទឹកធ្លាក់ច្រកល្អៀងគឺត្រូវរៀបចំឲ្យមានអនាម័យ បរិស្ថានល្អ បង្កើតឲ្យមានរីស្សត ផ្ទះឈើសម្រាប់ភ្ញៀវស្នាក់នៅដោយមានសណ្ដាប់ធ្នាប់ច្បាស់ច្បាស់លាស់ ធ្វើការការពារអភិរក្សព្រៃឈើទាំងអស់ ដែលនៅក្នុងតំបន់ដែនទេសចរណ៍នោះ និងរៀបចំបង្កើតឲ្យមានភោជនីយដ្ឋានមួយចំនួនថែមទៀត។ ដោយកែលម្អឲ្យបានស្អាតជៀសវាងប៉ះពាល់អារម្មណ៍ភ្ញៀវទេសចរ ដែលមកកម្សាន្តមានការថ្នាំងថ្នាក់ចិត្ត ហើយបង្កើតឲ្យមានទីតាំងសម្រាប់ចតយានយន្តបានធំទូលាយ ជាពិសេសការរៀបចំឲ្យមានសុខសុវត្ថិភាពសន្តិសុខសណ្ដាប់ធ្នាប់ល្អដើម្បីឲ្យភ្ញៀវមានទំនុកចិត្តភាពកក់ក្តៅចូលមកស្នាក់នៅកម្សាន្តបានសប្បាយដើរមើលទស្សនាបែបធម្មជាតិនូវសំឡេងទឹកជ្រោះហូរធ្លាក់មិនដាច់ពីចេញពីតំបន់ទេសចរណ៍មួយនេះ ដែលអមទៅដោយព្រៃធម្មជាតិដ៏ស្រស់បំព្រងខួបប្រាំងវស្សាជាមួយនឹងផ្លែឈើព្រៃ ដែលអាចបេះពិសាបានទៀតផង។

ដោយឡែកសម្រាប់តំបន់ទេសចរណ៍កំពង់លួងក៏ដូចគ្នាដែរ គឺត្រូវរៀបចំលក្ខណៈសមស្របដោយបង្កើតហូមស្តេសម្រាប់ភ្ញៀវស្នាក់នៅលើទឹក រៀបចំផ្ទះទឹកឲ្យមានរបៀបរៀបរយល្អ រៀបចំឲ្យមានទីតាំងផែស្ងួតមានទូកកាណូតបំពាក់ត្រឹមត្រូវមានអាវពោងសម្រាប់ភ្ញៀវពាក់ម្នាក់មួយៗទៅតាបបទដ្ឋានរបស់វា ដើម្បីផ្តល់ភាពងាយស្រួលសម្រាប់ចុះទៅកម្សាន្ត និងបង្កើតឲ្យមានរីស្សតនៅឃុំរាំងទិលដោយធ្វើការការពារដើម្បីរារាំងការពារនៅជុំវិញឲ្យនៅគង់វង្ស ។ ដោយមានគោលការណ៍គឺឲ្យមានសណ្ដាប់ធ្នាប់នៅពេលមានបញ្ហា និងប៉ះពាល់បរិស្ថាន ដូចជាប្រើប្រាស់សំឡេងរំខាន ការគ្រប់គ្រងអនាម័យកាកសំណល់រឹង និងរាវ រួមជាមួយការបន្ទោបង់ជាដើម។

ពាក់ព័ន្ធនឹងការអភិវឌ្ឍតំបន់ទេសចរណ៍ទាំងពីរនេះលោកអ៊ឹង គឹមលាង បានបញ្ជាក់ថា មានក្រុមហ៊ុនចំនួន៥ក្នុង ក្រុមហ៊ុនចិន ថៃ និងខ្មែរ ដែលបានដាក់គម្រោង និងដាក់ទុនវិនិយោគទៅលើវិស័យទេសចរណ៍នៅក្នុងខេត្តពោធិ៍សាត់នេះដោយជំហានដំបូង គឺខាងវិនិយោគបានពេញចិត្តជ្រើសយកតំបន់ទេសចរណ៍ធម្មជាតិទឹកធ្លាក់ច្រកល្អៀងជាពិសេសនោះគឺតំបន់ទេសចរបែបធម្មជាតិឃុំកំពង់លួង ដែលត្រូវបានចាប់ផ្តើមការអភិវឌ្ឍនៅចុងឆ្នាំ២០១៥ខាងមុខនេះ។

លោកអភិបាលរងក៏បានឲ្យដឹងទៀតថា ដោយឡែកតំបន់ទេសចរណ៍មួយចំនួនទៀតនៅស្រុកវាលវែងក៏នឹងមានគម្រោងធ្វើការអភិវឌ្ឍជាបន្តបន្ទាប់ទៀតដែរតាបរយៈបទបង្ហាញរបស់អាជ្ញាធរខេត្តបានចុះអឹមអូយូជាមួយក្រុមហ៊ុនថៃរួចហើយ ប៉ុន្តែអាជ្ញាធរខេត្តនឹងត្រូវសម្លឹងមើលថាតើក្រុមហ៊ុនមួយណាដែលមានលទ្ធភាពខ្លាំងជាងគេក្នុងកាមកវិនិយោគតែប៉ុណ្ណោះ។

លោកសំ ឃីម ប្រធានមន្ទីរទេសចរណ៍ខេត្តពោធិ៍សាត់បានបញ្ជាក់ចុងក្រោយថា តាមរយៈស្ថិតិរបស់សណ្ឋាគារ ផ្ទះសំណាក់ កន្លែងកម្សាន្តនានា ក្នុងរយៈពេល ៦ខែ ដើមឆ្នាំ ២០១៥ មានភ្ញៀវ ទេសចរបរទេសចូលមកទស្សនាកម្សាន្តក្នុងខេត្តពោធិ៍សាត់សរុបចំនួន ៤.៥៧៩ នាក់។ បើប្រៀបធៀបរយៈពេលដូចគ្នា ភ្ញៀវទេសចរមានការកើនឡើង៦៤,០៦ % (៦ខែ ឆ្នាំ ២០១៤ ចំនួន ២.៧៩១នាក់)។

តាមកិច្ចសហការជាមួយប៉ូលិសទេសចរណ៍ និងការចុះត្រួតពិនិត្យរបស់មន្ត្រីជំនាញ ក្នុងរយៈពេល ៦ខែដើម ឆ្នាំ ២០១៥ នេះមានភ្ញៀវទេសចរក្នុងស្រុកចូលមកទស្សនាកម្សាន្តក្នុងខេត្តពោធិ៍សាត់សរុបចំនួន ២៥១.២២៥ នាក់។ បើប្រៀបធៀបរយៈពេលដូចគ្នា គឺមានការកើនឡើង ១០៦,៣% (ភ្ញៀវក្នុង ៦ខែ ឆ្នាំ២០១៤ មានចំនួន១៥១.៨១៦ នាក់)។

ក្នុងនោះមាន ភ្ញៀវនៅរមណីយដ្ឋាន ទឹកធ្លាក់ច្រកល្អៀង រយៈពេល ៦ខែ ដើមឆ្នាំ ២០១៥ មាន៖

-ភ្ញៀវជាតិ ៥៣.៣២៥ នាក់

-ភ្ញៀវអន្តរជាតិ ១៥៧ នាក់

ភ្ញៀវអន្តរជាតិនៅសហគមន៍ភូមិអណ្តែតទឹក កំពង់លួងមានចំនួន២.៨៨៨ នាក់។

ជាមួយគ្នានោះដែរក៏មានប្រជាពលរដ្ឋនៅក្នុងខេត្តពោធិ៍សាត់បានសាទរចំពោះការយកចិត្តទុកដាក់របស់អាជ្ញាធរខេត្ត និងមន្ទីរទេសចរណ៍ខេត្តពោធិ៍សាត់ ដែលបានធ្វើការអភិវឌ្ឍតំបន់ទេសចរណ៍ទាំងពីរទីតាំងនេះ ដើម្បីឲ្យពួកគាត់នូវតំបន់ទាំងពីរនេះមានមុខរបរថ្មី បន្ថែមមួយទៀតរួមផ្សំផ្គត់ផ្គងជីវភាពគ្រួសារឲ្យមានភាពកាន់តែប្រសើរឡើងតាមរយៈការអភិឌ្ឍនៃតំបន់ទេសចរណ៍នេះ៕

*ទឹកធ្លាក់ច្រកល្អៀង

M08-08-15-w4