សូមបញ្ជាក់ផងដែរថា តាប៊ុយ ជាវីជេវ័យក្មេងតែម្នាក់គត់ប្រចាំកម្ពុជាដែលបានក្លាយគណៈកម្មការអន្តរជាតិក្នុងកម្មវិធីប្រគល់ពានរង្វាន់ដល់សិល្បករឆ្នើមប្រចាំអាស៊ី ឬ MAMA ២០១៣។
មុននឹងឈានចូលដល់ការបង្ហាញបទពិសោធន៍ នឹងគន្លឹះនៃភាពជោគជ័យក្នុងអាជីពជាពិធីករ និងអ្នកផលិតកម្មវិធីនោះ សូមពាំនាំអារម្មណ៍មិត្តអ្នកអានមកជួបជាមួយជីវប្រវត្តិរបស់លោកជាមុនសិន។ ស្ថិតក្នុងវ័យ២៧ឆ្នាំតាប៊ុយបាន និយាយដោយទឹកមុខញញឹមថា លោកមានស្រុកកំណើតនៅទីក្រុងភ្នំពេញផ្ទាល់តែម្ដង លោកគឺជាកូនទី២នៅក្នុងចំណោមបងប្អូន៣នាក់ ដោយមានលោកឪពុកអ្នកម្ដាយប្រកបរបរជាអ្នករកស៊ី។ ស្ថិតក្នុងស្ថានភាពគ្រួសារដែលមានជីវភាពសមរម្យមិនបានធ្វើឲ្យតាប៊ុយជួបឧបសគ្គក្នុងការរស់នៅនោះទេ ដោយលោកបានបញ្ចប់ការសិក្សាថ្នាក់បរិញ្ញាបត្រច្បាប់(ភាសាអង់គ្លេស)នៅសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចក្នុងឆ្នាំ២០១០។ លោកបានបង្ហើបឲ្យដឹងផងដែរថា “ខ្ញុំចាប់ផ្ដើមធ្វើការតាំងពីខ្ញុំកំពុងសិក្សាថ្នាក់បរិញ្ញាបត្រឆ្នាំទី២មកម្ល៉េះ”។ ការងារដំបូងដែលលោកចាប់ផ្ដើមធ្វើគឺអាជីពជាពិធីករផ្ទាល់តែម្ដង។ លោកបានរំលឹកថា “កាលនោះខ្ញុំបានឃើញការប្រកាសជ្រើសរើសពិធីករ នៅទូរទស្សន៍ My TV ហើយខ្ញុំក៏បានដាក់ពាក្យចូលបម្រើការងារនៅទីនោះតែម្ដង។
ចំពោះការធ្វើបទសម្ភាសន៍ទៀតសោត អ្នកគ្រប់គ្រងបានដាក់វិញ្ញាសាមួយដែលត្រូវប៉ះនឹងចំណង់ចំណូលចិត្តរបស់លោកផ្ទាល់ តែម្ដងគឺអត្ថាធិប្បាយក្នុងកម្មវិធីមួយដែលនិយាយទាក់ទងជាមួយនឹងយុវវ័យ។ វាហាក់ដូចជាអំណោយផលណាស់ព្រោះតាំងពីវ័យក្មេងមក លោកចូលចិត្តមើលកម្មវិធីទូរទស្សន៍របស់បរទេសដែលពាក់ព័ន្ធនឹងយុវវ័យ ហេតុដូច្នេះហើយវាមិនមែនជាការពិបាកសម្រាប់លោកទេក្នុងការអត្ថាធិប្បាយ។
ក្រោយពីសម្ភាសន៍រំលងបាន៣ថ្ងៃលោកក៏បានទទួលដំណឹងថាបានជាប់ចូលបម្រើការងារនៅទូរទស្សន៍ My TV ក្នុងឆ្នាំ២០០៩។ សូមបញ្ជាក់ផងដែរថា ការចូលបម្រើការងារនៅស្ថានីយទូរទស្សន៍ដំបូងលោកមានតួនាទីត្រឹមជាពិធីករក្នុងកម្មវិធីកម្សាន្ត ដែលនិយាយទាក់ទងនឹងតារាបរទេស។ ទោះបីជាមានតំណែងជាពិធីករក៏ពិតមែន ប៉ុន្តែតាប៊ុយតែងតែជួយផ្ដល់ជាគំនិតដល់អ្នកដឹកនាំកម្មវិធី ឬពេលខ្លះលោកជួយរៀបចំជាព័ត៌មានក្នុងកម្មវិធីផ្ទាល់តែម្ដង។ ដោយចិត្តស្រឡាញ់ និងឧបនិស្ស័យតាំងពីវ័យក្មេងមកបានធ្វើឲ្យតាប៊ុយខិតខំប្រឹងប្រែងក្នុងតួនាទីការងាររបស់ខ្លួនជាពិធីករ រហូតផលិតជាកម្មវិធីមួយដែលមានរូបលោកជាអ្នកគ្រប់គ្រងផ្ទាល់តែម្ដង។
តាមរយៈស្នាដៃផលិតកម្មវិធីដំបូងដែលធ្វើឲ្យលោកមានភាពលេចធ្លោ ឬនិយាយបានថា វាជាជោគជ័យមួយសម្រាប់ជីវិតរបស់លោកនោះគឺការផលិតកម្មវិធីមួយដែលមានឈ្មោះថា “ពេញចិត្តឬអត់! ” នៅថ្ងៃទី១០ ខែវិច្ឆិកា ឆ្នាំ២០១២។ ចំពោះផលលំបាកក្នុងការផលិតកម្មវិធីនេះតាប៊ុយបានបង្ហើបឲ្យដឹងថា “វាមានការលំបាកបន្តិចព្រោះខ្ញុំធ្លាប់ផលិតកម្មវិធីបទចម្រៀងគឺមានបុគ្គលិកតិច ប៉ុន្តែដល់ពេលផលិតកម្មវិធីបែបកម្សាន្តគឺយើងត្រូវមានបុគ្គលិកច្រើន និងស្ទូឌីយោធំ ហើយការគ្រប់គ្រងទៀតសោតគឺមានលោកតែម្នាក់ប៉ុណ្ណោះ មួយវិញទៀងកម្មវិធីថ្មីបែបនេះគឺលោកត្រូវពន្យល់ និងណែនាំបុគ្គលិកនៅក្រោមបង្គាប់ឲ្យគាត់យល់ថាត្រូវធ្វើបែបណាៗ។ ក្នុងនាមជាអ្នកគ្រប់គ្រង នឹងផលិតកម្មវិធីមួយរូបលោកបានបង្ហើបឲ្យដឹងថា នៅពេលធ្វើអី្វមួយគឺយើងត្រូវការលះបង់ពេលវេលាមិនថាយប់ឬក៏ថ្ងៃនោះទេដើម្បីឲ្យការងារនោះទទួលបានភាពជោគជ័យ នឹងឆាប់បានទៅដល់គោលដៅមួយដែលយើងចង់បាន។ ជាក់ស្ដែងផ្ទាល់ដូចជាការបង្កើតកម្មវិធី “ពេញចិត្តឬអត់!” ដំបូងលោករួមទាំងក្រុមការងារបានចំណាយពេលធ្វើការរហូតដល់យប់ជ្រៅដើម្បីសម្រេចឲ្យបាននូវការចាក់ផ្សាយទាន់ថ្ងៃកំណត់។ ជាការពិតណាស់ការងារអ្វីក៏ដោយវារមែងទាមទារនៅការតស៊ូអត់ធ្មត់ និងសេចក្ដីព្យាយាមអំណត់ទើបធ្វើឲ្យការងារនោះទទួលបានជោគជ័យនិងសម្រេចទៅគោលដៅដែលយើងបានកំណត់។
ចំពោះមូលហេតុដែលធ្វើឲ្យកម្មវិធីពេញចិត្តអត់ទទួលបានភាពជោគជ័យតាប៊ុយបានបង្ហាញឲ្យដឹងថា “ដោយសារតែកម្មវិធីហ្នឹងខ្ញុំព្យាយាមឲ្យពិធីករពិធីការិនីតារាកិត្តិយសគណៈកម្មការរួមទាំងបេក្ខជនបញ្ចេញនូវចរិតពិតនិងកាយវិការពិតរបស់ខ្លួនដែលវាអាចជាគន្លឹះមួយដែលធ្វើឲ្យទស្សនិកជនគាត់ទស្សនាហើយមានការសើចសប្បាយរីករាយ និងមានការពេញចិត្តនឹងគាំទ្រកម្មវិធីរបស់ខ្ញុំ”។ ក្រោយពីបានទទួលភាពជោគជ័យក្នុងកម្មវិធីពេញចិត្តអត់! នោះមក តាប៊ុយ ក៏បានបង្កើតកម្មវិធីមួយដែលមានឈ្មោះថា Mr and Ms Talk Showកម្មវិធី រង្វាន់ទេវតា កម្មវិធី 15000$ នឹងកម្មវិធី ហាមសើច នឹងកម្មវិធី អូឡាឡា ដែលលោកទើបតែបង្កើតនាពេលថ្មីៗនេះផងដែរ ហើយ តាប៊ុយ ក៏សង្ឃឹមយ៉ាងមុតមាំថាកម្មវិធីមួយនេះនឹងទទួលបានការគាំទ្រពីទស្សនិកជន ពីព្រោះវាកម្មវិធីបែប Talk show & Game។ ដោយសារតែបទពិសោធន៍រួមផ្សំជាមួយនឹងភាពឆ្លាតវៃ តាប៊ុយ បានប្រាប់ឲ្យដឹងថា ការផលិតកម្មវិធីនីមួយៗ លោកមិនបានប្រើរយៈពេលយូរអង្វែងនោះទេ ទោះបីជាលោកទើបតែមានបទពិសោធន៍ក្នុងជំនាញនេះរយៈពេលមិនយូរក្ដី។ លោក មានប្រសាសន៍បន្តថា មុននឹងលោកផលិតកម្មវិធីនីមួយៗ លោកបានសិក្សាស្រាវជ្រាវយ៉ាងច្បាស់ពីបរិបទក្នុងសង្គមខ្មែរយើងថាតើពួកគាត់ចូលចិត្តអ្វី និងមិនចូលចិត្តអ្វី! ចំណុចមួយទៀតគឺនៅពេលដែលលោកមានអារម្មណ៍ស្រឡះ គឺខួរក្បាលរបស់លោក គឺដើរលឿនគិតអ្វីក៏ចាប់ឃើញ។ ពិតមែនហើយអារម្មណ៍គឺចំណុចសំខាន់មួយដែលធ្វើឲ្យការងាររបស់អ្នកទទួលបានភាពជោគជ័យ ហេតុដូច្នេះមុននឹងធ្វើអ្វីមួយត្រូវតោងគិតនឹងផ្តោតគំនិតអារម្មណ៍ឲ្យបានស្ងប់ទើបការគិតរបស់អ្នកក៏វាស្រឡះទៅតាមហ្នឹងដែរ។ កត្តាមួយទៀតដែលធ្វើឲ្យ តាប៊ុយ ទទួលបានជោគជ័យក្នុងការផលិតកម្មវិធីនោះ គឺគ្រួសាររបស់លោកផ្ទាល់តែម្ដងដោយលោកបានប្រាប់ឲ្យដឹងថា ជារៀងរាល់យប់នៅពេលត្រឡប់ពីបំពេញការងារទៅផ្ទះវិញលោកតែជួបជុំជាមួយក្រុមគ្រួសារដើម្បីសាកសួរពីគំនិតយោបល់ ឬក៏ពិភាក្សាជាមួយពួកគាត់ក្នុងការផលិតកម្មវិធី ដែលពួកគាត់គឺប្រៀបដូចជាកញ្ចក់ឆ្លុះបញ្ចាំងពីស្នាដៃការងាររបស់លោកផងដែរ។ ក្រៅពីកត្ដាទាំងប៉ុន្មានខាងលើតាប៊ុយបានបន្ថែមទៀតថា ចំណេះដឹងគឺជាអ្វីដែលយើងមិនអាចខ្វះជាពិសេសគឺភាសាអង់គ្លេសផ្ទាល់តែម្ដងព្រោះក្នុងនាមជាអ្នកផលិតកម្មវិធីអ្នកដឹកនាំកម្មវិធីរួមទាំងការងារជាពិធីករ គឺតម្រូវឲ្យលោកធ្វើការសិក្សាស្រាវជ្រាវច្រើននៅលើប្រព័ន្ធអ៊ីនធើណេតដែលភាគច្រើនឯកសារសុទ្ធសឹងជាភាសាអង់គ្លេស។ គន្លឹះដែលធ្វើឲ្យការងារផលិតកម្មវិធី ឬក៏ដឹកនាំកម្មវិធីរបស់លោកទទួលបានទទួលនូវភាពជោគជ័យលើវិស័យទូរទស្សន៍នោះគឺអាម្មរណ៍របស់លោកគឺផ្ដិតជាប់ជាមួយនឹងទូរទស្សន៍រហូតមិនថាម៉ោងបំពេញការងារឬម៉ោងសម្រាកនោះទេ! សូម្បីតែពេលមើលទូរទស្សន៍ក៏លោកផ្ដោតអារម្មណ៍នៅលើកម្មវិធីនីមួយៗដែលអ្នកផលិតកម្មវិធីគេធ្វើថាតើគេធ្វើបែបម៉េចហើយគេមានបច្ចេកទេសបែបណាទើបធ្វើឲ្យកម្មវិធីនោះទទួលបានភាពជោគជ័យ។ ហើយចំណុចសំខាន់មួយទៀតក្នុងនាមជាអ្នកគ្រប់គ្រងមួយរូបត្រូវដឹងថាបុគ្គលិកក្រោមបង្គាប់របស់ខ្លួនកំពុងតែធ្វើអ្វីខ្លះហើយក្នុងនាមលោកជាអ្នកគ្រប់គ្រងត្រូវតែច្បាស់ជាងកូនចៅនិងត្រូវរៀបចំគម្រោងថ្មីៗរហូតសម្រាប់ពួកគាត់ធ្វើ ហើយគ្រប់ពេលដែលកម្មវិធីរបស់លោកធ្វើការចាក់ផ្សាយគឺលោកតែងតែអង្គុយមើលពីចំណុចខ្វះខាតរបស់ខ្លួនថាតើមានខុសចំណុចណាខ្លះ ឬឆ្គងត្រង់ចំណុចណា? ដើម្បីធ្វើការកែច្នៃនិងអភិវឌ្ឍនវាឲ្យបានល្អដើម្បីបម្រើអារម្មណ៍របស់ទស្សនិកជន។ ចំពោះបទពិសោធន៍ក្នុងនាមជាពិធីករមួយរូប តាប៊ុយ បានបង្ហាញឲ្យដឹងថាលោកធ្វើអ្វីមួយនិងនិយាយអ្វីមួយដែលជាចំណង់ចំណូលចិត្តនឹងការស្រឡាញ់របស់លោក ដូចជាការនិយាយស្ដីមួយចំនួនពេលខ្លះលោកមិនអាចនិយាយសម្ដីបែបផ្លូវការទេគឺលោកនិយាយតាមបែបសម្ដីសាមញ្ញៗ ប៉ុន្តែពេលនិយាយចេញទៅគឺធ្វើឲ្យទស្សនិជនផ្ទុះសំណើចតែម្ដង។ ប៉ុន្តែទោះជាយ៉ាងណាក្នុងនាមលោកជាពិធីករមិនអាចនិយាយចេញនូវពាក្យសម្ដីបែបអសុរឬមិនសមរម្យនោះទេហើយវាក៏មិនមែនជាចរិតពិតរបស់លោកដែរ។ រូបលោកផ្ទាល់ក៏ត្រូវដឹងថាខ្លួនឯងកំពុងតែនិយាយក្នុងកម្មវិធីណាហើយត្រូវនិយាយយ៉ាងម៉េច នៅពេលថតកម្មវិធីចប់លោកក៏ត្រូវតែអង្គុយមើលពីការថតកម្មវិធីនោះថាតើការនិយាយស្ដីរបស់លោកមានកំហុសឆ្គងដែរឬទេ? បើមានលោកនឹងធ្វើការផ្លាស់ប្ដូរការនិយាយស្ដីលើពាក្យទាំងនោះ តាប៊ុយបានបង្ហាញចិត្តបែបរំភើបថា លោកពិតជាមានអារម្មណ៍ថាសប្បាយចិត្តខ្លាំងណាស់នៅពេលដែលមានទស្សនិកជនគាំទ្រ និងទស្សនាទូរទស្សន៍ My TV ច្រើនជាពិសេសគឺកម្មវិធីដែលលោកជាអ្នកផលិត ព្រោះវាបានធ្វើឲ្យលោកមានកម្លាំងចិត្តក្នុងការបង្កើតកម្មវិធីថ្មីៗ និងផ្ដល់ជាសំណើចដល់ទស្សនិកជនដែលជាអ្នកទស្សនា។
អ្វីដែលពិសេសជាងនេះទៅទៀតនោះគឺលោកចង់ឃើញស្នាមញញឹមរបស់អ្នកម៉ាក់លោក នៅពេលគាត់កំពុងតែទស្សនាកម្មវិធីដែលលោកផលិតផ្ទាល់តែម្ដង។ នៅពេលអ្នកម៉ាក់របស់ខ្លួនសើចគឺក្នុងនាមជាកូន តាប៊ុយ ពិតជាមានការពេញចិត្តយ៉ាងក្រៃលែង ហើយវាក៏ជាសេចក្ដីសុខមួយផ្នែករបស់លោកផងដែរ។ តាប៊ុយ បានបញ្ចេញមតិយោបល់ថា បច្ចុប្បន្នអាជីពជាពិធីករ ពិធីការិនី ក្នុងព្រះរាជាណាចក្រកម្ពុជា មានការរីកចម្រើនច្រើនរួមទាំងការអត្ថាធិប្បាយ និងការរៀបចំសម្លៀកបំពាក់គឺបានល្អទៅតាមកម្មវិធីនីមួយៗ។ ចំពោះ តាប៊ុយ ផ្ទាល់ក្នុងនាមជាពិធីករ ការរៀបចំខ្លួនក៏ជាកត្តាសំខាន់ផងដែរ គឺយើងត្រូវរៀបចំខ្លួនទៅតាមកម្មវិធីនីមួយៗ និងចំណង់ចំណូលចិត្តរបស់យើងផ្ទាល់ដែលយើងត្រូវធ្វើជាពិធីករ ហើយក៏មិនត្រូវតុបតែងខ្លួនឲ្យហួសហេតុពេកដែរ។
ទោះបីមានការមមាញឹកជាមួយការងារខ្លាំងយ៉ាងណាក៏ តាប៊ុយ មិនដែលភ្លេចជាមួយនឹងការថែរក្សាសុខភាពតាមរយៈការហាត់ប្រាណជារៀងរាល់ថ្ងៃ។ គួររំលឹកផងដែរថា ពិធីករ និងផលិតករវ័យក្មេងរបស់ MYTV គឺ តាប៊ុយ បានទទួលពានរង្វាន់ “ពិធីករដែលមានប្រជាប្រិយភាពជាងគេនៅក្នុងឆ្នាំ២០១៣” ពីកម្មវិធីអាណាចក្រតារាកាលពីរាត្រីថ្ងៃទី១៥ ខែសីហានេះឆ្នាំមុន៕
តាប៊ុយការងារដែលយើងស្រឡាញ់ នោះយើងនឹងធ្វើវាបានល្អ
0 Comments